1, 2. (a) Mase hita porlu mangulas siusihan songon si Noak, si Daniel, pakon si Job? (b) Aha do na masa lang piga dokah dobkonsi si Hesekiel manuratkon Hesekiel 14:14?

GANUPAN hita ongga do mangahapkon sitaronon. Umpamani, boritan, sunsah parduiton atap pe iparburu. Halani ai on boi mambahen hita gabe lang be marmalas ni uhur mangidangi Jahowa. Anggo sonai do pangahapmu dingat ma si usihan humbani si Noak, Si Daniel, pakon si Job. Sidea pe ongga do marsitaronon songon hita. Hassi pe sonai totap do sidea porsaya anjaha unduk bani Jahowa.​—Basa Hesekiel 14:12-14.

² Ayat tema na ulas hita bani artikel on ra do isuratkon si Hesekiel i Babel hira-hira bani tahun 612 SM. * (Hes. 1:1; 8:1) Lang piga dokah dobkonsi ai iripaskon ma huta Jerusalem bani tahun 607 SM. Ijia otik tumang do halak na  maluah. Umpamani si Jeremia, si Baruk, si Ebedmelek, pakon kaluargani si Rekab. Sidea boi maluah halani mangusihi si Noak, si Daniel, pakon si Job na porsaya anjaha unduk bani Jahowa.​—Hes. 9:1-5.

3. Aha do na laho iulas hita?

³ Sonai homa do sonari on, sanggah Jahowa manguhumi dunia na jahat on, pitah halak na mambalosi Jahowa do na boi maluah, songon si Noak, si Daniel ampa si Job. (Pangk. 7:9, 14) Sonari ulas hita ma mase sidea igunahon Jahowa gabe siusihan hubanta. Ulas hita ma (1) aha do tantangan ni sidea (2) songon sidea, sonaha do hita boi porsaya janah unduk bani Jahowa.

4, 5. Aha do tantangan na masa bani si Noak, anjaha mase nasiam boi tarojur halani ai?

⁴ Tantangan aha do na iahapkon si Noak? Bani masa ni ompung ni si Noak, ai ma si Henok, domma sambor tumang parlahou ni jolma. Sidea mangkatahon “hata panlawanon” dompak Jahowa. (Jud. 14, 15) Sonai homa do bani panorang ni si Noak. Bibel mangkatahon, “gok hajahaton do tanoh in”. Halani dong malekat na manlawan bani Jahowa, roh hu tanoh on gabe jolma. Ibuat sidea ma naboru-naboru gabe parinangonni. Anjaha ginompar ni sidea sambor tumang do homa parlahouni. (1 Mus. 6:2-4, 11, 12) Tapi anggo si Noak lang songon sidea. Bibel mangkatahon, “dapotan idop ni uhur do si Noak i lobei ni Naibata”. Ia mangkorjahon aha na sintong. “Marhasoman Naibata do ia manggoluh”.​—1 Mus. 6:8, 9.

⁵ Jadi aha do na boi ibotoh hita pasal si Noak humbani ayat nongkan? Parlobei, si Noak domma marumur hira-hira 600 tahun paima roh Bah na Sumbang. Anjaha totap do ia porsaya bani Naibata! (1 Mus. 7:11) Paduahon, ijia lang dong kuria atap sanina-botou na patoguhkon ia songon hita sonari on. Ra do kaluargani na legan pe marsogam ni uhur bani si Noak. *

6. Sanggah marbarita, mase si Noak maningon totap barani?

⁶ Na ipingkirhon si Noak lang pitah marpalahou na madear. Tapi maningon pangkar do ia patugahkon haporsayaonni hubani halak na legan. Bibel mangkatahon anggo si Noak “parambilan hapintoron”. (2 Ptr. 2:5) Dob ai ihatahon si Paulus do homa “marhitei [haporsayaon] iuhum si Noak do dunia on”. (Heb. 11:7) Tapi bahat do halak na mangejek atap pe na mangancam ase si Noak lang be marbarita. Halani porsaya si Noak bani Jahowa, ibahen Jahowa ma ia gabe barani. Sonai homa ma bahenon ni Jahowa bani juakjuak-Ni sonari on.​—Pod. 29:25.

7. Sanggah si Noak pajongjongkon parau aha do tantanganni?

⁷ Sanggah isuruh Jahowa si Noak pajongjongkon parau na banggal, ia domma marumur lobih humbani 500 tahun, anjaha totap do ia setia.  Ipajongjong ma parau ai ase jolma pakon binatang lang matei sanggah roh Bah na Sumbang. (1 Mus. 5:32; 6:14) Tontu lang urah laho pajongjongkon parau na banggal ai. Halani bahat do halak na lang marosuh hu bani, on mambahen si Noak lambin sunsah. Hassi pe sonai totap do ia porsaya hu Bani. Anjaha ganup parentah ni Jahowa “sonai do ihorjahon”.​—1 Mus. 6:22.

8. Sonaha do si Noak pataridahkon porsaya bani Jahowa na laho pasirsirhon sipanganon bani kaluargani?

⁸ Dong ope tantangan na legan bani si Noak, ai ma pasirsirhon haporluan ni kaluargani. Sanggah lape roh Bah na Sumbang, sunsah tumang do halak mansarihon sipanganon. Sonai homa do si Noak. (1 Mus. 5:28, 29) Tapi sedo ai na lalab ipingkirhon si Noak, mangidangi Jahowa do na siporlunan ibagas goluhni. Hassi pe ia sibuk tumang laho pajongjongkon parau ai, ra do dokahni 40 atap 50 tahun, tapi tongtong do ia mangidangi Jahowa. Anjaha 350 tahun dob salpu Bah na Sumbang, totap do ia setia bani Jahowa. (1 Mus. 9:28) Siusihan na dear do si Noak on!

9, 10. (a) Sonaha hita boi totap unduk janah porsaya bani Naibata songon si Noak? (b) Aha do pasu-pasu-Ni anggo hita mandalankon aturan ni Jahowa?

⁹ Sonaha hita boi totap unduk janah porsaya bani Naibata songon si Noak? Dalankon hita ma aturan ni Jahowa, anjaha bahen ma ai na gabe siporlunan ibagas goluhta. Hita pe lang ra mangusihi parlahou na jahat humbani dunia on. (Mat. 6:33; Joh. 15:19) Tapi ra do halani ai, gabe ihasogamkon halak hita. Umpamani, halani lang ra hita mangkorjahon na butak songon dunia on, tapi unduk bani aturan ni Jahowa pasal parhajabuan, on ma na mambahen hita gabe ipabajan-bajan halak. (Basa Maleaki 3:17, 18.) Hassi pe sonai, usih songon si Noak, ulang ma hita mabiar bani sidea. Tapi pilih hita ma pamalaskon uhur ni Jahowa, anjaha hormat hu Bani. Halani pitah Ia do na boi mambere hita hagoluhan sadokah ni dokahni.​—Luk. 12:4, 5.

¹⁰ Rimangi ma, ‘Ai totap do huhorjahon harosuh ni Jahowa hassi pe buei halak na masogam hubangku? Halani sunsah do pargoluhan sonari on, ai porsaya do ahu sai pasirsiron ni Jahowa haporluannami sakaluarga?’ Anggo porsaya nasiam bani Jahowa janah unduk hu Bani songon si Noak, pos ma uhurmu sai bereon-Ni do ganup haporluan ni nasiam.​—Pil. 4:6, 7.

11. Tantangan aha do na iahapkon si Daniel pakon tolu hasomanni i huta Babel? (Tonggor ma gambar bani alm. 3.)

¹¹ Tantangan aha do na iahapkon si Daniel? Iboban do si Daniel hu huta Babel. Ijai bahat do halak na mangkorjahon hadatuon ampa na manombah gana-gana. Halak Babel pe lang marosuh bani halak Jahudi, janah gatih do ipabajan-bajan sidea Naibata Jahowa. (Ps. 137:1, 3) Tontu borit tumang ma uhur ni si Daniel pakon halak Jahudi na mangkaholongi Jahowa! Si Daniel pakon tolu hasomanni ai ma si Hananya, si Misael, pakon si Asarya, ilatih do  homa sidea ase marhorja i pamarentahan Babel. Lang pitah ai, ibere do homa bani sidea sipanganon ni raja, ai ma sipanganon na ilarang Naibata bani juakjuak-Ni. Hassi pe sonai, lang ra si Daniel ‘pabutakkon dirini marhitei sipanganon ni raja ai’.​—Dan. 1:5-8, 14-17.

12. (a) Sonaha do sifat ni si Daniel? (b) Sonaha do pangahap ni Jahowa bani si Daniel?

¹² Dong ope tantangan na legan bani si Daniel. Halani pandei do ia, bahat do tugas na ponting na ibere raja hu bani. (Dan. 1:19, 20) Hassi pe sonai totap do ia martoruh ni uhur, anjaha seng ongga marpangahap pitah pandapotni do na sintong. Tapi ihatahonni do, ganupan na boi ibahenni ai halani pangurupion ni Jahowa do. (Dan. 2:30) Rimangi ma: Ihatahon Jahowa do anggo si Daniel, halak na martenger ni uhur usih songon si Noak ampa si Job. Hape bani panorang ai, si Noak pakon si Job domma dokah matei, anjaha setia sadokah goluhni. Tapi anggo si Daniel, poso ope ijia. Hassi pe sonai, porsaya do Jahowa anggo si Daniel totap do holi marhaporsayaon hu Bani sadokah goluhni! Tongon do sonai. Sanggah si Daniel marumur hira-hira 100 tahun, ihatahon malekat ni Jahowa ma hu bani, “Ale Daniel, na hinaholongan.”​—Dan. 10:11.

13. Mase iurupi Jahowa si Daniel ase boi gabe pejabat?

¹³ Halani pangurupion ni Jahowa do ase si Daniel boi gabe pejabat ibagas Pamarentahan Babel, ampa Harajaon Madai-Persia. (Dan. 1:21; 6:2, 3) Ra do ibahen Jahowa sonai ase si Daniel boi mangurupi juakjuak-Ni, songon na ongga ibahen Jahowa bani si Josep i tanoh Masir ampa si Ester pakon si Mordekai i Persia. * (Dan. 2:48) Ai ongga do ibayangkon nasiam sonaha pangahap ni si Hesekiel pakon halak Jahudi na legan mangidah Jahowa mangurupi sidea marhitei si Daniel? Tontu gabe toguh ma uhur ni sidea.

14, 15. (a) Songon si Daniel, tantangan aha do na iahapkon hita sonari on? (b) Sonaha do namatoras sonari on boi mangusihi namatoras ni si Daniel?

¹⁴ Sonaha hita boi totap unduk janah  porsaya bani Naibata songon si Daniel? Bahat do halak sonari on na marparlahou na sambor. Sidea pe domma ipakahou ugama na ladung na igambarhon songon Babel na Bolon, “ianan ni setan-setan”. (Pangk. 18:2) Maningon legan ma hita humbani sidea. Tapi ra do halani ai, gabe ipabajan-bajan halak na legan ma hita. (Mrk. 13:13) Hassi pe sonai, usihi hita ma si Daniel. Patoguh hita ma parhasomananta pakon Jahowa. Anggo martoruh ni uhur hita, porsaya bani Jahowa, anjaha mandalankon harosuh-Ni, gabe iharosuhkon Naibata ma hita.​—Hag. 2:7.

¹⁵ Namatoras pe boi do marlajar humbani namatoras ni si Daniel. Sanggah etek ope si Daniel i tanoh Juda, bahat do halak na jahat parlahouni. Tapi si Daniel, holong do ia bani Naibata. Tontu halani iajari namatorasni do ia ase boi sonai. (Pod. 22:6) Artini goran ni si Daniel ai ma, “Naibata do Sipanguhum Bangku”. On patuduhkon holong do namatoras ni si Daniel bani Jahowa. Halani ai, ulang ma marnaloja namatoras mangajari niombahni pasal Jahowa. (Ep. 6:4) Martonggo ma rap pakon sidea, janah tonggohon nasiam ma homa sidea. Anggo marusaha nasiam mangajari pasal aturan ni Jahowa bani sidea, sai pasu-pasuon ni Jahowa ma nasiam.​—Ps. 37:5.

16, 17. Tantangan aha do na iahapkon si Job?

¹⁶ Tantangan aha do na iahapkon si Job? Bahat tumang do sitaronon ni si Job. Mungkahni “ia do sisangapan humbani haganup halak na i hapoltakan”. (Job 1:3) Bayak tumang do ia janah ihormati buei halak. (Job 29:7-16) Hassi pe sonai, lang gijang uhurni anjaha unduk do ia bani parentah ni Jahowa. Ai ma ase ihatahon Jahowa do ia “juakjuak-Ku”. Anjaha ihatahon-Ni do use anggo si Job ai halak na “pintor, mabiar mangidah Naibata, anjaha ipadaoh do uhurni humbani hajahaton”.​—Job 1:8.

¹⁷ Sompong ma mubah haganupan. Bois ma haganupan na dong bani si Job. Halani ai gabe mandolei ma si Job. Ibotoh hita, Sibolis do na mambahen si Job ai marsitaronon. Ihatahon Sibolis do homa anggo si Job ai ra mangidangi Naibata, halani sihol mandapot pasu-pasu dassa. (Basa Job 1:9, 10.) Halani ai, ibere Jahowa ma panorang laho patuduhkon parladung do Sibolis ai. Anjaha si Job pe boi patuduhkon anggo ia mangidangi Naibata halani holong do.

18. (a) Aha do na iparlajari ham humbani si Job? (b) Humbani na masa bani si Job, parlajaran aha na idapot hita pasal Jahowa?

¹⁸ Bahat tumang do sitaronon na ibahen Sibolis bani si Job. Marusaha do Sibolis ase si Job ai marpangahap humbani Naibata do ganupan sitarononni. (Job 1:13-21) Dob ai, ihatahon tolu hasoman ni si Job do homa anggo sitarononni ai humbani Naibata. (Job 2:11; 22:1, 5-10) Hassi pe sonai, totap do si Job porsaya bani Jahowa. Sipata lepak-lepak do si Job marsahap. (Job 6:1-3) Tapi iarusi Jahowa do ai,  halani na pusok tumang do uhurni ase sonai parsahapni. Ididah Jahowa do anggo si Job totap do martenger ni uhur hassi pe bahat sitarononni. Halani ai, ipasu-pasu Jahowa do si Job. Ibere ma use dua hali lompit artani na dob bois ai, anjaha manggoluh ope ia ronsi 140 tahun nari. (Jak. 5:11) Sadokah goluhni, totap do ia mangidangi Jahowa humbani gok ni uhurni. On ibotoh hita humbani ayat tema bani artikel on, ai ma Hesekiel 14:14. Ayat on isuratkon marratus tahun dobkonsi matei si Job.

19, 20. (a) Sonaha hita boi totap unduk janah porsaya bani Naibata songon si Job? (b) Songon Jahowa, sonaha do hita boi patuduhkon holong atap idop ni uhur bani halak na legan?

¹⁹ Sonaha hita boi totap unduk janah porsaya bani Naibata songon si Job? Lang soal aha na masa, maningon Jahowa ma na siporlunan ibagas goluhta. Maningon porsaya ma hita hu Bani janah unduk humbani gok ni uhurta. Sasintongni bahatan do pangarusionta sonari on marimbangkon si Job ijia, anjaha ai do na mangurupi hita ase lambin martenger ni uhur bani Jahowa. Umpamani, domma ibotoh hita ise do Sibolis ai anjaha sonaha do tirangkapni. (2 Kor. 2:11) Humbani buku Job, ibotoh hita do mase ipaturut Jahowa hita marsitaronon. Humbani buku Daniel, ibotoh hita do homa tongon-tongon do adong Harajaon ni Naibata ai, anjaha Jesus do rajani. (Dan. 7:13, 14) Harajaon ai ma na laho manrajai tanoh on janah manasap ganup sitaronon.

²⁰ Humbani na masa bani si Job, hita sihol marlajar ase patuduhkon idop ni uhur atap pe holong bani sanina-botounta na marsitaronon. (Par. 7:7) Porini lepak-lepak pe sidea marsahap, ulang mintor legan-legan pingkiranta, atap ulang gabe isalahkon hita sidea. Tapi marusaha ma hita patuduhkon uhur na sapangahapan. Anggo sonai ibahen hita, artini itiru hita do holong atap idop ni uhur ni Jahowa.​—Ps. 103:8.

21. Mase na ihatahon bani 1 Petrus 5:10 sosok bani si Noak, si Daniel, pakon si Job?

²¹ Si Noak, si Daniel, pakon si Job, lang sarupa masa ni sidea manggoluh anjaha lang sarupa homa situasini. Hassi pe sonai, boi do sidea totap martahan hassi pe bahat parlajouan. Mase? Halani songon na ihatahon si Petrus, “Pauli-ulion-Ni, patotapon-Ni, pargogohan-Ni anjaha pajonamon-Ni do nasiam, dob manaron nasiam tongkin.”​—1 Ptr. 5:10.

22. Aha do na laho iulas hita bani artikel na mangihut?

²² Na ihatahon bani 1 Petrus 5:10 sosok do ai homa bani juakjuak ni Naibata sonari on. Ipargogohi anjaha iurupi Jahowa do hita ase totap setia hu Bani. Halani ai, totap ma hita porsaya janah unduk hubani Jahowa songon si Noak, si Daniel, pakon si Job. Bani artikel na mangihut ulas hita ma use sonaha do sidea boi totap porsaya bani Jahowa halani domma mananda Ia. Ihatahon do anggo sidea, ‘mangarusi haganupan’ parentah ni Jahowa. (Pod. 28:5) Hita pe boi do homa sonai.