1, 2. (a) Anggo lang dong panrajaion diri, sonaha do ujungni? (b)  Mase hita porlu mangulas pasal panrajaion diri?

MAROSUH do Jahowa ase hita pataridahkon panrajaion diri. (Gal. 5:22, 23) Jahowa boi do tongtong pataridahkon panrajaion diri. Tapi anggo hita lang boi, halani manisia na lang gokan dear do hita. Sasintongni halani lang dong panrajaion diri, on ma na mambahen gabe bahat parsoalan. Umpamani, gabe marayoh ma sidea mangkorjahon na ponting janah lang be marparlahou na dear i sikolah atap pe i ianan parhorjaan. Anjaha boi homa do mambahen halak gabe kasar marsahap, martenggen-tenggen, martinggili, marsirang-sirang, marutang, masuk penjara, marpusok ni uhur, hona naborit halani hubungan seks, atap pe mardear angkula tapi lape marhajabuan.​—Ps. 34:12-15.

² Halak na lang boi manrajai dirini boi parohkon hasunsahan hubani dirini sandiri pakon halak na legan. Sonari on, otik dassa halak na boi manrajai dirini. Lang pala tarsonggot hita pasal ai, halani domma ipatugah ai bani Bibel janah on pataridahkon anggo hita manggoluh bani “panorang parpudi”.​—2 Tim. 3:1-3.

3. Mase hita porlu manrajai diri?

 ³ Mase hita porlu manrajai diri? Dong dua alasanni. Na parlobei anggo dong panrajaion diri, somalni seng sai bahat be parsoalanta. Lambin urah ma hita marhasoman pakon na legan janah lang podas manggila, holsohan atap pe marpusok ni uhur. Na paduahon, ase boi marhasoman pakon Naibata, porlu do hita manrajai pingkiran ampa uhurta ase ulang lepak. Ulang ma songon si Adam pakon si Hawa na lang dong panrajaion diri.​—1 Mus. 3:6.

4. Mase lang sai urah laho manrajai diri?

⁴ Ibotoh Jahowa do lang sai urah banta laho manrajai diri halani lang gokan dear do hita. Halani ai, songon hasoman na parholong, sihol do Jahowa mangurupi hita manjaga pingkiran ampa uhurta ase ulang lepak. (1 Raj. 8:46-50) Bani artikel on, ulas hita ma sonaha do Jahowa pataridahkon panrajaion diri. Dob ai ulas hita homa contoh pasal halak na boi pakon na lang boi manrajai diri, janah podah aha do na boi mangurupi hita ase boi manrajai diri.

5, 6. Sonaha do Jahowa pataridahkon panrajaion diri?

⁵ Halani gokan dear do Jahowa, Ia boi do tongtong manrajai diri. (5 Mus. 32:4) Tapi anggo hita lang gokan dear. Halani ai, porlu ma ipareksa hita sonaha do Jahowa boi manrajai diri, ase lambin urah hita mangusihi-Si. Anjaha on pe boi mangurupi hita ase totap mambahen na dear sanggah dong na mambahen borit uhurta. Sonaha do Jahowa pataridahkon panrajaion diri?

⁶ Pingkirhon ma aha do na ibahen Jahowa sanggah Sibolis manlawan i Pohon Eden. Sanggah ai, ra do juakjuak ni Jahowa na i surga marah do mangidah pambahenan ni Sibolis. Halani mangidah bahat sitaronon, ra do hita pe marsogam ni uhur bani Sibolis. Tapi anggo Jahowa boi do manrajai diri. Lang mintor podas Ia manggila anjaha manripaskon Sibolis pakon jolma na manlawan ai. (2 Mus. 34:6; Job 2:2-6) Mase? Halani Jahowa lang marosuh ganup halak iripaskon tapi sihol do uhur-Ni ase ganup jolma mambahen “hamubahon ni uhur”.​—2 Ptr. 3:9.

7. Aha do na boi iparlajari hita humbani Jahowa?

⁷ Humbani Jahowa, hita boi marlajar ase ulang hampung marsahap atap pe urah manggila. Jadi paima mambahen haputusan, dear ma lobei pingkirhon janah martonggo mangindo hauhuron bani Jahowa. (Ps. 141:3) Halani anggo hita manggila atap marborit ni uhur, gabe sunsah ma hita manrajai diri. On boi mambahen buei halak manosal halani lang ipingkiri lobei paima marsahap atap pe mambahen haputusan!​—Pod. 14:29; 15:28; 19:2.

8. (a) Ise ma na gabe siusihan na dear na pataridahkon panrajaion diri? (b) Mase seng ra si Josep rap modom pakon parinangon ni si Potipar? (Idah gambar bani alm. 3.)

⁸ Ise ma na gabe siusihan na dear na pataridahkon panrajaion diri? Ra do idingat nasiam si Josep, anak ni si Jakob. Seng ra ia manlanggar titah ni Naibata sanggah ia marhorja i rumah ni si Potipar, kopala parmasak ruti ni si Parao. Halani “jenges do rupa pakon bohi ni” si Josep, marosuh do parinangon ni si Potipar bani, anjaha gati ma iarahkon ase rap modom pakonsi. Tapi mase seng ra si Josep? Ra, si Josep domma manrimangi sonaha do ujungni anggo ra ia modom pakon parinangon ni si Potipar. Ongga do sanggah isintak naboru ai baju ni si Josep, mintor lintun do ia. Nini si Josep ma, “Sonaha ma tarbahen ahu mangkorjahon hajahaton na sonin banggalni anjaha mardousa dompak Naibata?”​—1 Mus. 39:6, 9; Basa Podah 1:10.

9. Aha do boi ibahen hita sanggah dong na mangarahkon hita ase manlanggar titah ni Naibata?

⁹ Aha do na iparlajari hita humbani si Josep? Anggo dong na mangarahkon hita laho manlanggar titah ni Naibata, porlu ma ipingkirhon hita aha na sihol bahenonta bani situasi sonai. Ra do sanggah lape gabe saksi Jahowa, dong na partenggen-tenggen, pangisop, mamakei narkoba, rap modom pakon margantih-gantih halak, ampa na leganni. Tapi hassi pe domma ididi, ra do adong halak na sihol uhurni mambahen sonai use. Anggo ai do na masa bani nasiam, pingkirhon ma, ai boi pasedahon parhasomananmu pakon Jahowa. Nasiam pe boi mamingkirhon bani situasi na sonaha do na boi manlajou nasiam mangkorjahon na lepak janah aha na sihol bahenon ni nasiam. (Ps. 26:4, 5; Pod. 22:3) Dob ai, martonggo ma bani Jahowa mangindo hauhuron ase boi manrajai diri sanggah dong parlajouan.

10, 11. (a) I sikkolah, aha do na boi masa bani na maposo? (b) Aha do na boi mangurupi na maposo ase ulang manlanggar titah ni Naibata?

¹⁰ Aha na masa bani si Josep, iahapkon na maposo sonari on do homa. Umpamani si Rini. I parsikolahan, megah do hasoman-hasomani marsarita anggo sidea domma marhallet anjaha berhubungan seks. Sipata gabe songon “lungunan” pangahap ni si Rini halani ihatahon hasoman-hasomanni ai na bodoh tumang do ia halani lape dong halletni. Tapi na maruhur do na ibahen si Rini on. Halani halak na maposo, urah tumang do tarlajou laho berhubungan seks. (2 Tim. 2:22) Anjaha sanggah hasomanni manungkun mase ia lang ra berhubungan seks, gabe dalan ma on bani si Rini laho patorangkon pasal titah ni Naibata. Malas do uhurta  mangidah bahat na maposo na lang ra mangihutkon parlahou na lepak. Janah Jahowa pe marmegah ni uhur do mangidah sidea!

¹¹ Bibel pe patugahkon contoh pasal halak na lang boi manrajai dirini laho berhubungan seks. Anjaha ujungni gabe parsoalan ma na masa bani sidea. Ongga do nasiam mangahapkon aha na masa bani si Rini? Anggo sonai, dingat ma pasal dalahi na oto na isaritahon bani Podah bindu 7. Janah dingat ma homa pasal si Amnon, halani lang boi manrajai diri, gabe bahat ma parsoalan na roh. (2 Sam. 13:1, 2, 10-15, 28-32) Namatoras porlu do mangurupi niombahni ase boi manrajai diri marhitei mangulas pakon sidea pasal contoh-contoh nongkan ai sanggah parlajaran Bibel kaluarga.

12. (a) Sonaha do si Josep pataridahkon panrajaion diri sanggah pajumpah pakon saninani? (b) Aha do na iparlajari hita humbani si Josep?

¹² Dong ope parlajaran na legan na boi dapot hita humbani si Josep. Sanggah i Masir, roh ma sanina-saninani laho mamboli sipanganon. Tapi lang ipatugahni ise do ia sasintongni, ase ibotohni sonaha do paruhuran ni saninani ai. Dobkonsi ibotohni panosalan ni sidea, sihol tangis ma ia. Tapi irajai do dirini anjaha lintun ma ia hu kamarni laho tangis. (1 Mus. 43:30, 31; 45:1) Sonai homa ma hita. Anggo dong sanina-botou na mambahen borit uhurta, ulang ma mintor manggila hita atap mangkatahon aha na boi isosali hita bani pudian ni ari. (Pod. 16:32; 17:27) Anjaha ra do adong kaluarganta na ipabali hun kuria. Anggo dong do panrajaion diri banta, lang ra hita marsaor pakon sidea. Tongon, lang sai urah mandalankon ai. Tapi anggo idingat hita siusihan humbani Jahowa, boi do ai mangurupi hita ase urah mandalankon titah-Ni ai.

13. Parlajaran aha do na idapot hita humbani si Daud?

¹³ Siusihan na legan ai ma si Daud. Sanggah si Saul pakon si Simei mambahen na jahat hu bani, si Daud lang manggila anjaha lang mambalas. (1 Sam. 26:9-11; 2 Sam. 16:5-10) Tapi ongga do si Daud lang boi manrajai dirini. Umpamani, marbangkis do ia pakon si Batseba janah ongga do sihol mambalas pambahenan ni si Nabal na jahat. (1 Sam. 25:10-13; 2 Sam. 11:2-4) Hunjon adong dua parlajaran na idapot hita. Na parlobei, bani sidea na mambobahon juakjuak ni Jahowa, ulang ma lepak manggunahon kuasani. Na paduahon, ulang ma iagan hita domma toguh hita janah lang boi be lepak.​—1 Kor. 10:12.

14. Bere ma contoh pasal sahalak dalahi na boi manrajai dirini! Anjaha bani panorang sisonai, mase porlu ase hita totap lamlam?

¹⁴ Aha do na boi bahenonta ase boi  manrajai diri? Idah hita contoh humbani hasomanta na margoran si Luigi. Adong sada motor manlanggar motor ni si Luigi. Tapi na manlanggar ai do na mintor manggila hu bani janah sihol maringori. Jadi martonggo ma si Luigi ase boi totap lamlam mambalosi. Tapi lalab do inunut supir ai marsuraki hu bani. Jadi mintor isuratkon si Luigi ma nomor plat motor na manlanggar ai janah mintor laho ma ia hunjai. Dob saminggu, laho ma si Luigi hu rumah ni sada naboru na marosuh mambotoh hasintongan. Hape paramangon ni naboru ai do na manlanggar motorni ai. Jadi mangaku salah ma dalahi ai hu bani janah ra mangurupi si Luigi padearhon motorni. Ujungni marlajar Bibel ma dalahi ai. Hunjon ibotoh si Luigi ma ponting tumang do hape ase totap lamlam halani anggo podas ia manggila sambor do ujungni.​—Basa 2 Korint. 6:3, 4.

15, 16. Sonaha do parlajaran Bibel mangurupi hita pakon kaluarganta ase boi manrajai diri?

¹⁵ Anggo tongtong marlajar Bibel, on  boi mangurupi hita ase boi manrajai diri. Dingat ma na ihatahon Jahowa bani si Josua, “Ulang ma mosor buku ni titah on hun pamanganmu, sai pingkir-pingkiri ma in arian pakon borngin, ase iramotkon anjaha ihorjahon ho romban hubani na tarsurat ibagas in, jadi marulih ma ho bani sagala dalanmu anjaha mardohar ma ho.” (Jos. 1:8) Sonaha Bibel boi mangurupi nasiam ase boi manrajai diri?

¹⁶ Bani Bibel bahat do contoh na patuduhkon gunani manrajai diri janah sonaha do ujungni anggo lang dong panrajaion diri. Isuratkon do ai bahen parlajaran banta. (Rom 15:4) Jadi basa hita ma contoh-contoh ai, anjaha parimbagaskon ma sonaha do hita pakon kaluarganta boi mangusihi sidea ibagas hagoluhanta. Janah pindo ma pangurupion bani Jahowa ase hita boi mandalankon podah humbani Bibel. Anggo sunsah ope iahap hita manrajai diri, martonggo ma bani Jahowa janah marusaha ma mandalankon podah-Ni. (Jak. 1:5) Anjaha pindahi ma hatorangan bani publikasinta na boi mangurupi hita.

17. Sonaha do namatoras boi mangurupi niombahni ase boi manrajai diri?

¹⁷ Sonaha do namatoras boi mangurupi niombahni ase boi manrajai diri? Ibotoh namatoras do anggo niombahni seng humbani tubuh domma boi manrajai dirini. Halani ai ma porlu do ase namatoras mangajari niombahni marhitei pataridahkon siusihan na dear. (Ep. 6:4) Anggo ididah nasiam niombah hurang panrajaion diri, sungkun ma dirimu, ‘Ai hubahen do siusihan na dear?’ Patuduh ma siusihan marhitei ringgas martumpu, marbarita anjaha mambahen parlajaran Bibel kaluarga. Nasiam pe ulang ma mabiar mambahen aturan bani niombah! Halani Jahowa pe, mambahen aturan do bani si Adam pakon si Hawa ase boi sidea hormat hubani Jahowa. Sonai homa namatoras, maningon ipinsang do niombahni ase iarusi sidea porlu do hormat bani namatorasni janah on do na boi mangurupi sidea ase dong panrajaion diri. Na siporlunan, iajari namatoras ma ase niombah mangkaholongi Naibata janah marosuh mandalankon aturan-Ni.​—Basa Podah 1:5, 7, 8.

18. Mase maningon maruhur hita mamilih hasoman?

¹⁸ Ganup hita maningon maruhur do sanggah mamilih hasoman. Halani anggo hasomanta ai mangkaholongi Jahowa, hita pe gabe tarojur mangusihi sidea. (Pod. 13:20) Sidea pe boi mangurupi hita ase boi manrajai diri. Anjaha parlahounta na madear, gabe usihan do homa ai bani sidea. Anggo tongtong hita manrajai diri, marosuh ma Jahowa banta, malas ma uhurta, janah parhasomananta pe boi dear pakon na legan.