GANUP halak sihol do marmalas ni uhur. Tapi bani panorang parpudi on, ihatahon Bibel do ai “ari hasunsahan”. (2 Tim. 3:1) Bahat do na boi mambahen hita sunsah. Umpamani, halani bahat hajahaton, boritan, hona PHK, atap pe matei halak na hinaholonganta. Ganupan ai boi mambahen hita haru janah marpusok ni uhur. Gari juakjuak ni Naibata pe boi do maretek ni uhur. Anggo sonai na masa, aha do na boi bahenonta ase totap marmalas ni uhur?

Ase ibotoh hita balosni ai, parlobei sahali maningon ibotoh hita, aha do artini malas ni uhur ai. Dob ai, iulas hita ma sonaha hita boi totap marmalas ni uhur hassi pe ibagas hasunsahan. Anjaha iparlajari hita use, aha do na porlu bahenonta ase lambin marmalas ni uhur.

Sedo halak na tartawai ihatahon domma marmalas ni uhur. Mase? Rimangi ma on: Sasada halak na tenggen, ra do lalab ia tartawai. Tapi dobkonsi lang be ia tenggen, totap ope sunsah uhurni. Jadi pitah tongkin dassa malas ni uhurni ai. Lang sonai malas ni uhur na sasintongni.​—Pod. 14:13.

Sasintongni hita boi marmalas ni uhur halani dong na ipaima-ima hita, atap pe mandapot na madear. Anjaha lang soal hita ibagas hasunsahan, totap do hita boi marmalas ni uhur. (1 Tes. 1:6) Umpamani, hassi pe apostel-apostel iparburu halani marbarita pasal Jesus, tapi ‘malas do uhur ni sidea, halani boi sidea manaron hiri-hiri mangkopkop goran ni Jesus’. (Lah. 5:41) Jadi sidea boi marmalas ni uhur sedo halani iparburu, tapi halani boi do sidea setia bani Jahowa.

Malas ni uhur na sasintongni, humbani Naibata do harohanni ai. Mase? Halani malas ni uhur ai, buah ni tonduy do. Jadi tonduy na pansing boi do mangurupi hita ase marmalas ni uhur, ampa patuduhkon biak na madear. (Ep. 4:24; Gal. 5:22) Anggo hita marmalas ni uhur, on boi mambahen hita totap toguh sanggah dong hasunsahan.

Sihol do namin Jahowa ase ganupan mangkorjahon na dear. Tapi lang sonai na masa. Sonari on, bahatan do halak mangkorjahon na jahat. Hassi pe sonai, totap do Jahowa marmalas ni uhur. Bibel mangkatahon, “Hagogohon pakon malas ni uhur bani ianan-Ni.” (1 Kron. 16:27) Jahowa pe marmalas ni uhur sanggah mangidah juakjuak-Ni mangkorjahon na dear.​—Pod. 27:11.

Songon Jahowa, hita pe boi do marmalas ni uhur hassi pe na masa ai lang songon na iarapkon hita. Halani ai, ulang ma haru uhurta, tapi martarima kasih ma halani  na dear na dob iahapkon hita, janah sabar paimahon janji ni Jahowa bani ari simagira. *

Bani Bibel bahat do ipatugah pasal halak na totap marmalas ni uhur hassi pe bahat hasunsahanni. Umpamani, si Abraham na totap marmalas ni uhur hassi pe buei parlajouanni, ampa dong halak na mambahen sunsah ia. (1 Mus. 12:10-20; 14:8-16; 16:4, 5; 20:1-18; 21:8, 9) Mase ia boi totap marmalas ni uhur? Halani ipingkirhonni do pasal dunia na baru na laho iparentah Mesias. (1 Mus. 22:15-18; Heb. 11:10) Sosok do ai songon na ihatahon Jesus, ‘Marolob-olob do si Abraham, bapa nasiam in, halani sihol idahonni aringku in’. (Joh. 8:56) Songon si Abraham, hita pe boi do mamingkirhon pangarapanta bani ari simagira ase boi totap marmalas ni uhur.​—Rom 8:21.

Si Paulus pakon si Silas pe boi do totap marmalas ni uhur hassi pe bahat hasunsahan. Umpamani, sanggah si Paulus pakon si Silas ibogbogi anjaha ipamasuk hubagas penjara, ‘martonggo ma sidea mamuji Naibata’. (Lah. 16:23-25) Sidea boi do totap toguh halani idingat sidea janji ni Naibata bani ari simagira. Anjaha malas do uhur ni sidea mambotoh, halani mangirikkon Jesus do ase sidea sunsah. Songon sidea, anggo irimangi hita hasil na dear halani totap setia bani Naibata, on boi mambahen hita totap marmalas ni uhur.​—Pil. 1:12-14.

Sonari on pe, bahat do sanina-botou na totap marmalas ni uhur hassi pe ibagas hasunsahan. Umpamani, bani bulan November 2013, dong do Topan Super Haiyan i Filipina na marumbakkon lobih humbani 1.000 rumah ni sanina-botounta. Dong sada sanina na margoran si George i kota Tacloban mangkatahon, “Hassi pe hona bencana hanami, tapi totap do hanami marmalas ni uhur. Lang tarhatahon sonaha malas ni uhurnami.” Jadi anggo irimangi hita pambahenan ni Jahowa, anjaha totap martarimakasih hu Bani, on ma na mangurupi hita ase totap marmalas ni uhur ibagas hasunsahan. Tapi aha ope na ibahen Jahowa ase hita boi totap marmalas ni uhur?

Na mambahen malas tumang uhurta ai ma halani boi mananda Jahowa, Na Tang Sitimbulan. Ia do Naibata, Bapa, pakon Hasomanta!​—Ps. 71:17, 18.

Malas tumang do uhurta halani ibere Jahowa do banta hagoluhan, anjaha boi mangahapkon hasonangan. (Par. 3:12, 13) Hita pe boi do mangarusi pasal harosuh-Ni. (Kol. 1:9, 10) Tapi bahat do halak na lang mambotoh aha do tujuan ni sidea manggoluh. Tapi legan do anggo juakjuak ni Naibata. Si Paulus mangkatahon, “‘Na so ongga nididah ni mata, na so ongga binogei ni pinggol, anjaha na so ongga tubuh ibagas uhur ni jolma, ai do ipasirsir Naibata bani na mangkaholongi-Si.’ Tapi ipatalar Naibata do ai banta marhitei Tonduy in.” (1 Kor. 2:9, 10) Jadi malas tumang ma uhurta halani boi mambotoh harosuh ni Jahowa hubanta.

Anjaha bahat do na domma ibere Jahowa hubanta. Umpamani ibere Jahowa do tobusan ase dousanta boi isasap. (1 Joh. 2:12) Adong pangarapan banta laho manggoluh bani dunia na baru. (Rom 12:12) Adong homa sanina-botou na mangurupi hita ase lambin toguh haporsayaonta. (Ps. 133:1) Anjaha ilinggomi Jahowa do hita humbani Sibolis pakon malekat na jahat. (Ps. 91:11) Gabe malas tumang ma uhurta anggo irimangi hita ganup sibere-bere ni Jahowa ai hubanta.​—Pil. 4:4.

Adong ope na mambahen hita ase lambin marmalas ni uhur. Sonai do homa na ihatahon Jesus, ‘Huhatahon pe in bannima, ase  marianan malas ni uhurhu ibagas hanima, anjaha gok malas ni uhurnima.’ (Joh. 15:11) Usih songon apuy, ase lambin gara apuy ai, maningon itambahkon hita do sobanni. Sonai homa anggo sihol hita ase lambin marmalas ni uhur, maningon martonggo ma hita mangindo tonduy na pansing, halani ai do na boi mangurupi hita ase lambin marmalas ni uhur. Halani Bibel ai isuratkon marhitei pangurupion tonduy na pansing, jadi porlu do irimangi hita isini.​—Ps. 1:1, 2; Luk. 11:13.

Na leganni, hita pe boi lambin marmalas ni uhur anggo ringgas mangkorjahon harosuh ni Jahowa. (Ps. 35:27; 112:1) Mase? Halani ihatahon Bibel do, “Habiari ma Naibata, anjaha dalankon ma titah-Ni, ai do hawajiban ni ganup jolma.” (Par. 12:13) Jadi anggo hita mangidangi Jahowa, boi ma iahapkon hita malas ni uhur na sasintongni. *

Anggo hita marmalas ni uhur, bahat do gunani ai banta. Umpamani, gabe malas ma uhur ni Jahowa anggo hita mangidangi-Si ibagas malas ni uhur, hassi pe bahat parsoalanta. (5 Mus. 16:15; 1 Tes. 5:16-18) Halani ibotoh hita aha do malas ni uhur na sasintongni, lang be ibahen hita arta gabe na siporlunan ibagas goluhta. Ai do na mangurupi hita ase lambin bahat panorangta laho mangidangi Jahowa. (Mat. 13:44) Halani ididah hita hasil na dear ibagas pangidangionta, on ma na mambahen hita lambin marmalas ni uhur. Anjaha hita pe boi mambahen halak na legan gabe marmalas ni uhur.​—Lah. 20:35; Pil. 1:3-5.

Na leganni, anggo hita marmalas ni uhur, on pe boi mambahen hita lambin sehat. Halani Bibel mangkatahon, “Uhur na megah paminar bohi.” (Pod. 17:22) Dong sada peneliti kesehatan humbani University of Nebraska, i Amerika Serikat mangkatahon, “Anggo hita lambin marmalas ni uhur sonari, lambin sehat ma hita bani ari na laho roh.” Jadi sosok do na ihatahonni ai songon isi ni Bibel.

Bahat do hasunsahan i dunia on. Hassi pe sonai, boi do hita totap marmalas ni uhur anggo martonggo mangindo tonduy na pansing ampa manrimangi isi ni Bibel. Hita pe boi lambin marmalas ni uhur anggo irimangi hita pambahenan ni Jahowa hubanta, mangusihi halak na martenger ni uhur Bani, anjaha mangkorjahon harosuh-Ni. Anggo sonai ibahen hita, boi ma iahapkon hita na ihatahon bani Psalmen 64:11, “Marmalas ni uhur ma halak parpintor ibagas Jahowa, anjaha hu Bani ma ia marlingod.”