1-2. Sonaha hita boi mandalankon aha na isurat bani Podah 4:25? Bere ma contoh.

PARDIATEIHON ma tolu contoh on. Dong sada botou, malas uhurni mardingat sanggah poso ope ia. Hassi pe sonari bahat tantanganni, tapi marusaha do ia mambahen na sidearan ibagas pangidangion. (1 Kor. 15:58) Bai ganup ari, ibayangkon ia do malas uhurni rap pakon na hinaholonganni i Paradeiso. Botou na legan mardingat ongga do ibahen hasoman i kuria borit uhurni. Tapi marusaha do ia ase ulang lalab mardingat ai. (Kol. 3:13) Dong homa sada sanina na mardingat hasalahanni na hinan. Tapi marusaha do ia ase boi totap setia mangidangi Jahowa.​—Ps. 51:12.

² Aha ma na sarupa humbani sidea na tolu ai? Idingat sidea do aha na dob salpu. Tapi lang lalab ai na ipingkiri sidea. Marusaha do sidea ‘mangkawah dompak lobei’.​—Basa Podah 4:25.

3. Mase ponting totap ‘mangkawah dompak lobei’?

³ Sasada halak lang boi mardalan pintor dompak lobei anggo lalab ia mangkawah dompak pudi. Sonai ma homa hita, lang boi ringgas hita mangidangi Jahowa anggo lalab ipingkiri hita aha na dob salpu.​—Luk. 9:62.

4. Aha ma na laho iulas hita bani artikel on?

⁴ Bani artikel on holi iulas hita ma dong tolu na mambahen hita lalab mardingat na salpu, ai ma: (1) hasonangan na hinan, (2) borit ni uhur, ampa (3) hasalahan na ibahen hita. Holi iulas hita ma sonaha prinsip ni Bibel boi mangurupi hita ase ulang lalab mangidah “na i pudi”, tapi totap mangidah “na i lobei”.​—Pil. 3:13.

5. Domu bani Parambilan 7:10, aha ma na lang boi ihatahon hita?

⁵ Basa Parambilan 7:10. Bani ayat ai lang dong ihatahon salah do anggo isungkun hita, “Mase dear sapari?” Dear do anggo idingat hita aha na masa sapari, halani sibere-bere humbani Jahowa do ai. Tapi pardiateihon ma ijai isurat, “Ulang hatahon, ‘Mase ma dearan ari sapari humbani sisonari?’” Artini ulang ibandingkon hita hagoluhanta sapari pakon sonari on, janah mangahap sambor do na masa sonari on.

6. Mase lang dear anggo lalab idingat hita sonaha sonangni goluhta hinan? Bere ma contoh.

⁶ Mase lang dear anggo lalab idingat hita sonaha sonangni goluhta hinan? Halani gabe sonangni ai ma dassa na idingat hita, hape gabe lupa ma hita dong do homa sitarononta sanggah ai. Pardiateihon ma contoh halak Israel na hinan. Dob itadingkon sidea tanoh Masir, mintor podas do ihalupahon sidea sonaha marsikni hagoluhan ni sidea ijai. Lalab do idingat sidea sipanganon ijai. Ihatahon sidea ma, “Idingat hanami do dengke na pinangannami i tanoh Masir, lang pala marboli, sonai age ansimun, hondi, lowoh, bawang sigerger pakon hosaya-hosaya.” (4 Mus. 11:5) Tapi, tongon do ‘lang marpamboli’ sipanganon ai? Lang. Sasintongni, mahal tumang do arga na igalar sidea bani sipanganon ai. Sanggah ai iparjabolon do sidea i Masir. (2 Mus. 1:13, 14; 3:6-9) Tapi mintor lupa ma sidea sonaha sidea iarsik-arsik ijai. Lalab do idingat sidea hasonangan na hinan marimbangkon aha na dob ibere Jahowa hubani sidea. Halani ai gabe manggila ma Jahowa bani sidea.​—4 Mus. 11:10.

7. Aha ma na mangurupi sada botou ase lang lalab mardingat na dob salpu?

⁷ Sonaha ase lang lalab idingat hita aha na dob salpu? Pardiateihon ma contoh humbani sada botou na mangidangi i Betel Brooklyn humbani tahun 1945. Dob piga-piga tahun, marhajabuan ma ia  pakon sada sanina na mangidangi homa i Betel. Anjaha rap mangidangi ma sidea sadokah martahun-tahun. Tapi bani tahun 1976 boritan ma suamini ai. Ia mangkatahon ibotoh suamini do matei mando ia. Jadi paima matei, ihatahon ia ma bani istrini, ‘Martuah tumang do iahap hita sadokah hita marhajabuan. Bahat do halak na lang boi mangahapkon na sisonai. Tontu lang boi ihalupahon ham aha na dob idalani hita sadokah on. Tapi ulang ma lalab idingat ham ai. Dokah-dokah, salpu do holi pusok ni uhurmu ai. Halani ai marmalas ni uhur ma ham mardingat pasu-pasu na ibere Jahowa sadokah hita na dua mangidangi-Si.’ Jenges tumang podah ni suamini ai!

8. Aha ma gunani podah ni suamini bani botou ai?

⁸ Idalankon botou ai ma podahni suamini. Totap do botou ai setia mangidangi Jahowa ronsi matei ia sanggah marumur 92 tahun. Piga-piga tahun paima matei, ihatahon ia do, “Anggo hudingat use sadokah 63 tahun ahu mangidangi Jahowa ibagas dinas sepenuh waktu, martuah tumang do huahap goluhku.” Mase? Ia patorangkon, “Martuah do hita halani bahat sanina botounta i sab dunia on. Janah marpangarapan do hita boi manggoluh sadokah ni dokahni pakon sidea i Paradeiso. Ijai ma holi hita boi mangidangi Jahowa sadokah ni dokahni.” * Songon botou ai, totap ma idingat hita janji ni Jahowa pasal ari simagira!

9. Domu bani 3 Musa 19:18, sanggah attigan do iahap hita lang urah manalpuhon hasalahan ni halak?

⁹ Basa 3 Musa 19:18. Anggo dong hasoman, sanina botou i kuria, atap kaluarganta na mambahen borit uhurta, ra do lang urah iahap hita laho manalpuhon hasalahanni. Umpamani, dong sada botou  na ituduh manangko duit ni hasoman i kuria. Ujungni, mangindo maaf do hasomanni ai. Tapi halani borit tumang uhurni, lalab ma idingat ia hasalahan ni hasomanni ai. Ongga do homa iahapkon ham na sisonai? Ra do lang sonai situasinta. Tapi bahat do hita na mangahap lang urah ihalupahon hita hasalahan ni halak na mambahen borit uhurta.

10. Sonaha ase ulang lalab marborit ni uhur hita?

¹⁰ Aha do na boi mangurupi hita ase ulang lalab marborit ni uhur? Dingat ma, talar do ganupan i lobei ni Jahowa. Jadi sanggah borit uhurta halani dong na mambahen na lang adil hubanta, ibotoh Ia do ai. (Heb. 4:13) Pusok do uhurni sanggah sunsah hita. (Sak. 2:12) Anjaha marjanji do Ia, sasapon-Ni do holi aha pe na mambahen hita marsitaronon.​—Pangk. 21:3, 4.

11. Aha do gunani anggo lang lalab marborit ni uhur hita?

¹¹ Leganni ai, gabe lumbang do pangahapta anggo lang idingat-dingat hita borit ni uhurta. Ai do homa na iahapkon botou na ituduh manangko nongkan ai. Ujungni, isalpuhon ia ma hasalahan ni hasomanni ai. Maningon sonai do ibahen ia ase isalpuhon Jahowa homa hasalahanni. (Mat. 6:14) Ibotoh ia salah do pambahenan ni hasomanni ai hu bani. Tapi lang ra ia lalab mardingat ai. Hasilni, gabe marmalas ni uhur ma ia janah boi ma ia totap ringgas mangidangi Jahowa.

12. Aha ma na boi iparlajari hita humbani 1 Johannes 3:19, 20?

¹² Basa 1 Johannes 3:19, 20. Sipata, ra do hita manolsoli diri. Umpamani, dong na manolsoli diri halani mambahen hasalahan paima marlajar Bibel ia. Dong homa na manolsoli diri halani mambahen hasalahan hassi pe domma ididi. (Rom 3:23) Tongon, ganup do hita sihol mangkorjahon na sintong. Tapi “ganup hita gati marsalah”. (Jak. 3:2; Rom 7:21-23) Hassi pe sunsah pangahapta halani manolsoli diri, sasintongni marguna do ai. Mase? Gabe marusaha ma hita manjaga parlahounta janah lang mangulaki hasalahan na sarupa.​—Heb. 12:12, 13.

13. Mase lang dear anggo hita lalab manolsoli diri?

¹³ Tapi, hassi pe domma mambahen hamubahon anjaha domma isalpuhon Jahowa hasalahanta, ra do lalab isolsoli hita dirinta. Anggo sonai bahaya do ai. (Ps. 31:11; 38:4, 5) Mase? Pardiateihon ma pangalaman ni sada botou na lalab manolsoli diri halani hasalahan na hinan. Ia mangkatahon, “Huahap lang dong gunani ringgas ahu mangidangi Jahowa halani lang talup ahu mandapot haluahon.” Ra, bahat do hita na mangahapkon sisonai. Tapi, gabe sonang ma uhur ni Sibolis mangidah soh hita mangidangi Jahowa. Hape holong tumang do uhur ni Naibata hubanta. Halani ai, marusaha ma hita ase ulang lalab manolsoli diri!​—Bandingkon 2 Korint 2:5-7, 11.

14. Hunja ibotoh hita anggo Jahowa ra manalpuhon hasalahanta?

¹⁴ Tapi ra do sungkun-sungkun ibagas uhurta, ‘Hunja ma hubotoh anggo Jahowa ra manalpuhon hasalahanku?’ Sasintongni anggo sonai pingkiranmu, on patuduhkon ra do Jahowa manalpuhon hasalahanmu. Marpuluh tahun na salpu bani The Watchtower dong ihatahon sonon, “Ra do marulak-ulak ibahen hita hasalahan na sarupa. Ra do sonai hita halani lape boi iubah hita parlahounta na  hurang dear. Tapi ulang ma maretek ni uhur ham. Ulang homa iahap ham anggo hasalahanmu ai lang tarsasap Jahowa. Gabe sonang ma Sibolis anggo sonai pingkiranmu. Sasintongni, sanggah pusok uhurmu halani domma mambahen hasalahan, ai patuduhkon halak na bujur do ham. Tontu ra do Jahowa manasap hasalahanmu ai. Halani ai, martoruh ni uhur ma ham mangindo hasasapan ni dousa bani Jahowa. Pindo ma ase iurupi ham mambahen hamubahon janah lang lalab manolsoli diri. Songon dakdanak, hassi pe gati ia mambahen masalah tapi sanggah mangindo pangurupion ia bani bapani, totap do bapani ai mangurupi ia. Sonai ma homa Jahowa, totap do iurupi Ia ham halani maidop do uhur-Ni bamu.”

15-16. Sonaha ma pangahap ni sanina botounta dob mangarusi ra do Jahowa manalpuhon hasalahan ni sidea?

¹⁵ Bahat do juakjuak ni Jahowa na tarapoh uhurni dob mambotoh ra do Naibata manalpuhon hasalahan ni sidea. Umpamani, piga-piga tahun na salpu dong sada sanina na tarapoh uhurni dob mambasa pangalaman ni sada botou i seri “Alkitab Mengubah Kehidupan”. Bani artikel ai botou ai mangkatahon lang mungkin Jahowa mangkaholongisi halani sambor parlahouni hinan. Sonai do lalab pangahapni hassi pe domma martahun-tahun ia ididi. Tapi, dob irimangi ia pasal tobusan ni Jesus, ujungni gabe porsaya ma ia holong do uhur ni Jahowa hu bani. *

¹⁶ Sonaha pangalaman ni botou ai boi mangojur saninanta on? Ia manurat, “Sanggah poso ope, gati huidah gambar porno. Janah gabe kecanduan ma ahu. Baru-baru on, huulakkon do homa mangidah gambar sisonai. Jadi hupindo ma pangurupion ni sintua janah hubahen ma hamubahon. Ipapos sintua ai ma uhurhu ihaholongi Jahowa do ahu janah ra do Ia manalpuhon hasalahanku. Tapi sipata totap do huahap lang maharga ahu, janah huahap lang mungkin holong Jahowa mangidah ahu. Tapi dob hubasa artikel  ai, gabe tarapoh ma uhurhu. Sonari huarusi ma anggo marpingkir ahu lang boi Jahowa manasap dousangku, dos do ai mangkatahon lang sungkup tobusan ni Jesus manggalar dousangku. Jadi husimpan ma artikel ai ase boi hubasa use sanggah maretek ni uhur ahu.”

17. Aha do na mambahen si Paulus lang lalab mardingat hasalahanni na hinan?

¹⁷ Sanggah ibasa hita pangalaman ni sanina botounta ai, gabe taringat ma hita bani pangalaman ni si Paulus. Paima gabe halak Kristen, sihorjahon na jahat hinan do ia. Janah idingat ia do aha na dob ibahenni. Tapi lang lalab ipingkiri ia ai. (1 Tim. 1:12-15) Porsaya do ia ra do Jahowa manasap hasalahanni halani domma ibere tobusan laho mangkopkop dirini. (Gal. 2:20) Jadi, lang ra ia mandolei jalani hasalahanni na hinan. Tapi marusaha do ia mambahen na sidearan ibagas pangidangion.

18. Aha do na domma iulas hita bani artikel on?

¹⁸ Aha do na domma iulas hita bani artikel on? (1) Pasu-pasu humbani Jahowa do aha pe na madear na iahapkon hita hinan. Tapi, sonaha pe dearni ai, totap do dearan hagoluhanta bani ari simagira. (2) Ra do adong hasoman na mambahen borit uhurta. Tapi, anggo ra hita manalpuhon hasalahanni, gabe boi ma hita ringgas ibagas pangidangion. (3) Anggo lalab hita manolsoli diri, gabe lang marmalas ni uhur hita sanggah mangidangi Jahowa. Halani ai, songon si Paulus porsaya ma hita anggo Jahowa domma manalpuhon hasalahanta.

19. Mase pos uhurta sanggah i dunia baru lang be idingat-dingat hita hagoluhanta na salpu?

¹⁹ Sanggah i dunia na baru, lang be idingat hita aha pe na ongga mambahen hita marpusok ni uhur. Songon na ihatahon Bibel, “Seng be ingaton na parlobei in.” (Jes. 65:17) Hassi pe sonari dong do hita na matua, tapi i dunia baru mulak poso do use hita. (Job 33:25) Halani ai, ulang ma lalab idingat-dingat hita hagoluhan na dob salpu. Tapi marusaha ma hita mangkawah dompak lobei, janah bahen ma na sidearan ase boi manggoluh i dunia na baru!