1-3. (a) Bani panorang parpudi on, aha do na boi mangurupi hita ase totap porsaya bani Naibata? (b) Bani artikel on, aha do na laho iulas hita?

BANI panorang parpudi, lambin bahat do halak parjahat. “Songon poyon-poyon” do bahat ni sidea. (Ps. 92:8) Lang ra sidea mangihutkon aturan humbani Naibata. Halani ai ma ihatahon si Paulus do bani halak Kristen, “Dakdanak ma nasiam pasal hajahaton, tapi matoras ma bani [pamingkirion].” (1 Kor. 14:20) Sonaha do hita mandalankon ai?

² Balosni ai adong bani ayat tema artikel on. Ijai ihatahon, “Halak sipindahi Jahowa [iarusi] do haganupan.” (Pod. 28:5) Jadi iarusi sidea do aha na boi mambahen malas uhur ni Jahowa. Bani Podah 2:6-9 ihatahon do anggo Jahowa mambere hapentaran bani halak na mangkorjahon na madear. Ai do na mangurupi sidea mangarusi “hapintoron pakon uhum, habonaron pakon sagala dalan na dear”.

³ Ibere Jahowa do hapentaran bani si Noak, si Daniel,  pakon si Job. (Hes. 14:14) Sonai homa do bani juakjuak ni Naibata sonari on. Anggo ham sonaha, ai dong do hapentaran humbani Naibata bani nasiam? Ase hita boi ‘mangarusi haganupan’ na mambahen malas uhur ni Jahowa, maningon dear do itanda hita Naibata. Bani artikel on iulas hita ma: (1) sonaha do si Noak, si Daniel, pakon si Job mananda Jahowa, (2) aha do gunani ai bani sidea, anjaha (3) songon sidea, sonaha do hita boi patoguhkon haporsayaonta.

4. Sonaha do si Noak mananda Jahowa, anjaha aha do gunani ai hu bani?

⁴ Sonaha do si Noak mananda Jahowa? Humbani mungkahni, manisia boi mananda Jahowa marhitei tolu cara ai ma: Marhitei tompaon, manangar humbani juakjuak ni Naibata, ampa humbani pangalamanni sandiri na mangahapkon pasu-pasu halani mandalankon aturan ni Jahowa. (Jes. 48:18) Humbani tompaon, ibotoh si Noak ma anggo Naibata ai tongon-tongon do adong anjaha ibotohni do homa sonaha paruhuran-Ni. Halani ai iarusi si Noak ma sonaha do banggalni kuasa ni Jahowa, anjaha pitah Ia dassa Naibata na sintong. (Rom 1:20) On ma na mambahen lambin toguh haporsayaon ni si Noak bani Naibata.

5. Humbani aha do si Noak marlajar laho mambotoh harosuh ni Naibata bani manisia?

⁵ Bibel mangkatahon, “Humbani na manangar ambilan do roh ni haporsayaon.” Jadi hita pe boi lambin porsaya bani Naibata marhitei na manangar pasal Naibata humbani halak na legan. (Rom 10:17) Sonai homa ma si Noak. Ra do ia manangar pasal Naibata humbani kaluargani. Umpamani, humbani bapani, si Lamek. Halak na porsaya bani Naibata do si Lamek, anjaha sompat ope itandani si Adam. (Tonggor ma gambar bani alm. 9) Na leganni ra do homa humbani ompungni ai ma si Metusala. Dob ai humbani ompungni si Metusala ai ma si Jaret, na matei sanggah si Noak marumur 366 tahun. * (Luk. 3:36, 37) Jadi ra do humbani ompungni ai pakon parinangonni sidea do, si Noak mambotoh anggo Jahowa manompa jolma ase manggoki tanoh on ampa mangidangi-Si. Dob ai ibotoh si Noak do sonaha ujungni halani si Adam pakon si Hawa lang manangihon Naibata. (1 Mus. 1:28; 3:16-19, 24) Marosuh tumang do ia bani aha na itangarni ai, anjaha ai do na mangojur ia laho mangidangi Jahowa.​—1 Mus. 6:9.

6, 7. Sonaha do pangarapan boi patoguhkon haporsayaon ni si Noak?

⁶ Pangarapan boi do patoguhkon haporsayaonni sasada halak. Ibotoh si Noak do artini goranni, ai ma “Marsaran” atap pe “Pangapohon”. On patuduhkon dong do pangarapan. (1 Mus. 5:29) Marhitei  panogu-noguon ni Jahowa, ihatahon si Lamek ma pasal si Noak, “On ma na mangapoh hita bani horjanta ampa halojaon ni tanganta bani tanoh, na pinapaan ni Jahowa.” Jadi dong do pangarapan bani si Noak anggo Jahowa laho mambahen hamubahon na madear. Usih songon si Abel pakon si Henok, porsaya do ia pasal “ginompar” na laho manropukkon ulu ni ulog.​—1 Mus. 3:15.

⁷ Lang haganup panjahaion na isuratkon bani 1 Musa 3:15 iarusi si Noak, tapi porsaya do ia anggo hata ai saud bani ari simagira. Si Henok pe ongga do marbarita anggo Jahowa laho manripaskon halak parjahat. (Jud. 14, 15) Tontu, i Harmagedon saud ma panjahaion ai. Jadi habotohon on mambahen lambin toguh haporsayaon pakon pangarapan ni si Noak.

8. Aha do gunani bani si Noak halani ia mananda Jahowa?

⁸ Halani mananda Jahowa, aha do gunani ai bani si Noak? Halani si Noak marlajar pasal Jahowa, on mambahen toguh haporsayaonni anjaha pentar. Lang ra homa ia mambahen borit uhur ni Jahowa. Halani sihol marhasoman pakon Jahowa, seng ra ia marhasoman pakon halak na lang ra manangihon hata-Ni. Ijia buei do halak longang mangidah hagogohon ni malekat na manlawan dompak Jahowa anjaha roh hu tanoh on. Halani ai, gabe sihol isombah sidea ma malekat ai. (1 Mus. 6:1-4, 9) Sanggah malekat-malekat ai mambuat manisia gabe parinangonni, marniombah ma sidea. Ibotoh si Noak lepak do ai halani Jahowa sihol manisia do na marginompar, sedo malekat. (1 Mus. 1:27, 28) Lambin torang ma ibotoh si Noak na lepak do ai sanggah niombah ni malekat ai, banggalan anjaha gogohan humbani dakdanak na legan. Ujungni, ipatugah Jahowa bani si Noak na laho ripaskonon-Ni ma ganup parjahat ai marhitei Bah na sumbang. Halani si Noak porsaya bani sipasingat ni Jahowa, ipajongjong ma sada parau ase boi maluah ia pakon kaluargani.​—Heb. 11:7.

9, 10. Sonaha do hita boi patoguhkon haporsayaonta songon si Noak?

⁹ Sonaha do hita boi patoguhkon haporsayaonta songon si Noak? Dear ma parlajari hata ni Naibata anjaha dalankon ma na iparlajari ai laho mambahen hamubahon ampa pilihan na dear ibagas goluhta. (1 Ptr. 1:13-15) Anggo hita porsaya bani Naibata janah mandapot hapentaran hun Bani, on boi manlinggomi hita humbani akal-akal ni Setan ampa parlahou ni dunia on. (2 Kor. 2:11) Sonari bahat do halak na marosuh bani hajahaton pakon parlahou na butak, ampa mandalankon harosuh ni daging. (1 Joh. 2:15, 16)  Anjaha bahat do homa halak lang porsaya anggo hita domma manggoluh bani panorang na parpudi. Halani ai, anggo lang toguh haporsayaonta, boi do sarupa paruhuranta pakon sidea. Dingat ma sanggah Jesus mangkatahon anggo panorangta sonari on usih do songon masa ni si Noak, lang ipatugahni pasal hajahaton ampa parlahou na masambor. Tapi sihol do ia pasingatkon hita ase ulang mangkorjahon aha pe na boi mambahen hita lang be mangidangi Jahowa.​—Basa Mateus 24:36-39.

¹⁰ Sungkun ma dirinta, ‘Humbani parlahouku, ai tongon-tongon do ahu mananda Jahowa? Ai halani haporsayaonku do mangojur ahu laho mangkorjahon harosuh ni Jahowa ampa mangajarhon ai bani halak na legan?’ Humbani balos ni nasiam ai, taridah ma anggo nasiam marhasoman pakon Naibata atap lang.

11. (a) Halani si Daniel mangkaholongi Naibata, aha do na ibotoh hita pasal namatorasni? (b) Paruhuran na sonaha do na sihol iusihi nasiam humbani si Daniel?

¹¹ Sonaha do si Daniel mananda Jahowa? Tontu, domma iajari namatorasni si Daniel ase mangkaholongi Jahowa ampa Hata-Ni. Anjaha idalankon si Daniel do ai sadokah goluhni. Hassi pe ia domma matua, tapi totap do ia ringgas marlajar Hata ni Naibata. (Dan. 9:1, 2) Bagas do pangarusion ni si Daniel pasal Jahowa. Ibotoh ia do homa sonaha pambahenan ni Jahowa bani halak Israel. On taridah humbani tonggoni na toruh maruhur na isuratkon bani Daniel 9:3-19. Basa ma tonggo ni si Daniel ai janah parimbagaskon. Dob ai sungkun ma dirimu, ‘Humbani tonggoni ai parlajaran aha do na hudapot pasal si Daniel?’

12-14. (a) Sonaha do si Daniel pataridahkon hapentaran na ibere Jahowa? (b) Aha do pasu-pasu ni Jahowa bani si Daniel?

¹² Halani mananda Jahowa, aha do gunani ai bani si Daniel? Lang sai urah bani halak Jahudi na martenger ni uhur bani Jahowa laho mangidangi-Si i huta Babel, na bahat manombah gana-gana. Umpamani, ihatahon Jahowa do bani halak Jahudi, ‘Porluhon hanima ma hadameion i huta pambuangan-Ku.’ (Jer. 29:7) Janah iparentahkon Jahowa do homa pitah hu Bani dassa sidea boi martonggo ampa mangidangi humbani gok ni uhur. (2 Mus. 34:14) Jadi sonaha do si Daniel mandalankon haduasi parentah on? Hapentaran na ibere Naibata boi mangurupi ia mambahen Jahowa do na siporlunan marimbangkon parentah ni jolma. Marratus tahun dobkonsi ai, iajarhon Jesus do homa podah na sarupa.​—Luk. 20:25.

¹³ Na leganni, dong ma parentah ni raja na manlarang halak martonggo hubani naibatani sobali hubani raja sadokah 30 ari. (Basa Daniel 6:8-11) Boi do si Daniel marsidalian janah mangkatahon, ‘Larangan on pitah 30 ari dassa.’ Tapi na siporlunan bani si Daniel, ai ma mandalankon parentah ni Jahowa marimbangkon parentah ni manisia. Sasintongni boi do si Daniel marponop-ponop laho martonggo. Tapi ibotohni anggo sadokah on, buei do halak na manonggor ia martonggo ganup  ari. Jadi, anggo marponop ia martonggo, boi ma iagan halak anggo ia lang be mangidangi Jahowa. Jadi totap do ia martonggo hassi pe on boi mambahen ia hona uhum.

¹⁴ Ipasu-pasu Jahowa do si Daniel halani ia martenger ni uhur bani Jahowa janah pangkar. Ipaluah Jahowa ma si Daniel humbani liang ni singa marhitei halongangan. On mambahen gabe ibotoh halak na i Harajaon Madai-Persia pasal Jahowa!​—Dan. 6:26-28.

15. Sonaha do hita boi patoguhkon haporsayaonta songon si Daniel?

¹⁵ Sonaha do hita boi patoguhkon haporsayaonta songon si Daniel? Ase boi toguh haporsayaonta bani Jahowa, lang sungkup pitah mambasa Bibel. Tapi porlu do iarusi hita isini. (Mat. 13:23) Porlu do ibotoh hita sonaha paruhuran ni Jahowa. Halani ai porlu do iparimbagaskon hita aha na ibasa. Dob ai, gati ma martonggo, tarlobih ma sanggah dong parlajouan. Pos ma uhurta, sai bereon ni Jahowa do hubanta  hapentaran ampa hagogohan anggo ipindo hita hu Bani.​—Jak. 1:5.

16, 17. Sonaha do si Job mananda Jahowa?

¹⁶ Sonaha do si Job mananda Jahowa? Tongon si Job sedo halak Israel. Tapi, kaluargani ope si Abraham, si Isak, pakon si Jakob. Anjaha Jahowa domma mangajarhon bani sidea hasintongan pasal diri-Ni ampa harosuh-Ni. Jadi si Job pe ra do domma mambotoh hasintongan ai, hassi pe lang ibotoh hita sonaha ia boi mambotoh ai. (Job 23:12) Ia sandiri mangkatahon, “Domma namin hubogei barita pasal Ham.” (Job 42:5) Jahowa pe patugahkon anggo si Job ai domma mansaritahon hasintongan pasal-Si bani halak na legan.​—Job 42:7, 8.

¹⁷ Na leganni, si Job boi mambotoh paruhuran ni Jahowa marhitei mampardiateihon tompaon. (Job 12:7-9, 13) Ongga do homa si Elihu ampa Jahowa mansaritahon bani si Job pasal tompaon, laho patuduhkon na etek tumang do manisia ai marimbangkon Naibata. (Job 37:14; 38:1-4) Halani ai, ihatahon si Job ma, “Sonari pe ase hubotoh marguru Bamu do ganup, anjaha seng tarlanglangi sura-sura ni uhur-Mu age sada.” Anjaha ihatahonni use, “Husolsoli do diringku hundul ibagas orbuk ampa abuan.”​—Job 42:2, 6.

18, 19. Aha do na patuduhkon anggo si Job ai tongon-tongon mananda Jahowa?

¹⁸ Halani mananda Jahowa, aha do gunani ai bani si Job? Gabe ibotohni ma prinsip-prinsip ni Naibata, anjaha ai do na mangurupi ia mangkorjahon na sintong. Umpamani, lang ra si Job mangkatahon holong do ia bani Naibata tapi jahat do pambahenanni bani halak na legan. (Job 6:14) Hassi pe bayak tumang do ia, tapi lang ra ia gabe pajuntul-juntulhon diri atap pe uhur-uhurni bani halak na legan. Tapi ibahenni do halak na legan ai songon kaluargani sandiri. On boi ibotoh hita sanggah ia mangkatahon, “Ai lang lanjar sasadasi do na manjadihon hanami ibagas [kandungan]?” (Job 31:13-22) Jadi legan tumang do pambahenan ni si Job pakon halak na bayak sonari on.

¹⁹ Jahowa do na siporlunan bani si Job marimbangkon na legan. Halani ibotohni anggo arta do na ibahenni siporlunan, gabe itadingkonni ma “Naibata na i atas” ai. (Basa Job 31:24-28.) Ibotoh si Job do homa anggo ia lang boi mangosei padan partongahjabuanni halani pansing do ai i lobei ni Naibata. Jadi lang dong ibagas uhurni sihol rup modom pakon naboru na legan sobali parinangonni. (Job 31:1) Bani masa ai ipaturut Jahowa ope sada dalahi adong lobih humbani sada parinangonni. Tapi lang sonai si Job. Ra do domma ibotohni sonaha Jahowa humbani mungkahni mambahen pangaturan partongah jabuan, ai ma sada dalahi pakon sada naboru. * (1 Mus. 2:18, 24) Dob 1.600 tahun, Jesus pe mangajarhon prinsip na sarupa, ai ma sada halak maningon sada dassa paramangon atap pe parinangonni. Anjaha sidea seng bulih berhubungan seks pakon halak na legan.​—Mat. 5:28; 19:4, 5.

20. Anggo hita mananda Jahowa, sonaha do ai boi mangurupi hita laho mamilih hasoman atap pe hiburan?

 ²⁰ Sonaha do hita boi patoguhkon haporsayaonta songon si Job? Songon si Job maningon itanda hita ma Jahowa anjaha mangkorjahon na sintong. Umpamani, Bibel mangkatahon magigi do Jahowa bani halak na “mangkarosuhkon odoh-odoh”. Anjaha hita pe iparentahkon ase ulang marsaor pakon halak na marsipakulah-kulah. (Basa Psalmen 11:5; 26:4.) Jadi sungkun hita ma dirinta: ‘Humbani ayat ai aha do na boi huarusi pasal pamingkirion ni Jahowa? Ise do namin na siporlunan ibagas goluhku? Anjaha sonaha do ahu mandalankon podah bani ayat ai sanggah mambuha internet, mamilih hasoman atap pe hiburan?’ Balosta ai patuduhkon sadia bagas do hita mananda Naibata. Lang ra hita mangihutkon buei halak sonari on. Halani ai “pasomal-somalhon” hita ma dirinta laho mambotoh na dear ampa na sambor.​—Heb. 5:14; Ep. 5:15.

21. Aha do na boi mangurupi hita ase ‘mangarusi haganupan’ na mambahen malas uhur ni Jahowa?

²¹ Si Noak, si Daniel, ampa si Job domma mananda Jahowa. On ma na mangurupi sidea ‘mangarusi haganupan’ na mambahen malas uhur ni Jahowa. Halani mandalankon aturan ni Naibata, gabe marhasil ma goluh ni sidea. (Ps. 1:1-3) Jadi rimangi ma: ‘Songon si Noak, si Daniel ampa si Job, ai hutanda do homa Jahowa?’ Sonari on bahatan do na boi ibotoh hita humbani Bibel pasal Jahowa, marimbangkon sidea hinan. (Pod. 4:18) Halani ai parlajari hita ma Bibel anjaha manrimangi isini. Anjaha pindo ma pangurupion humbani Naibata. Anggo sonai ibahen hita, dapot hita ma hapentaran humbani Naibata anjaha lambin dohor ma hita hubani Jahowa. Ai do na mangurupi hita ase ulang mangihutkon dunia na jahat on.​—Pod. 2:4-7.