BANI NA MAPOSO
10: Boi Ihaporsayai
AHA DO ARTINI
Anggo na maposo mangihutkon aturan, topat bani janjini, anjaha tongtong mangkatahon na sintong, gabe boi ma sidea ihaporsayai. Halani ai, gabe pos ma uhur ni namatoras, hasoman, pakon na legan hu bani.
MASE PONTING ON
Somalni, anggo pos uhurni sasahalak bamu, gabe lambin bahat ma kebebasan na ibere bamu.
“Cara sidearan ase pos uhur ni namatoras hubanta, patuduh ma anggo hita domma dewasa janah martanggung jawab, lang soal ididah sidea hita atap lang.”—Si Sarahi.
BIBEL MANGKATAHON: “Pareksa nasiam ma diri nasiam.”—2 Korint 13:5.
NA BOI IBAHEN HANIMA
Anggo sihol hanima lambin ihaporsayai na legan, atap ase porsaya halak use bannima, coba hanima ma on.
Tongtong ma jujur. Anggo hanima mangoto-otoi, gabe lang porsaya be halak bannima. Tapi anggo marusaha hanima jujur anjaha ra patugahkon hasalahan, lambin porsaya ma halak bannima.
“Urah do hita jujur anggo dear mardalan ganup. Na payah, anggo hita maningon mangaku salah. Tapi anggo ibahen hita sonai, lambin porsaya ma halak hubanta.”—Si Caiman.
BIBEL MANGKATAHON: “Ihaporluhon hanami marparlahou na [jujur] ibagas haganup.”—Heber 13:18.
Martanggung jawab. Dong sada survei na ibahen i Amerika Serikat. Ihatahon do sanggah mamilih parhorja rosuhan do perusahaan mamilih halak na martanggung jawab. Jadi anggo humbani sonari marusaha hanima gabe halak na martanggung jawab, ronsi magodang iahapkon hanima ma holi gunani ai.
“Sanggah dear hudalankon tanggung jawabku i rumah, janah lang pala isuruh-suruh ahu mangkorjahon ai, ipardiateihon namatorasku do ai. Anggo tongtong hubahen sonai, lambin porsaya ma sidea bangku.”—Si Sarah.
BIBEL MANGKATAHON: “Tenger do uhurhu, sanggah na manurat on, balosanmu do na hupindohon, lobih tene humbani na huhatahon.”—Pilemon 21.
Sabar ma. Anggo tambah ganjangmu, boi do mintor ididah halak ai. Tapi lang mintor boi ididah halak sanggah lambin dewasa cara marpingkirnima.
“Maningon tongtong do hita marusaha ase porsaya namatorasta hubanta, sonai homa halak na legan. Tapi lang sungkup pitah sahali tumang ipatuduh hita anggo hita halak na martanggung jawab.”—Si Brandon.
BIBEL MANGKATAHON: “Pakei nasiam ma biak . . . lumbang ni uhur [atap, hasabaron].”—Kolosse 3:12.
