1, 2. (a) Aha do gunani na iahapkon sanina-botou halani dohor bani Jahowa? (b) Aha do na laho iulas hita bani artikel on?

DONG sada botou i Kanada na mangkatahon, halani ia dohor bani Jahowa, gabe martuah ma ia janah boi pasaloseihon parsoalanni. Na leganni dong sada pasangan i Brasil na domma marhajabuan sadokah 23 tahun. Ihatahon sidea, halani dohor bani Jahowa gabe martuah ma parhajabuanni. Sada sanina i Filipina pe mangkatahon halani ia dohor bani Jahowa, gabe malas tumang ma uhurni, anjaha boi mardamei pakon sanina-botou na legan hassi pe marlegan-legan suku ni sidea.

² Jadi bahat do gunani anggo hita dohor bani Jahowa. Halani ai, aha ma na porlu bahenonta ase lambin dohor bani Jahowa? Maningon ibotoh hita do lobei sonaha do halak na dohor bani Jahowa. Bani artikel on iulas hita ma tolu sungkun-sungkun: (1) Sonaha do halak na dohor bani Jahowa? (2) Ise do na boi iusihi  hita ase lambin dohor bani Jahowa? (3) Mase hita maningon mangihutkon “paruhuran ni Kristus” ase lambin dohor bani Jahowa?

3. Aha do na ipatugah Bibel pasal halak na dohor bani Jahowa pakon halak na mangihutkon dunia on?

³ Iojur si Paulus do hita ase dohor bani Jahowa. Ipatugahni do aha na mambahen legan halak na dohor bani Jahowa pakon “jolma pardunia” atap pe halak na mangkaholongi dunia on. (Basa 1 Korint 2:14-16.) Anggo halak na mangihutkon dunia on, “seng tarjalosi na humbani Tonduy ni Naibata, ai haotoon do ai bani, anjaha seng tartandasi”. Tapi anggo halak na dohor bani Jahowa ‘ipareksa do haganupan’, anjaha mangihutkon “uhur ni Kristus” atap marusaha mangusihi pingkiran ni Kristus. Aha ope na mambahen legan halak na dohor bani Jahowa pakon na mangkaholongi dunia on?

4, 5. Sonaha do parlahou ni halak na mangkaholongi dunia on?

⁴ Halak na mangkaholongi dunia, ai ma halak na mangihutkon parlahou ni bueinan halak. Pitah mangindahi harosuhni sandiri dassa sidea. Anjaha songon na ihatahon si Paulus, “jolma na so siat hata” do sidea. (Ep. 2:2) Urah tumang do sidea mangusihi biak ni halak na mabuei. Lang ra sidea mandalankon aturan ni Naibata, anjaha uhur-uhurni dassa. Arta, duit, ampa jabatan do na siporlunan bani sidea.

⁵ Ihatahon Bibel do homa “horja ni daging” do na gati ihorjahon sidea. (Gal. 5:19-21) Sanggah manuratkon suratni na parlobei hu kuria Korint, ipatugah si Paulus do homa sonaha parlahou ni halak sisonai. Marosuh do sidea maringori, mangojur na legan ase manlawan, lang unduk bani halak na ipilih gabe kopala, anjaha sipanganon ampa siinumon do na siporlunan bani sidea. (Pod. 7:21, 22) Ipatugah si Judas do homa anggo halak sisonai, lang ongga mamingkirhon pasal Naibata.​—Jud. 18, 19.

6. Sonaha do halak na dohor bani Naibata?

⁶ Tapi legan do anggo halak na dohor bani Naibata. Parhasomananni pakon Naibata do siporlunan bani. Anjaha marusaha do ia mangihutkon panogu-noguan ni Naibata ampa mangusihi-Si. (Ep. 5:1) Iarusi do sonaha paruhuran ni Naibata anjaha harosuh-Ni do na idalankon. Ia pe marusaha patuduhkon biak na madear atap songon na ihatahon Bibel, ai ma “buah ni tonduy”. (Gal. 5:22, 23) Halak na dohor bani Naibata, marusaha do mandalankon aturan ni Jahowa ibagas goluhni.​—Ps. 119:33; 143:10.

7. Songon na ihatahon Bibel, aha do gunani anggo hita dohor bani Naibata?

⁷ Songon na ihatahon Jesus, martuah do hita anggo dohor bani Naibata. Bani Lukas 11:28 ihatahon, “Martuah ma na mambogei hata ni Naibata anjaha na marimbagaskon ai!” Anjaha Rom 8:6 pe mangkatahon, “Ai hamatean do hauhuron ni daging, tapi hauhuron ni Tonduy ai ma hagoluhan ampa hadameion.” Jadi anggo dohor hita  bani Naibata, boi do hita marhasoman hu Bani, mardamei pakon halak na legan, anjaha marpangarapan hagoluhan sadokah ni dokahni.

8. Mase hita maningon marusaha manjaga pingkiranta?

⁸ Halani bahatan do halak na mangkaholongi dunia on, maningon marusaha do hita ase manjaga pingkiranta. Anggo lang iparimbagaskon hita Hata ni Naibata, on ma na mambahen hita gabe marpingkir songon halak i dunia on. Jadi aha do na boi bahenonta ase ulang sonai? Anjaha aha do na porlu ibahen hita ase lambin dohor bani Naibata?

9. (a) Aha do na boi iparlajari hita ase lambin dohor bani Jahowa? (b) Ise do siusihan na dear na laho iulas hita?

⁹ Songon dakdanak, porlu do sidea marlajar humbani namatorasni, anjaha mangusihi sidea. Sonai homa ma hita, ase lambin dohor bani Jahowa, maningon marlajar do hita humbani halak na dohor bani Naibata. Hita pe porlu marlajar sonaha do halak na mangkaholongi dunia on, ase ulang itiru hita sidea. (1 Kor. 3:1-4) Ibagas Bibel, dong do ipatugah siusihan na dear ampa sidea na lang patut iusihi. Sonari ulas hita na gabe siusihan na dear ai ma: Si Jakob, si Maria pakon Jesus.

10. Hunja ibotoh hita anggo si Jakob ai halak na dohor bani Jahowa?

¹⁰ Songon hita sonari on, bahat do homa sitaronon ni si Jakob. Umpamani, sihol ibunuh si Esau do ia, anjaha ioto-otoi simatuani do homa ia. Hassi pe sonai, totap do idingatni janji ni Jahowa bani si Abraham. Ibotohni do marhitei kaluargani do Jahowa  pasaudkon janji-Ni ai. Halani ai, isarihon si Jakob ma kaluargani. (1 Mus. 28:10-15) Anjaha lang ra ia mangihutkon parlahou ni bueinan halak bani iananni, ampa totap do idingatni janji ni Jahowa. Umpamani, sanggah ia mabiar halani si Esau, martonggo do si Jakob bani Jahowa, “Sai paluah Ham ma ahu . . . Ai Ham do mangkatahon, ‘Sai bahenon-Ku do na madear bam, anjaha bahenon-Ku do ginomparmu songon horsik na i laut.’” (1 Mus. 32:6-12) Hunjon taridah ma anggo si Jakob totap do toguh haporsayaonni bani janji ni Jahowa.

11. Hunja ibotoh hita anggo si Maria ai halak na dohor bani Jahowa?

¹¹ Pingkirhon ma pasal si Maria. Ipilih Jahowa do si Maria gabe inang ni Jesus halani halani orot parhasomananni pakon Jahowa. Hunja ibotoh hita? Basa ma bani Bibel aha na ihatahon si Maria sanggah manrohi rumah ni si Sakaria pakon si Elisabet, sindohorni. (Basa Lukas 1:46-55.) Humbani hatani ai, taridah ma marosuh tumang do si Maria mambasa Hata ni Naibata, anjaha iarusi do isini. (1 Mus. 30:13; 1 Sam. 2:1-10; Mal. 3:12) Na leganni, hassi pe domma marjabu si Maria pakon si Josep, tapi sidea lang berhubungan seks ronsi tubuh Jesus. On patuduhkon tugas humbani Jahowa do na siporlunan bani sidea marimbangkon harosuhni sandiri. (Mat. 1:25) Anjaha tongtong do ipardiateihon si Maria na masa bani Jesus ampa marimbagaskon aha na ihatahon Jesus. (Luk. 2:51) Hunjon taridah ma marosuh do si Maria ai mambotoh janji ni Naibata pasal Mesias. Jadi songon si Maria, ai ra do hita  tongtong mangkorjahon parentah ni Jahowa?

12. (a) Sonaha do Jesus mangusihi Bapani? (b) Sonaha do hita mangusihi Jesus? (Tonggor ma gambar bani alm. 16.)

¹² Jesus do siusihan sidearan na mangurupi hita ase lambin dohor bani Jahowa. Sanggah i tanoh on, tongtong do ia mangusihi Jahowa. Taridah do ai humbani aha na ipingkirhonni, pangahapni ampa pambahenanni. Harosuh ni Jahowa do na ihorjahon Jesus, anjaha idalankon do aturan-Ni. (Joh. 8:29; 14:9; 15:10) Umpamani, idah ma bani buku Jesaya sonaha do Jahowa patuduhkon holong, ampa bani buku Markus na patugahkon sonaha Jesus maniru Bapani. (Basa Jesaya 63:9; Markus 6:34.) Songon Jesus, ai ra do hita mangurupi halak na legan? Ai ringgas do hita marbarita ampa mangajarhon hasintongan? (Luk. 4:43) Halak na dohor bani Naibata, ra do sidea patuduhkon holong anjaha mangurupi na legan.

13, 14. (a) Aha do na boi iparlajari hita humbani sanina-botou na mangusihi Kristus? (b) Bere ma sontohni.

¹³ Sonari on bahat do sanina-botou na mangusihi Jesus. Ringgas do sidea mangidangi anjaha bujur bani na legan. Hassi pe ongga mambahen na lepak, tapi marusaha do sidea ase mubah anjaha mandalankon harosuh ni Jahowa. Umpamani, dong sada botou na margoran si Rachel i Brasil. Nini do, “Marosuh tumang do ahu mamakei mode baju na tarbaru, hassi pe ai lang sopan. Tapi dobkonsi marlajar Bibel, gabe mubah ma ahu ase boi lambin dohor bani Jahowa. Hassi pe lang urah mambahen hamubahon, tapi sonari malas tumang do uhurhu.”

¹⁴ Botou na leganni, ai ma si Reylene i Filipina. Hassi pe domma ididi ia, tapi sikolah na gijang ampa horjani do na siporlunan bani. Halani ai, lang be pongkut ia mangidangi Jahowa. Tapi nini do, “Songon na adong do na hurang ibagas goluhku. Hubotoh ma dong ope na siporlunan marimbangkon horjangku ai.” Mambahen hamubahon ma si Reylene, janah ringgas ma ia mangidangi Jahowa. Porsaya do ia bani janji na isuratkon i Mateus 6:33, 34, anjaha nini do, “Pos do uhurhu isarihon Jahowa do ganup haporluanku.” Ra do adong ibotoh nasiam, sanina-botou na legan na mambahen sisonai. Halani ai, gabe tarojur do hita mangusihi sidea.​—1 Kor. 11:1; 2 Tes. 3:7.

15, 16. (a) Aha do na porlu bahenonta laho mangusihi Jesus? (b) Aha do na boi iparlajari hita ase boi mangusihi “paruhuran ni Kristus”?

¹⁵ Sonaha do hita boi mangusihi Jesus? Bani sada Korint 2:16 pakon Pilippi 2:5, iojur do hita ase mangusihi “paruhuran ni Kristus”. Jadi ase hita boi maniru Jesus, maningon ibotoh hita do sonaha pingkiranni, pangahapni, ampa pambahenanni. Anjaha na siporlunan bani Jesus ai ma parhasomananni pakon Jahowa. Anggo iusihi hita Jesus, dos do ai na mangusihi paruhuran ni Jahowa. On ma  alasanni mase hita porlu marlajar pasal Jesus.

¹⁶ Hunja do ibotoh hita paruhuran ni Kristus? Susian ni Jesus sapari boi do mangidah halongangan na ibahen Jesus, carani mangajar, pambahenanni bani halak na legan, anjaha sonaha do ia mangihutkon parentah ni Jahowa. Gabe boi ma ihatahon susianni, ‘Hanami do saksi pasal haganup na binahenni.’ (Lah. 10:39) Tapi anggo hita lang boi be mangidah Jesus. Hassi pe sonai, boi do iparlajari hita pasal paruhuran ni Jesus bani buku Injil, ai ma Mateus, Markus, Lukas, ampa Johannes. Anggo irimangi hita ganupan ai, on ma na mangurupi hita ‘mangirikkon bokas ni naheini’ anjaha mangusihi paruhuran ni Jesus.​—1 Ptr. 2:21; 4:1.

17. Aha do gunani anggo hita mangusihi Jesus Kristus?

¹⁷ Anggo ipangan hita sipanganon na sehat, boi ma hita lambin sehat. Sonai homa ma anggo hita marusaha mangusihi Jesus, lambin dohor ma hita bani Jahowa. Ibagas ganupan situasinta, ibotoh hita ma aha do na maningon bahenonta laho maniru Jesus. Dob ai hita pe gabe boi do mambahen haputusan na pamalaskon uhur ni Jahowa, anjaha marpanggora ni uhur na borsih. Jadi maningon iusihi hita ma Jesus Kristus.​—Rom 13:14.

18. Aha do na domma iulas hita bani artikel on?

¹⁸ Humbani artikel on, domma iarusi hita sonaha do halak na dohor bani Jahowa. Iparlajari hita do homa ise do siusihan na mangurupi hita ase boi lambin dohor bani Jahowa. Iparlajari hita do homa mase hita boi lambin dohor bani Jahowa anggo mangusihi “paruhuran ni Kristus”. Tapi dong ope na boi iparlajari hita. Umpamani: Hunja ibotoh hita anggo hita dohor atap lang bani Jahowa? Aha na boi bahenonta ase lambin toguh parhasomananta pakon Jahowa? Sonaha hita boi mandalankon aturan ni Jahowa? Ibotoh hita ma balosni ai bani artikel na mangihut.