1, 2. (a) Sonaha pambahenan ni Jahowa legan pakon halak na marpangkat? (b) Aha na laho iulas hita bani artikel on?

BAHAT do jolma na marpangkat sihol manrajai janah mangodoh-odoh na legan. (Mat. 20:25; Par. 8:9) Tapi Jahowa lang ongga sonai! Hassi pe Ia Pargogoh Na So Tarimbang, iparuhurhon do jolma i tanoh on. Bujur do Ia janah ibotoh do pangahapta ampa na porlu banta. Ibotoh Ia do homa lang gokan dear hita, janah lang ongga hita isuruh mangkorjahon na lang boi tarbahen hita.​—Ps. 103:13, 14.

² Bani Bibel iparlajari hita ma sonaha Jahowa mangarusi pangahap ni juakjuak-Ni. Ulas hita ma tolu contohni: Na parlobei, ididah hita ma sonaha Jahowa bujur mangurupi si Samuel, laho patugahkon panguhuman-Ni bani Sintua ni Malim Eli. Na paduahon, ididah hita ma sonaha Jahowa sabar mangurupi si Musa, na mangahap anggo ia lang boi mambobai bangsa Israel. Janah na patoluhon, iulas hita ma sonaha Jahowa mamparuhurhon bangsa Israel sanggah sidea luar hun Masir. Humbani  contoh-contoh ai, aha ma na boi iparlajari hita pasal Jahowa, janah sonaha hita boi mangusihi-Si?

3. Aha do na masa sanggah si Samuel modom, anjaha aha do ra na isungkun hita? (Tonggor ma gambar bani alm. 21.)

³ Sanggah poso ope si Samuel, domma mangidangi ia i tabernakel. (1 Sam. 3:1) Bani sada borngin sanggah na modom si Samuel, dong ma sora na mandilo goranni. * (Basa 1 Samuel 3:2-10.) Iagan si Samuel ma Sintua ni Malim Eli na dob matua do na mandilo ia. Jadi mintor lintun ma ia manjumpahisi janah nini ma, “Tonggor ma, ijon do ahu, idilo ham do ahu.” Tapi ihatahon si Eli ma, “Seng dong hudilo ho.” Tapi dob idilo use ia ronsi dua hali nari, gabe ibotoh si Eli ma Jahowa do hape na mandilo si Samuel ai. Jadi mintor ipatugah si Eli ma bani si Samuel aha na maningon hatahononni porini idilo use ia. Jadi sonai ma na ibahen si Samuel. Mase lang mintor ipatugah Jahowa bani si Samuel anggo Ia do na mandilo ai? Lang ipatugah alasanni bani Bibel. Ra do ibahen Jahowa sonai halani ibotoh sonaha pangahap ni si Samuel.

4, 5. (a) Sonaha pangahap ni si Samuel dobkonsi isuruh Jahowa ia patugahkon panguhuman-Ni bani si Eli? (b) Aha do na boi ibotoh hita pasal Jahowa humbani sarita ai?

⁴ Basa 1 Samuel 3:11-18. Bani Titah, iparentahkon do ase dakdanak hormat bani na matua, tarlobih bani pangintuai. (2 Mus. 22:28; 3 Mus. 19:32) Halani ai tontu lang urah iahap si Samuel sogodni laho patugahkon barita panguhuman ai bani si Eli. Bibel mangkatahon “mabiar do si Samuel patugahkon pangungkabon ai bani si Eli”. Tapi domma ibahen Naibata ase iarusi si Eli anggo Ia do na mandilo si Samuel. Dob ai, isuruh si Eli ma ase ulang iponopkon si Samuel aha na ihatahon Jahowa bani. Halani ai, “ipatugah si Samuel ma hu bani ganup hata ai”.

⁵ Ongga do homa itangar si Eli barita sisonai humbani “sada halak ni Naibata”. (1 Sam. 2:27-36) Humbani sarita on ibotoh hita ma anggo Jahowa ai maruhur janah mamingkirhon pangahap ni halak na legan.

6. Aha do na boi iparlajari hita humbani cara ni Jahowa mangurupi si Samuel?

⁶ Na maposo, aha ma parlajaran na dapot hanima humbani sarita pasal si Samuel? Iarusi Jahowa do tantangan ampa pangahapnima. Umpamani ra do maila janah mabiar hanima marbarita bani halak na magodang atap pe na tuanan. Tapi pos ma uhurmu sihol do Jahowa mangurupi hanima. Halani ai martonggo ma janah patugah sonaha pangahapmu bani Jahowa. (Ps. 62:9) Dob ai pingkirhon ma homa na maposo  na legan ibagas Bibel na boi itiru hanima. Boi do homa marbuali hanima pakon sanina botou na sarupa tantanganni pakon hanima. Ra do isaritahon sidea holi sonaha Jahowa mangurupi sidea, sipata marhitei cara na lang isangka.

7, 8. Hunja ibotoh hita iarusi Jahowa do pangahap ni si Musa?

⁷ Sanggah si Musa marumur 80 tahun, ibere Jahowa ma tugas hu bani laho paluahkon halak Israel hun Masir. (2 Mus. 3:10) Tontu borat do ai bani si Musa halani marmahan do horjani i Midian sadokah 40 tahun na parpudi. Halani ai, ihatahon ma bani Jahowa, “Ise ma ahu, ase ahu laho marayak Parao, anjaha padaratkon halak Israel hun Masir?” Tapi nini Jahowa ma, “Huhasomani pe ho.” (2 Mus. 3:11, 12) Marjanji do homa Jahowa bahenon-Ni do holi pangintuai ni Israel ase “mambalosi” si Musa. Tapi nini si Musa use, “Seng haporsayaan ni sidea ahu anjaha seng tangihononni.” (2 Mus. 3:18; 4:1) Ai patuduhkon iahap si Musa salah do na ihatahon Jahowa ai. Hassi pe sonai totap do sabar Jahowa. Ibere do kuasa bani si Musa laho mambahen halongangan. Si Musa do halak na parlobei na isuratkon ibagas Bibel na mandapot kuasa sisonai.​—2 Mus. 4:2-9, 21.

⁸ Dobkonsi ai pe totap do mabiar si Musa. Ihatahon ma anggo ia lang pandei marsahap. Jadi nini Naibata ma, “Ahu pe mangkasomani pamanganmu anjaha mangajari ho atap aha sihatahononmu.” Tapi totap do lang ra ia. Ipangindo ma ase halak na legan na ipakei Naibata laho marsahap. Dob ai marah ma Jahowa. Hassi pe sonai iarusi Jahowa do pangahap ni si Musa. Isuruh ma si Aron mangkasomanisi marsahap.​—2 Mus. 4:10-16.

9. Halani bujur janah sabar Jahowa mangurupi si Musa, aha ma hasilni?

 ⁹ Hunjon aha ma na boi iparlajari hita pasal Jahowa? Halani Pargogoh Na So Tarimbang do Jahowa, sasintongni boi do ipaksa Ia si Musa ase unduk. Tapi bujur do Ia janah sabar. Iurupi do si Musa na toruh maruhur ase porsaya sai ihasomani Jahowa do ia. Aha ma hasilni? Ujungni gabe pambobai na bujur do si Musa. Lamlam janah marusaha do homa ia mangarusi halak na legan songon na ibahen Jahowa hu bani.​—2 Mus. 12:3.

10. Aha do hasilni anggo bujur hita bani na legan songon Jahowa?

¹⁰ Aha ope na boi iparlajari hita? Na gabe paramangon, namatoras, atap sintua, boi do mangusihi Jahowa. Hassi pe dong tanggung jawab nasiam laho mangatur, tapi bujur janah sabar ma nasiam bani parinangon, dakdanak, ampa sanina botou. (Kol. 3:19-21; 1 Ptr. 5:1-3) Pingkirhon ma homa pangahap ni sidea. Anggo iusihi nasiam Naibata Jahowa pakon Jesus Kristus, lambin urah ma halak marbuali pakon nasiam, janah gabe toguh ma uhur ni sidea. (Mat. 11:28, 29) Gabe siusihan na madear do homa nasiam bani sidea.​—Heb. 13:7.

11, 12. Aha na ibahen Jahowa ase lang mabiar halak Israel manadingkon huta Masir?

¹¹ Bani tahun 1513 SM, luar ma halak Israel hun Masir. Bilangan ni sidea ai dong lobih tolu juta halak. Janah dong homa dakdanak, na matua, na boritan, atap pe na cacat. Tontu porlu ma adong Pambobai na bujur janah mangarusi sidea. Sonai ma na ibahen Jahowa marhitei si Musa. Halani ai lang be mabiar halak Israel ibagas pardalanan luar hun tanoh Masir.​—Ps. 78:52, 53.

¹² Aha ma na ibahen Jahowa ase lang mabiar halak Israel? Iatur ma sidea songon tentara sanggah luar hun Masir. (2 Mus. 6:26) Halani sonai sidea iatur, porsaya ma sidea anggo Jahowa tongtong manlinggomi sidea. Dob ai ibere Jahowa do homa “hombun arian” ampa “sondang ni apuy borngin”. Ibahen Jahowa sonai ase porsaya sidea sai ilinggomi janah ihasomani Jahowa  do sidea lang soal aha na masa.​—Ps. 78:14.

13, 14. (a) Sonaha Jahowa patuduhkon holong ni atei bani halak Israel sanggah i Laut Sigerger? (b) Sonaha Jahowa patuduhkon kuasa-Ni na banggal bani halak Masir?

¹³ Basa 2 Musa 14:19-22. Bayangkon ma ham dihut pakon halak Israel ai. Tapi mintor mabiar ma ham halani i pudimu roh halak Masir mangayaki ham, janah laut do i lobeimu. Jadi ibahen Jahowa ma hombun na i lobeinima pindah hu pudi i holang kolang ni bangsa Israel pakon halak Masir. Halani ai gabe golapan ma halak Masir tapi torang do bani halak Israel. Dob ai ipagostong si Musa ma tanganni hu Laut Sigerger janah roh ma logou na doras dompak timur mambolah laut ai. Jadi mardalan ma ham, kaluargamu, ampa pinahanmu hu tongah ni laut ai rap pakon ganup halak Israel. Janah ididah ham lang marbutak dalan ai, seng homa landit, tapi korah do. Porini pe dong halak na lambat mardalan, totap do boi ia das hu dipar ni laut ai.

¹⁴ Basa 2 Musa 14:23, 26-30. Dobkonsi mandipar nasiam, roh ma Parao na gijang maruhur pakon tentarani mangayaki nasiam pakon bangsa Israel hu tongah ni laut. Dob ai ipagostong si Musa use tanganni, lanjar mardomu ma use bah ni laut na dob bolah ai, mangogapkon Parao pakon tentarani. Matei ma sidea ganupan!​—2 Mus. 15:8-10.

15. Aha ma na boi iparlajari hita pasal Jahowa humbani sarita ai?

 ¹⁵ Humbani sarita ai ibotoh hita ma sedo Naibata na geor Jahowa. Halani ai gabe porsaya ma hita sai ilinggomi Jahowa do hita. (1 Kor. 14:33) Songon parmahan na bujur na manjaga biribirini, sonai ma Jahowa mansarihon hita. Tongtong do ia manjaga hita humbani munsuhta. Gabe tarapoh ma uhurta mambotoh ai, tarlobih halani domma lambin dohor ajal ni dunia on.​—Pod. 1:33.

16. Aha do na boi iparlajari hita humbani cara ni Jahowa paluahkon halak Israel?

¹⁶ Sonari on pe ipardiateihon Jahowa do juakjuak-Ni. Iurupi do sidea ase boi tongtong marhasoman pakon-Si. Janah tongtong do sidea ilinggomi tarlobih sadokah hamarsikon banggal. * (Pangk. 7:9, 10) Jadi lang soal poso, matua, boritan, atap pe na cacat, lang mabiar sidea atap haru sadokah hamarsikon banggal. Tongon bahat do holi hasunsahan bani panorang ai. Tapi idingat sidea do hata ni Jesus, “Jongjong ma nasiam, padirgak ma ulu nasiam, ai dohor ma haluahon nasiam.” (Luk. 21:28) Hassi pe roh do holi Gog, ai ma bangsa-bangsa na gogohan humbani Parao laho manangkap sidea, tapi totap do sidea porsaya sai ilinggomi Jahowa do sidea. (Hes. 38:2, 14-16) Mase porsaya sidea? Halani ibotoh sidea do lang ongga mubah Jahowa. Ia do holi Sipaluah bani juakjuak-Ni janah isarihon do sidea bani panorang ai.​—Jes. 26:3, 20.

17. (a) Aha do gunani iparlajari hita sarita na patuduhkon anggo Jahowa parduli bani juakjuak-Ni? (b) Aha na laho iulas hita bani artikel na mangihut?

¹⁷ Bani artikel on domma iparlajari hita anggo Jahowa ai parduli janah ipingkirhon do sonaha pangahap ni juakjuak-Ni sanggah paluahkon sidea. Sanggah iparlajari nasiam sarita sisonai ibagas Bibel, pindahi ma lambin bahat hatorangan pasal sarita ai. Ra do gabe dapot hita parlajaran na baru pasal Jahowa na sadokah on lape ongga ibotoh hita. Anggo lambin bahat na ibotoh hita pasal Jahowa lambin toguh ma holong pakon haporsayaonta hu Bani. Bani artikel na mangihut iulas hita ma sonaha hita boi mangarusi pangahap ni anggota kaluarga, sanina botou, ampa pangahap ni halak i iananta marbarita, songon na ibahen Jahowa.