1. Domu bani Mateus 28:18-20, parentah aha ma na ibere Jesus hubani susianni?

DOBKONSI ipapuho Jesus, mintor laho ma ia manjumpahi susianni i Galilea. Dong na ponting na laho ipatugah ia bani sidea. Aha ma ai? Isuratkon do ai bani Mateus 28:18-20.​—Basa.

2. Sungkun-sungkun aha ma na laho iulas hita?

² Marlaku do homa parentah ni Jesus ai hubanta sonari on. Bani artikel on iulas hita ma tolu sungkun-sungkun na dong kaitanni pakon parentah ni Jesus ai. Na parlobei, aha ope na porlu ibahen hita dobkonsi iajarhon hita pasal harosuh ni Naibata bani parlajar Bibelta? Na paduahon, sonaha ganup halak i kuria boi mangurupi sahalak parlajar Bibel mambahen hamajuon? Na patoluhon, sonaha hita mangurupi halak na lang aktif ase marbarita use?

3. Aha ma na porlu idingat hita humbani titah ni Jesus ai?

³ Humbani parentah ni Jesus, tangkas ma isuruh do hita mangajarhon sagala na iparentahkon ia. Tapi pardiateihon hita use na ihatahon Jesus ai. Lang dong ihatahon ia, ‘Ajarhon ma bani sidea sagala na dob hutitahkon bennima.’ Tapi ihatahon ia do, “Ajari hanima ma sidea mangkorjahon sagala na dob hutitahkon bennima.” Jadi lang sungkup mangajarhon parentah ni Jesus bani sidea. Tapi  maningon ipatorang do sonaha mandalankon ai. (Lah. 8:31) Mase sonai?

4. Aha do artini mangkorjahon sada parentah? Bahen ma limbagani.

⁴ “Mangkorjahon” sada parentah dos do artini unduk bani parentah ai. Ase iarusi hita sonaha hita boi mangurupi halak mangkorjahon parentah ni Jesus, rimangi ma limbaga on: Dong sasahalak na sihol mangajari halak na legan mamboan motor. Tapi paima iajari ia halak ai mamboan motor, maningon iajarhon ma lobei pasal aturan lalu lintas hu bani. Dobkonsi ai, dong ope na porlu ibahen guruni. Maningon ipraktekkon sidea ma ai i dalan. Jadi sanggah muridni ai mamboan motor, boi ma ipatuduh guruni sonaha ia mangihutkon aturan lalu lintas ai. Aha ma na boi iparlajari hita hunjai?

5. (a) Domu bani Johannes 14:15 pakon 1 Johannes 2:3, aha ope na porlu iajarhon hita hubani parlajar Bibelta? (b) Patuduh ma sada contoh sonaha hita boi mangurupi parlajar Bibelta.

⁵ Sanggah hita mangajari sasahalak, tontu iajari hita do pasal harosuh ni Jahowa bani sidea. Tapi lang sungkup pitah ai. Maningon ipatuduh hita do sonaha mandalankon parlajaran ai. (Basa Johannes 14:15; 1 Johannes 2:3.) Ajarhon ma sonaha mandalankon prinsip ni Bibel i parhorjaan, i sikolah, atap pe sanggah mardalani. Boi do homa isaritahon hita aha do gunani sanggah idalankon hita prinsip ni Bibel. Umpamani, gabe ilinggomi ma hita janah boi mambahen haputusan na dear. Leganni ai, sanggah martonggo nasiam pakonsi, pindo ma ase iurupi Jahowa ia marhitei tonduy na pansing.​—Joh. 16:13.

6. Aha ope na porlu ibahen hita laho mangurupi halak mandalankon titah ni Jesus?

⁶ Aha ope na porlu ibahen hita laho mangurupi halak mandalankon titah ni Jesus? Maningon iurupi hita do homa parlajar Bibelta ase ra mansaritahon na iparlajarisi hubani na legan. Dong do ra parlajar Bibel na mabiar marbarita. Halani ai maningon sabar ma hita mangurupi sidea laho mangarusi hasintongan ni Bibel. Anggo domma hona parlajaran ai hubagas uhurni, gabe tarojur ma ia marbarita. Sonaha hita boi mangurupi parlajar Bibelta ase ra marbarita?

7. Sonaha hita boi mangurupi parlajar Bibelta ase ra mansaritahon na iparlajarisi hubani na legan?

⁷ Boi do isungkun ham hubani parlajar Bibelmu sonon, “Aha do gunani bamu dob idalankon ham prinsip ni Bibel? Pandapotmu, ai porlu do homa halak na legan manangar barita on? Sonaha ibahen ham laho mangurupi sidea?” (Pod. 3:27; Mat. 9:37, 38) Dob ai, patuduh ma risalah na dong bani Alat laho Mangajarhon Bibel hu bani. Sungkun ma ia hira-hira topik na ija do na iharosuhkon kaluarga atap hasomanni. Dob ai, bere ma piga-piga risalah ai hu bani anjaha ajari ma ia sonaha cara na dear mambagihon risalah ai. Anggo ia domma gabe parbarita na lape ididi, tontu sihol do uhurta mangkasomanisi laho marbarita.​—Par. 4:9, 10; Luk. 6:40.

8. Mase maningon iurupi hita parlajar Bibelta mangkaholongi Naibata ampa hasoman jolma? (Tonggor ma kotak “ Mangurupi Parlajar Bibel ase Mangkaholongi Naibata”.)

⁸ Dingat ma, iparentahkon Jesus do hita laho mangurupi halak “mangkorjahon sagala” na dob ititahkon ia. Na  tarmasuk hubani titahni ai, ai ma dua parentah na sibanggalan—mangkaholongi Jahowa ampa mangkaholongi hasoman jolma. Markaitan do parentah ai pakon horja parambilanon. (Mat. 22:37-39) Aha ma kaitanni? Holong hubani Jahowa ampa hubani hasoman jolma do na mambahen sasahalak ra marbarita. Tapi ra do adong parlajar Bibel na mabiar sanggah marbarita. Halani ai, papos ma uhurni anggo Jahowa tongtong do mangurupisi. Hatahon ma dokah-dokah lang be mabiar ia holi. (Ps. 18:2-4; Pod. 29:25) Bani kotak na dong bani artikel on, iulas do ijai aha na porlu ibahen hita laho mangurupisi ase lambin banggal holongni bani Jahowa. Leganni ai, porlu do homa halak i kuria mangurupi parlajar Bibel ai. Sonaha carani?

9. Songon na ipatugah bani limbaga pasal mangajari halak marmotor, naha use ibahen guru ai laho mangajari muridni?

⁹ Pardiateihon ma use limbaga pasal sada guru na mangajari halak mamboan motor. Sonaha use ibahen ia laho mangajari muridni ai? Sanggah ilatih ia muridni ai mamboan motor i dalan, tontu isuruh ia do ase muridni ai mampardiateihon supir na legan. Umpamani, ipatuduh ia ma bani muridni dong supir na paturutkon motor na legan manlopusi ia. Dong homa supir na pamateihon lampu jauhni ase ulang targanggu supir na legan. Anggo ipardiateihon muridni ganupan ai, tontu boi ma iihutkon ia ai sanggah mamboan motor.

10. Aha do na boi mangurupi parlajar Bibelta mambahen hamajuon?

¹⁰ Sobali marlajar humbani guruni, parlajar Bibelta pe boi marlajar humbani sanina botou i kuria. Aha do na boi mangurupi sidea mambahen hamajuon? Maningon roh do sidea hu partumpuanta. Anggo martumpu sidea, lambin bahat ma na iparlajari sidea pasal Bibel. Gabe lambin toguh ma haporsayaon ampa holongni hubani Jahowa. (Lah. 15:30-32) Jadi sanggah i partumpuan, arahkon ma ia ase marsitandaan pakon sanina botou na sarupa pangalaman atap tantanganni pakonsi. Aha ma holi na boi iparlajari sidea humbani sanina botou? Pardiateihon hita ma contoh on.

11. Aha do ra na ipardiateihon parlajar Bibel i Balei Harajaon, janah aha ma pengaruhni ai hu bani?

¹¹ Umpamani, gabe tarojur ma parlajar Bibelta na dob mabalu, sanggah ididah ia dong botounta na mabalu homa, marusaha mamboan dakdanakni hu Balei Harajaon. Anjaha ra do adong parlajar Bibel na sunsah maronti mangissop. Pajumpah ma ia pakon sanina na pangissop hinan. Isaritahon sanina ai ma hu bani, halani lambin banggal holongni hubani Jahowa, gabe tarojur ma ia mangkorjahon titah-Ni. Ai ma na mangurupi ia maronti mangissop. (2 Kor. 7:1; Pil. 4:13) Ihatahon sanina ai ma bani parlajar Bibel ai anggo ia pe boi mangkorjahon ai. Leganni ai, dong parlajar Bibel na poso ope janah ididah ia ma sahalak Saksi na poso na marmalas ni uhur. Jadi, gabe sihol ma uhurni mambotoh aha do na mambahen ia marmalas ni uhur.

12. Mase ganup halak i kuria boi mangurupi sahalak parlajar Bibel?

¹² Anggo itanda sahalak parlajar Bibel sanina botou na gabe siusihan i kuria, gabe iarusi ia ma sonaha mangkaholongi Naibata ampa hasoman jolma songon na do ititahkon Jesus. (Joh. 13:35; 1 Tim. 4:12) Songon na dob iulas nongkan ai,  sidea boi marlajar humbani sanina botou na sarupa tantanganni pakonsi. Hunjai, gabe iarusi sidea ma parubahan aha do na porlu ibahen ase boi gabe susian ni Jesus. (5 Mus. 30:11) Jadi, ganup do sanina botou i kuria boi mangurupi parlajar Bibel mambahen hamajuon. (Mat. 5:16) Aha ma na domma ibahen nasiam sanggah dong parlajar Bibel na roh hu partumpuan?

13-14. Aha ma na ibahen Jesus hassi pe domma itadingkon susianni ia?

¹³ Sihol do homa hita mangurupi hasomanta na lang aktif ase dihut use marbarita. Pardiateihon hita ma sonaha Jesus mangurupi apostelni na maretek ni uhur.

¹⁴ Bani borngin paima Jesus ibunuh, “ganup ma [apostelni] manadingkonsi lanjar maporus”. (Mrk. 14:50; Joh. 16:32) Sonaha ma pangahapni sanggah sonai pambahenan ni susianni ai? Dob ipapuho, ipatuduh ia ma dirini hubani piga-piga susianni, janah ihatahon ma, “Ulang nasiam mabiar, laho ma nasiam patugahkon bani susianku [anggo ahu domma ipapuho].” (Mat. 28:10a) Hassi pe domma itadingkon apostelni ia, tapi tong do ihira ia sidea ai “susianni”. Itiru Jesus do Jahowa. Marpangulaki do uhurni janah maridop ni uhur do ia hubani susianni.​—2 Raj. 13:23.

15. Sonaha ma pangahapta mangidah hasomanta na lang aktif?

¹⁵ Sonai homa hita, maningon iurupi hita do hasomanta na lang aktif. Hassi pe lang aktif, totap do sidea ai hasomanta sahaporsayaon, janah holong do uhurta bani sidea. Dingat hita ma haringgason ni sidea hinan sanggah mangidangi Jahowa. Ra do adong na domma marpuluh tahun mangidangi Jahowa. (Heb. 6:10) Tontu sihol tumang uhurta bani sidea! (Luk. 15:4-7) Sonaha ma hita maniru Jesus sanggah mangurupi sidea?

16. Sonaha hita boi mangurupi sanina botou na lang aktif?

¹⁶ Ontang ma sidea hu partumpuan. Dingat ma iarahkon Jesus do susianni na maretek ni uhur ai martumpu hu sada ianan. (Mat. 28:10b; 1 Kor. 15:6) Tontu malas do uhurni Jesus sanggah roh susianni hujai. Jadi, ontang hita ma homa hasomanta na lang aktif hu partumpuan. Ra, maningon piga-piga hali do iontang hita sidea ase ra martumpu. Tontu malas uhurta anggo martumpu sidea.​—Bandingkon Mateus 28:16 pakon Lukas 15:6.

17. Sonaha ibahen hita sanggah dong hasomanta na lang aktif roh hu partumpuan?

¹⁷ Alo-alo ma ia. Sanggah pajumpah pakon susianni, mintor idohori Jesus do sidea janah iparsahapkon. (Mat. 28:18) Aha ma na boi ibahen hita anggo dong hasomanta na lang aktif roh hu partumpuan? Alo-alo ma homa ia. Tapi jaga ma parsahapta ase ulang mambahen ia maila. Ra do lang ibotoh hita aha na laho sihatahonon. Anggo sonai, hatahon ma malas uhurmu halani roh ia martumpu.

18. Sonaha hita boi patoguhkon uhur ni hasoman na lang aktif?

¹⁸ Patoguh ma uhurni. Ra do ninuhur ni susian ni Jesus lang sanggup sidea mangkorjahon parentah ni Jesus laho marbarita hu sab dunia on. Tapi ipatoguh Jesus do sidea. Nini ma, “Sai na hasomananku do hanima ganup ari.” (Mat. 28:20) Aha ma hasilni? Gabe lambin ringgas do sidea  “mangajari ampa mangambilankon” barita na madear. (Lah. 5:42) Jadi, maningon ipatoguh hita do homa hasoman na lang aktif. Ra do mabiar sidea anggo isuruh marbarita. Halani ai, papos ma uhurni sirsir do hita mangkasomanisi sadihari pe ia sihol marbarita. Tontu malas uhurni sanggah ihasomani hita ia marbarita. Anggo marusaha hita mangurupi hasoman na lang aktif, ra do mulak use sidea hu kuria, janah gabe marmalas ni uhur ma ganup hita.

19. Aha ma na sihol bahenonta, janah mase?

¹⁹ Ronsi attigan do hita mangurupi halak gabe susian ni Jesus? Ronsi roh ujung ni dunia on. (Mat. 28:20; tonggor ma “Penutup zaman” bani Daftar Istilah.) Ai boi do hita mangkorjahon ai? Tontu boi do. Marosuh do hita mambere panorang ampa manggunahon aha na dong banta laho mangurupi “halak na marosuh manjalo hasintongan na parohkon hagoluhan sisadokah ni dokahni”. (Lah. 13:48, Terjemahan Dunia Baru) Ihatahon Jesus do, “Sipanganon do ai bangku, mangkorjahon rosuh ni na marsuruh ahu ampa mandobkon lahoan-Ni.” (Joh. 4:34; 17:4) Anggo ibahen hita sonai, dos do ai hita na maniru Jesus. Halani ai, sihol do homa hita mandobkon horja na dob ibere hubanta. (Joh. 20:21) Anjaha sihol do hita ase ganup hita tarmasuk na lang aktif, totap marbarita ronsi roh ujungni.​—Mat. 24:13.

20. Domu bani Pilippi 4:13, aha do na mangurupi hita mandobkon tugas na ibere Jesus hubanta?

²⁰ Bahat do tantangan na roh sanggah hita mandalankon parentah ni Jesus. Hassi pe sonai, lang ipaturut ia sahalakta mangkorjahon ai. Marjanji do Jesus sai hasomananni do hita. Sanggah iurupi hita na legan gabe susian ni Jesus, isobut do hita ‘hasoman sahorja ni Naibata’ ampa Jesus. (1 Kor. 3:9; 2 Kor. 2:17) Halani ai, boi do idobkon hita horja ai. Tontu malas tumang uhurta boi mangkorjahon ai, janah malas homa uhurta mangurupi na legan ase dihut bani horja ai!​—Basa Pilippi 4:13.