Lang tongon ai. Lang dong ihatahon sonai bani Bibel atap pe bani buku sejarah na ija pe ai.

Anggo ipardiateihon hita piga-piga terjemahan Bibel na legan, gabe songon na sintong do anggo bani abad na parlobei dong halak na ididi laho mangkopkop halak na dob matei. Umpamani dong terjemahan na mangkatahon, “Anggo lang adong parpuhoon, mase ma ra sidea ididi laho mangkopkop na matei?”​—Terjemahan Baru (Hinaluarhon LAI).

Tapi, pardiateihon ma na ihatahon dua pakar Alkitab on. Dr. Gregory Lockwood mangkatahon, “Lang ongga ibahen halak pandidion na sisonai. Anjaha bani Bibel pe lang dong ipatugah pandidion na sisonai.” Ai do homa na ihatahon Professor Gordon D. Fee. Nini do, “Bani Padan na Baru pe lang ongga ihatahon dong halak na mambahen pandidion laho mangkopkop na matei. Anjaha dobkonsi matei pe ganup apostel, lang ongga ibahen gareja pandidion na sisonai.”

Bani Bibel iparentahkon Jesus do susianni ase mamodahi sagala halak gabe susianni anjaha ididi. Iparentahkon do homa bani sidea ase mangurupi halak na legan laho mangkorjahon sagala na dob ititahkon ia. (Mat. 28:19, 20) Jadi paima ididi sasahalak, maningon iparlajari sidea do lobei pasal Jahowa ampa Jesus. Dob ai, maningon porsaya anjaha unduk do homa sidea hubani Jahowa pakon Jesus. Tontu lang boi halak na matei mangkorjahon ai. Anjaha lang mungkin homa halak na manggoluh mangkorjahon ai hubani sidea.​—Par. 9:5, 10; Joh. 4:1; 1 Kor. 1:14-16.

Jadi, aha ma maksud ni si Paulus sanggah mangkatahon ai?

Sanggah ai, dong piga-piga halak i Korint na mangkatahon lang adong parpuhoon ai. (1 Kor. 15:12) Jadi ipatuduh si Paulus ma salah do pandapot ni sidea. Sonaha carani? Ipatorang ia ma bahat do parmaraan na itaron ia janah ‘narus-narus matei do ia ganup ari’. Ra do ia manaron sisonai halani porsaya ipapuho do holi ia hu surga songon na dob masa bani Jesus.​—1 Kor. 15:30-32, 42-44.

Maningon iarusi halak i Korint do anggo halak Kristen na iminaki maningon do manaron bahat parmaraan janah matei ase boi ipapuho. Sanggah sidea ihatahon “tardidi ibagas Kristus Jesus”, tardidi do homa sidea ibagas hamateanni. (Rom 6:3) Maksudni songon Jesus maningon bahat do homa sitaronon na iahapkon sidea, anjaha maningon matei do homa sidea ase boi ipapuho hu surga.

Dua tahun lobih dobkonsi Jesus ididi, ihatahon ia ma hubani dua apostelni, “Paridionnima do paridian siparidionkai.” (Mrk. 10:38, 39) Maksudni Jesus ijon, sedo na laho ididi use ia. Tapi ia sihol patugahkon, halani setia hubani Naibata ai do na mambahen ia gabe matei. Ihatahon si Paulus do homa, ‘Anggo hasoman ni Jesus hita manaron, gabe hasomanni ma holi hita ibagas hasangapon.’ (Rom 8:16, 17; 2 Kor. 4:17) Halani ai maningon matei do homa sidea songon Jesus ase boi ipapuho hu surga.

Halani ai, on do sasintongni na ihatahon si Paulus ai, “Anggo lang ipapuho halak na matei, aha ma na masa bani halak na tardidi na gabe matei? Mase ma ididi sidea ase gabe halak na matei?”