ARTIKEL PARLAJARAN 39
Totap ma Toguh Sanggah Dong Kaluarganta na Ipecat
‘Gatini in sidea mambahen pusok uhur ni Naibata.’—PS. 78:40, 41.
DODING102“Urupi Halak na So Margogoh”
NA LAHO IULAS *
1. Sonaha ma pangahapta anggo dong hasoman atap pe kaluarganta na ipecat hun kuria?
AI ADONG do hasoman atap pe kaluarga ni nasiam na ipecat hun kuria? Anggo adong, tontu pusok tumang ma uhurmu halani ai. Sonai ma na iahapkon si Hilda. * Ia mangkatahon, “Sanggah matei suamiku pusok tumang uhurhu halani domma 41 tahun hanami marhajabuan. Tapi pusokan do uhurhu sanggah ipecat anakku hun kuria janah itadingkon ia homa parumaen ampa pahompu ai.”
Iarusi Jahowa do sonaha pusok ni uhurta sanggah adong kaluarganta na ipecat hun kuria (Tonggor ma paragrap 2-3) *
2-3. Domu bani Psalmen 78:40, 41, sonaha ma pangahap ni Jahowa sanggah dong juakjuak-Ni na manadingkon-Si?
2 Sanggah dong malekat na manadingkon Jahowa, pusok do homa uhur-Ni. (Jud. 6) Anjaha borit do homa uhur-Ni sanggah manlawan halak Israel hu Bani. (Basa Psalmen 78:40, 41.) Jadi anggo adong kaluarga atap pe hasomanta na ipecat, iarusi Jahowa do sonaha pangahapta. Dihut do homa Ia marpusok ni uhur. Tapi marjanji do Ia sai tongtong do iurupi anjaha ipatoguh Ia hita ase totap martahan.
3 Bani artikel on iulas hita holi aha do na boi ibahen hita ase totap toguh anggo dong kaluarganta na ipecat. Iulas hita homa aha do na boi ibahen sanina botou laho mangurupi hasoman na adong kaluargani na ipecat. Tapi iulas hita ma lobei aha do na maningon ipadaoh hita hun bagas pingkiranta anggo adong kaluarga atap hasomanta na ipecat.
ULANG MANSALAHKON DIRI SANDIRI
4. Sonaha ma pangahap ni namatoras anggo adong niombahni na manadingkon Jahowa?
4 Anggo adong hasomanta anak atap boruni ipecat, ra do adong tubuh ibagas uhurni hurang do na ibahen ia sadokah on ase gabe sonai niombahni. Sanina Lukas na dong anakni ipecat mangkatahon, “Huahap ahu do na salah ijai. Modom pe gabe lang sinok ahu. Sipata tangis do ahu janah gabe stres do ahu halani ai.” Si Elisabet pe adong anakni ipecat. Nini ma sonon, “Huahap ahu do na salah halani lang dear huajari anakku ase mangkaholongi Jahowa.”
5. Ise do na salah anggo adong halak na manadingkon Jahowa?
5 Dingat hita ma, ganup do hita ibere Jahowa kesempatan laho mamilih aha na laho sibahenonta. Boi do hita mamilih laho manombah Jahowa atap lang. Umpamani, ra do adong na maposo age pe lang dear parlahou ni namatorasni, tapi ipilih ia do mangidangi Jahowa janah totap do ia setia hu Bani. Leganni ai, adong homa na maposo na domma dear iajari namatorasni pasal prinsip ni Bibel. Tapi dob magodang ia, itadingkon ia do Jahowa. Jadi hita sandiri do na mamilih laho mangidangi Jahowa atap lang. (Jos. 24:15) Halani ai, nasiam namatoras anggo adong niombahmu na manadingkon Jahowa, sedo salahmu ai.
6. Sonaha ma pangahap ni niombah anggo namatorasni manadingkon Jahowa?
6 Tapi sipata, dong do namatoras na manadingkon Jahowa ampa kaluargani. (Ps. 27:10) Anggo sonai na masa, tontu pusok tumang ma uhur ni niombahni, halani sasintongni namatorasni do na gabe sitiruon hu bani. Songon si Ester, halani ipecat bapani nini ma sonon, “Sai lalab ma ahu tangis halani ihatahon Bapa lang ra be ia mangidangi Jahowa. Holong tumang do uhurhu hubani Bapa. Jadi dobkonsi ipecat ia, sai lalab ma hupingkiri sonaha do baritani sonari. Ai ma na mambahen ahu gabe stres tumang.”
7. Sonaha do pangahap ni Jahowa anggo adong na maposo namatorasni manadingkon Jahowa?
7 Hanima na maposo, anggo ipecat namatorasmu, ganup do sanina botou i kuria dihut marpusok ni uhur. Pos ma uhurnima Jahowa pe iarusi Ia do sonaha pangahapmu. Holong tumang do Ia bannima halani totap hanima setia. Sanina botou pe holong do homa bannima. Dingat ma, sedo salahmu anggo namatorasmu manadingkon Jahowa. Songon na dob iulas hita, ganup do halak maningon mamilih laho mangidangi Jahowa atap lang. Jadi ganup do halak na tardidi maningon do “martanggung jawab bani pambahenanni bei”.—Gal. 6:5, Terjemahan Dunia Baru.
8. Anggo adong kaluarganta na ipecat, aha ma na porlu ibahen hita? (Tonggor homa kotak “ Mulak ma Mangidangi Jahowa”.)
8 Anggo dong halak na ihaholongi hita na manadingkon Jahowa, tontu mangarap do hita ase mulak use ia hubani Jahowa. Tapi paima masa ai, maningon tongtong ma ipatoguh hita haporsayaonta. Anggo ibahen hita sonai, gabe sitiruon na dear ma hita hubani kaluarganta tarmasuk homa hubani na ipecat ai. Anjaha ai do homa na mangurupi hita ase ulang gabe mandolei. Jadi aha do na porlu ibahen hita ase totap toguh haporsayaonta?
NA PORLU IBAHEN ASE TOTAP TOGUH HAPORSAYAONTA
9. Aha do na porlu ibahen hita ase totap toguh haporsayaonta? (Tonggor homa kotak “ Ayat-Ayat na Boi Mangapoh Uhurmu Sanggah Adong Kaluargamu na Manadingkon Jahowa”.)
9 Ponting tumang do ase totap ipatoguh hita haporsayaonta pakon haporsayaon ni kaluarganta. Sonaha carani? Basa anjaha rimangi hita ma Bibel bai ganup ari janah ulang itadingkon hita partumpuan. Sonai ma na ibahen si Joanna dobkonsi bapa pakon kakakni ipecat. Ia mangkatahon, “Gabe damei ma uhurhu sanggah hubasa sarita ibagas Bibel umpamani songon si Abigail, si Ester, si Job, si Josep, pakon Jesus. Gabe tarapoh do ahu janah hubotoh ma aha do na porlu hubahen. Gabe togu do homa ahu halani manangar lagu-lagu na adong i JW Broadcasting®.”
10. Songon na ipatugah bani Psalmen 32:6-8, aha ma na porlu ibahen hita sanggah pusok uhurta?
10 Patugah ma ganup holsoh ni uhurmu hubani Jahowa. Sanggah pusok uhurmu, totap ma martonggo hu Bani. Pindo ma hu Bani ase iurupi ham mangarusi aha do harosuh-Ni sanggah sonai situasini. Pindo ma homa Ia ase “mangajari ampa mamodahi nasiam pasal dalan sidalananmu”. (Basa Psalmen 32:6-8.) Ra do halani pusok ni uhurmu, lang tarsaritahon ham sonaha pangahapmu hubani Jahowa. Tapi pos ma uhurmu iarusi Ia do pangahapmu ai. Holong tumang do uhur-Ni bamu janah sihol do Ia ase ra ham mansaritahon ganup na ibagas uhurmu hu Bani.—2 Mus. 34:6; Ps. 62:8, 9.
11. Domu bani Heber 12:11, mase boi ihatahon halani holong ni Jahowa do ase adong pangaturan pemecatan i kuria ? (Tonggor homa kotak “ Pangaturan Pemecatan Patuduhkon Holong ni Jahowa”.)
11 Sasintongni halani holong ni Jahowa do ase adong pangaturan pemecatan. Bahat tumang gunani pangaturan ai hubani halak i kuria, tarmasuk homa bani sidea na ipecat. (Basa Heber 12:11.) Tapi sanggah adong pengumuman pasal halak na ipecat, ra adong piga-piga halak i kuria na lang setuju bani keputusan ai. Dingat ma, lang ibotoh hita ganup pasal parsoalan ai. Anjaha lang mungkin ipatugah sintua homa pasal kesalahan ni halak na ipecat ai. Pos ma uhurta sanggah sintua mambahen panitia pengadilan, domma ipingkiri sidea anget-anget keputusan ai janah marusaha do sidea mambahen keputusan mangihutkon prinsip ni Bibel. Sasintongni “i lambungni Jahowa” do sidea sanggah mambahen keputusan ai.—2 Kron. 19:6.
12. Aha do gunani anggo lang ra hita bergaul pakon halak na ipecat ?
12 Anggo lang ra hita bergaul pakon halak na ipecat, on boi mangurupi na ipecat ai ase tarojur uhurni mulak use manombah Jahowa. Si Elisabet na ipatugah nongkan ai mangkatahon, “Sasintongni sihol do uhurhu ase totap marsahapi pakon anaknami na ipecat ai. Tapi dobkonsi mulak use ia hubani Jahowa, ihatahon ia ma bannami marguna tumang do pangaturan pemecatan ai. Gabe bahat do parlajaran na dapotsi.” Si Markus, suamini pe mangkatahon, “Halani lang ra hanami marsahapi pakon ia, ai ma na mambahen ia gabe tarojur laho mulak use manombah Jahowa. Malas tumang uhurnami halani iihutkon hanami pangaturan ni Jahowa.”
13. Aha do na boi ibahen hita ase ulang lalab pusok uhurta ?
13 Saritahon ma aha na ibagas uhurmu hubani hasoman na boi ihaporsayai ham. Sidea boi do mangurupi ham ase ulang lalab pusok uhurmu. (Pod. 12:25; 17:17) Songon si Joanna na ipatugah nongkan ai, ia mangkatahon “Lungun tumang huahap. Jadi husaritahon ma aha na ibagas uhurhu hubani hasoman. Ai ma na mambahen damei uhurhu.” Tapi ra do adong hata ni hasoman i kuria na mambahen lambin borit uhurmu. Anggo sonai aha ma na boi ibahen ham?
14. Mase hita porlu “marsianju-anjuan anjaha marsisasapan dousa”?
14 Maningon sabar ma hita hubani hasomanta. Ganup do hita lang sempurna. Halani ai, ra do lang ibotoh hita aha na sosok na laho ihatahon. (Jak. 3:2) Jadi anggo adong parsahap ni hasoman na lepak, sasintongni lang adong tujuan ni sidea laho mambahen borit uhurta. Dingat hita ma podah ni apostel Paulus. Iojur ia do hita ase ‘marsianju-anjuan anjaha marsisasapan dousa’ anggo adong na mambahen na salah. (Kol. 3:13) Ai ma na ibahen sada hasomanta na dong kaluargani na ipecat. Ia mangkatahon, “Sasintongni dear do tujuan ni hasoman laho mangapoh ahu. Sipata cara ni sidea do na lang sosok. Tapi iurupi Jahowa do ahu ase boi manalpuhon salah ni sidea.” Aha do na boi ibahen sanina botou i kuria laho mangurupi hasoman na adong kaluargani na ipecat?
NA BOI IBAHEN SANINA BOTOU
15. Sonaha hita boi mangurupi hasoman na dong kaluargani na ipecat?
15 Basar ma hita hubani hasoman na dong kaluargani na ipecat. Songon botou Meri, dobkonsi ipecat botouni gabe mabiar do ia roh hu partumpuan. Nini do, “Hupingkiri do lalab aha do holi na ihatahon sanina botou hubangku. Gabe stres ma ahu halani ai. Hape lang sonai na masa. Dihut do sidea marpusok ni uhur songon ahu. Anjaha lang adong sidea na mangkatahon na lang dear pasal ahu. Malas tumang uhurhu anjaha lang lungunan be huahap.” Sada botou na legan mangkatahon, “Dobkonsi anaknami ipecat, bahat do sanina botou na mangapoh hanami. Ihatahon sidea do lang ibotoh sidea aha na laho ihatahon tapi dihut do sidea tangis pakon ahu. Dong homa na manulis surat bangku. Gabe toguh do ahu halani ganupan ai.”
16. Sonaha hita boi mangurupi hasoman na dong kaluargani ipecat?
16 Sai tongtong ma iurupi hita hasoman na dong kaluargani na ipecat. Sanggah sonai ma situasini porlu tumang sidea iojur ampa iapoh. (Heb. 10:24, 25) Tapi sipata ra do adong hasomanta na mangahap lang ra be sanina botou mamparsahapkonsi halani ipecat kaluargani. Halani ai, marusaha ma hita ase totap basar hubani sanina botou na dong kaluargani ipecat. Urupi hita ma homa na maposo na ipecat namatorasni. Dong hasomanta na margoran si Maria na ipecat suamini janah manadingkon sidea. Nini do, “Piga-piga hasoman hun kuria roh hu rumahku mamboan sipanganon. Iarahkon sidea do homa ahu pakon anakku rap marlajar Bibel pakon sidea. Dihut do sidea marpusok ni uhur pakon ahu janah tangis homa sidea. Mintor ibela sidea do ahu anggo dong na mangkatahon na lang dear pasal ahu. Ai ma na mangapoh uhurhu.”—Rom 12:13, 15.
Ganup sanina botou i kuria boi mangurupi hasoman na adong kaluargani na ipecat (Tonggor ma paragrap 17) *
17. Sonaha sintua boi mangurupi hasoman na dong kaluargani na ipecat?
17 Sintua pe maningon ipatoguh sidea do hasoman na dong kaluargani na ipecat. (1 Tes. 5:14) Jadi paima mulai atap pe dobkonsi salosei acara partumpuan boi do iparsahapkon nasiam sidea. Roh ma nasiam hu rumah ni sidea janah rap martonggo ma pakon sidea. Arahkon ma sidea rup marbarita atap boi do iontang nasiam sidea dihut bani parlajaran Bibel kaluarga ni nasiam. Jadi maningon ipardiateihon sintua do sanina botou na marpusok ni uhur anjaha tongtong ma urupi sidea.—1 Tes. 2:7, 8.
ULANG MA MANDOLEI ANJAHA TOTAP MA PORSAYA BANI JAHOWA
18. Domu bani 2 Petrus 3:9, Aha do harosuh ni Jahowa hubani halak na mangkorjahon dousa na banggal?
18 Sihol do Jahowa ase ulang “magou namin atap ise pe, tapi das ma haganup tene hu hamubahon ni uhur”. (Basa 2 Petrus 3:9.) Age pe adong halak na mangkorjahon dousa na banggal, tapi lang marosuh Naibata gabe magou halak ai. Domma ibere Ia Anak-Ni na sasada in, ai ma Jesus laho manobus dousa ni jolma. Jadi sihol do uhur-Ni ase mulak use sidea hu Bani. On boi ibotoh hita humbani sarita na ipatugah Jesus pasal anak na magou. (Luk. 15:11-32) Bahat do sanina botou na manadingkon Jahowa hinan tapi sonari domma mulak. Anjaha dear do sanina botou i kuria mangalo-alo sidea. Songon pangalaman ni si Elisabet na ipatugah nongkan ai malas tumang uhurni halani mulak use anakni ai hubani Jahowa. Ia mangkatahon, “Malas tumang uhurhu halani bahat sanina botou na tongtong mangurupi ahu ase ulang mandolei.”
19. Mase hita porlu totap porsaya bani Jahowa?
19 Sai tongtong ma hita porsaya bani Jahowa. Marguna do ganup parentah-Ni ai hubanta. Bapa na bujur anjaha na paridop ni uhur do Jahowa ai. Holong tumang uhur-Ni hubani ganup halak na totap setia hu Bani. Pos ma uhur ni nasiam, seng ongga itadingkon Jahowa nasiam sanggah ibagas hasunsahan. (Heb. 13:5, 6) Songon si Markus na ipatugah nongkan ai mangkatahon, “Seng ongga itadingkon Jahowa hita. Sanggah adong sitarononta iurupi Ia do hita.” Sai tongtong do ibere Jahowa “hagogohon na sumurung in”. (2 Kor. 4:7) Halani ai, pos ma uhurmu age pe adong kaluargamu na manadingkon Jahowa, boi do ham totap setia hu Bani.
DODING 44 Tonggo ibagas Hasosakan
^ par. 5 Tontu pusok tumang do uhurta anggo dong halak na ihaholongi hita na manadingkon Jahowa! Bani artikel on holi, iulas hita ma sonaha do pangahap ni Jahowa anggo sonai situasinta. Iulas hita homa aha do na boi ibahen hita ase totap toguh age pe adong kaluarga atap hasomanta na ipecat. Anjaha iulas hita use aha do na boi ibahen sanina botou na legan anggo dong hasoman i kuria na dong kaluargani na ipecat.
^ par. 1 Piga-piga goran domma igantih.
