1. Aha do na iajarhon Jesus pasal Jahowa?

KALUARGA ni Jahowa, ai ma Jesus. Ia do “na parlobei tubuh humbani sagala na tinompa”. Leganni ai, dong homa marjuta malekat. (Kol. 1:15; Ps. 103:20) Iajarhon Jesus do bani susianni anggo Jahowa ai boi do homa gabe Bapa ni sidea. Halani ai ma ase ihatahon Jesus bani sidea anggo Jahowa “Bapangku anjaha Bapanima”. (Joh. 20:17) Dobkonsi hita ididi, gabe sada kaluarga ma hita pakon sanina botou i sab dunia on.​—Mrk. 10:29, 30.

2. Aha do na laho iulas hita bani artikel on?

² Tapi dong do halak na lang boi mambayangkon Jahowa ai Bapa na parholong. Dong do homa na lang mangarusi sonaha carani patuduhkon holong bani hasoman na legan. Halani ai, bani artikel on iulas hita ma sonaha Jesus mangajarhon anggo Jahowa ai Bapa na parholong anjaha boi do homa hita dohor hu Bani. Iulas hita use sonaha hita boi maniru Jahowa laho patuduhkon holongta bani sanina botou.

3. Humbani tonggo na iajarhon Jesus, hunja ibotoh hita anggo hita boi dohor bani Jahowa?

³ Iajarhon Jesus do bani susianni Bapa na parholong do Jahowa ai. Songon sada bapa na parholong, sadihari pe anakni  sihol marsahap hu bani, ra do ia manangihon. Sonai ma homa Jahowa. On boi ibotoh hita humbani tonggo na iajarhon Jesus bani susianni. Bani tonggo ai, ihatahon Jesus do sonon, “Ham Bapanami.” (Mat. 6:9) Sasintongni boi do namin ihatahon Jesus bani susianni ase sidea mandilo Jahowa ai “Pargogoh na So Tarimbang”, “Sitompa”, “Raja na Marmulia”, atap pe gelar na legan. (1 Mus. 49:25; Jes. 40:28; 1 Tim. 1:17) Tapi iajarhon Jesus do susianni ase mandilo Jahowa ai “Bapa”.

4. Hunja ibotoh hita anggo Jahowa sihol ase dohor hita hu Bani?

⁴ Ra do adong na lang boi mambayangkon Jahowa ai songon Bapa na parholong, halani bapani sandiri lang holong hu bani. Tapi anggo Jahowa lang sonai. Iarusi Ia do paruhuranta janah sihol do Ia dohor hubanta. Halani ai ma Bibel mangkatahon, “Padohor nasiam ma bani Naibata, jadi padohoron-Ni ma bani nasiam.” (Jak. 4:8) Holong tumang do Jahowa hubanta janah boi do Ia gabe Bapa na bujur hubanta.

5. Domu bani Lukas 10:22, sonaha Jesus mangurupi hita ase lambin dohor bani Jahowa?

⁵ Iurupi Jesus do hita ase boi lambin dohor bani Jahowa. Ibotoh Jesus do sifat ni Jahowa anjaha itiru ia do homa ai. Halani ai ma ase ihatahon Jesus, “Na mangidah ahu, na mangidah Bapa in do.” (Joh. 14:9) Usih ma Jesus ai songon anak sikahanan na mangajari hita pasal na iharosuhkon ampa na ihagigihon Bapanta. Humbani pambahenan ni Jesus pe tangkas do taridah parholong do Jahowa ai. (Basa Lukas 10:22.) Ulas hita ma contohni.

6. Hunja ibotoh hita sai tongtong do itangihon Jahowa tonggo ni Jesus?

⁶ Sai tongtong do itangihon Jahowa anak-anak-Ni. Sanggah i tanoh on Jesus, tongtong do itangihon Jahowa tonggoni. (Luk. 5:16) Umpamani, sanggah Jesus laho mamilih 12 apostelni, martonggo do ia janah itangihon Jahowa do tonggoni. (Luk. 6:12, 13) Leganni ai, paima roh si Judas pakon na legan laho manangkap Jesus, martonggo do  homa ia janah isaritahon ia ma ganup holsoh ni uhurni. Itangihon Jahowa do tonggoni anjaha isuruh ma sada malekat patoguhkon Anak-Ni ai.​—Luk. 22:41-44.

7. Sonaha do pangahapmu halani ra Jahowa manangihon tonggomu?

⁷ Sonari pe itangihon Jahowa do tonggo ni juakjuak-Ni. Anjaha ibalosi Ia do ai bani panorang na topat. (Ps. 116:1, 2) Pardiateihon hita ma pangalaman ni sada botou i India. Gati tumang ia stres janah haru uhurni. Jadi itonggohon ia ma pasal ai bani Jahowa. Nini ma, “Ibalosi Jahowa do tonggongku ai marhitei acara JW Broadcasting^® Mei 2019. Iulas do ijai aha na porlu ibahen hita anggo lalab haru uhurta. Sosok tumang do ai hubangku.”

8. Sonaha Jahowa patuduhkon holong-Ni bani Jesus?

⁸ Sanggah Jesus i tanoh on, ipatuduh Jahowa do holong-Ni hu bani. (Joh. 5:20) Umpamani, iurupi Jahowa do Jesus ase totap toguh haporsayaonni. Sanggah dong tantangan na borat, ibere Jahowa do hagogohon bani Jesus ase totap martahan. Ibere do homa ganup na ihaporluhon Jesus. Anjaha ihatahon Jahowa do langsung bani Jesus holong do uhur-Ni hu bani. (Mat. 3:16, 17) Halani ai, lang ongga lungun iahap Jesus.​—Joh. 8:16.

9. Sonaha Jahowa patuduhkon holong-Ni hubanta?

⁹ Sonari on pe, ganup do hita ongga mangahapkon holong ni Jahowa. Rimangi ma on: Jahowa do na manogu-nogu hita hubagas organisasi-Ni. Igunahon Ia do sanina botou i sab tanoh on laho mangurupi hita ampa patoguhkon uhurta sanggah hita ibagas hasunsahan. (Joh. 6:44) Ibere Jahowa do homa pangajaran na boi patoguhkon haporsayaonta. Anjaha ibere do homa haporluanta siganup ari. (Mat. 6:31, 32) Anggo irimangi hita ganupan ai, lambin bagas ma holongta hu Bani.

10. Sonaha hita boi maniru holong ni Jahowa?

¹⁰ Holong do homa uhur ni Jahowa bani sanina botounta. Tapi ra do iahap hita lang urah mangkaholongi sidea. Janah ra do lang ibotoh hita sonaha carani patuduhkon holong halani lang sarupa suku ampa hasomalanta pakon sidea. Leganni ai, ganup do hita ongga mambahen na lepak ampa mambahen borit uhur ni hasoman. Tapi, maningon marusaha do hita ase totap marsihaholongan. Sonaha carani? Tiru hita ma holong na ipatuduh Jahowa bani sanina botounta. (Ep. 5:1, 2; 1 Joh. 4:19) Ulas hita ma contohni.

11. Sonaha Jesus maniru ‘idop ni uhur’ ni Jahowa?

¹¹ ‘Paridop ni uhur’ do Jahowa ai. (Luk. 1:78) Sasada halak na maridop ni uhur, mintor holong do uhurni mangidah halak na marsitaronon. Janah ipingkirhon ia do sonaha carani mangurupi sidea. Sanggah Jesus i tanoh on, itiru ia do idop ni uhur ni Jahowa. (Joh. 5:19) Sanggah itonggor Jesus buei halak ‘mambur merap songon biribiri na so marparmahan, mintor idop ma uhurni’ bani sidea janah iurupi Jesus ma sidea. (Mat. 9:36) Ipamalum ma na boritan anjaha ipatoguh do “na loja anjaha na boratan”.​—Mat. 11:28-30; 14:14.

12. Sonaha hita boi patuduhkon idop ni uhur bani sanina botounta?

¹² Dear do anggo ipingkiri hita hasunsahan aha do na iahapkon hasomanta sonari on. Anggo ibahen hita sonai, gabe maidop ma uhurta bani sidea. Umpamani, ra do i kurianta dong sada botou na boritan. Hassi pe lang ongga ia mangindo pangurupion hubanta, tapi dear do anggo ipingkirhon hita aha na ihaporluhonsi. Ra do ia pakon kaluargani porlu iurupi laho paborsihkon rumahni atap pe laho pasirsirhon sipanganon. Tontu malas  tumang ma uhurni anggo iurupi hita ia. Leganni ai, ra do adong hasomanta na baru hona PHK. Anggo sonai, dear do anggo sipsip hita mambere duit hu bani janah lang pala ibahen hita goranta. Anjaha tongtong ma urupi hita ia ronsi dapotsi use horja na legan.

13-14. Sonaha hita boi maniru habujuron ni Jahowa?

¹³ Bujur tumang do Jahowa bani ganup jolma. (Mat. 5:45). Umpamani, age pe lang ongga ipindo halak ase dong mata ni ari, tapi sai tongtong do ibere Jahowa ai hubani ganup halak lang pitah hubani na mangkaholongi-Si. Anjaha sai tongtong do ibere Jahowa haporluanta siganup ari. Tangkas ma holong tumang do Jahowa hubanta. Halani ai, gabe holong do homa uhurta hu Bani. Jadi tiru hita ma Ia. Ulang ma ipaima hita hasomanta lobei na maningon mangindo pangurupion hubanta. Dearan ma hita na langsung mangurupi sidea.

¹⁴ Bahat do sanina botou na maniru Jahowa. Umpamani bani tahun 2013, sanggah masa Topan Hayan i Filipina, bahat do bangunan na hancur. Bahat do hasomanta na maseda rumahni. Tapi, bahat do hasomanta i sab dunia on na mangurupi sidea. Umpamani, dong na mambere sumbangan. Dong homa na roh hujai laho padearhon atap pe pajongjongkon rumah ni sanina botou na maseda. Hasilni ibagas na satahun, dong 750 rumah ni sanina botou na domma ipadear. Sanggah pandemi COVID-19 pe, marsiurupan do ganup sanina botou. Anggo ra hita mangurupi sanina botounta, on patuduhkon holong tumang do uhurta bani sidea.

15-16. Domu bani Lukas 6:36, sonaha hita boi maniru Jahowa?

¹⁵ Isasap Jahowa do dousanta. (Basa Lukas 6:36.) Isalpuhon Ia do hasalahanta bai ganup ari. (Ps. 103:10-14) Sonai do homa Jesus, ra do ia manalpuhon hasalahan ni susianni. Anjaha ibere Jesus do homa hagoluhanni bahen tobusan laho manasap dousanta. (1 Joh. 2:1, 2) Tontu on ma na mambahen lambin bagas holongta hubani Jahowa pakon Jesus.

 ¹⁶ Anggo ra hita “marsisasapan dousa”, lambin banggal ma holongta bani hasoman i kuria. (Ep. 4:32) Tapi sipata lang urah mangkorjahon ai. Ai do na iahapkon sada botou. Dong sada artikel i Menara Pengawal na mangurupi ia, na marjudul “Ampunilah Satu Sama Lain dengan Lapang Hati”. * Ihatahon botou ai ma, “Dobkonsi hubasa artikel ai, huarusi ma aha do sasintongni artini manalpuhon salah ni hasoman. Manalpuhon salah ni hasoman sedo artini setuju hita bani hasalahanni ai, tapi lang be marsogam ni uhur hita hu bani. Ai ma na mambahen damei uhur.” Jadi, anggo ra hita manasap salah ni hasoman, on patuduhkon holong do uhurta bani sidea janah itiru hita do Jahowa.

17. Domu bani Mateus 5:16, sonaha hita boi pasangapkon goran ni Naibata?

¹⁷ Tontu malas tumang uhurta boi gabe sada kaluarga pakon sanina botou na marsihaholongan i sab dunia on. Halani ai, sihol do hita ase lambin bahat halak na manombah Jahowa rap pakon hita. Jadi, jaga hita ma parlahounta. Ulang halani parlahounta, gabe iejek halak goran ni Naibata pakon hasoman na legan. Tapi horjahon hita ma na dear ase marosuh halak marlajar pasal Jahowa.​—Basa Mateus 5:16.

18. Aha do na boi mangurupi hita ase totap barani sanggah marbarita?

¹⁸ Sipata ianiaya halak do hita halani mandalankon parentah ni Naibata. Ra do homa mabiar hita sanggah marbarita. Tapi pos ma uhurta iurupi Jahowa pakon Jesus do hita. Ongga do ihatahon Jesus hubani susianni lang porlu haru uhur ni sidea pasal aha na laho sihatahonon. Mase sonai? Jesus mangkatahon, “Ai bereon-Ni do bennima bani panorang ai hata sihatahononnima. Ase, sedo hanima na marsahap ijai, tapi tonduy ni Bapanima do na marsahap ibagas hanima.”​—Mat. 10:19, 20.

19. Saritahon ma pangalaman ni sada hasomanta na barani patorangkon pasal haporsayaonni.

 ¹⁹ Pardiateihon hita ma pangalaman ni si Robert hun Afrika Selatan. Sanggah baru ope ia marlajar Bibel, iboan ma ia hu pengadilan halani lang ra gabe tentara. Sanggah ai, lang bahat na ibotoh ia isi ni Bibel. Tapi barani do ia patorangkon hubani hakim anggo ia lang ra gabe tentara halani holong uhurni bani sanina botouni. Malas do uhurni boi gabe sada kaluarga pakon sanina botou i sab tanoh on. Isungkun hakim ma hu bani, “Ise do gakni sanina botoumu?” Lang isangka si Robert sonai sungkun-sungkun ni hakim ai. Mintor idingat ia ma ayat harian bani sadari ai i Mateus 12:50 na mangkatahon, “Ai na mangkorjahon harosuh ni Bapa na i nagori atas ai, ai do anggingku, ai do botouhu, ai do inangku.” Iurupi tonduy na pansing ma ia mambalosi sungkun-sungkun ai ampa sungkun-sungkun na legan. Tontu malas do uhur ni Jahowa mangidahsi. Sonai ma homa, anggo totap hita marpangunsandeian bani Jahowa, malas do homa uhur-Ni mangidah hita.

20. Aha do na sihol bahenonta? (Johannes 17:11, 15)

²⁰ Martarima kasih tumang do hita halani dong kaluarganta i sab dunia on. Jahowa do na gabe Bapanta anjaha holong do homa uhur ni sanina botou hubanta. Tapi marusaha do Sibolis mambahen hita marpingkir lang ihaholongi Jahowa hita. Anjaha marusaha do homa ia mambahen hita ase lang be marsada. Tapi sanggah Jesus i tanoh on, itonggohon ia do ase ijaga Jahowa ganup susianni janah ase totap sidea marsada. (Basa Johannes 17:11, 15.) Ibalosi Jahowa do tonggo ni Jesus. Jadi pos ma uhurta holong do uhur ni Jahowa hubanta janah sai tongtong do iurupi Ia hita. Janah marusaha ma hita ase lambin mangkaholongi sanina botounta.