Manalpuhon hasalahan artini lang be idingat-dingat hita hasalahan ni halak janah lang be borit uhurta. Tapi sedo artini etek pangahapta hasalahanni ai, atap lang ongga masa na ibahenni ai

BIBEL MANGKATAHON: “Marsianju-anjuan anjaha marsisasapan dousa, anggo marpangkurangi uhur ni na sada dompak hasomanni.”​—Kolosse 3:13.

“Anggo holong uhurta bani sasahalak, tontu lang hahuranganni ai na sai ididah hita. Tapi sonaha ia marusaha ase boi lambin dear.”​—Si Aaron.

Anggo lalab borit uhurta, ra do gabe stress janah boritan hita. Leganni ai, ra do gabe sursar parhajabuanta.

“Ongga do suamiku mambahen hasalahan na mambahen borit tumang uhurhu. Sanggah mangindo maaf ia, lang mintor husalpuhon hasalahanni ai. Halani ai sompat do lang dear parhajabuannami. Ambit mintor husalpuhon hasalahanni ai, tontu lang sompat sonai na masa.”​—Si Julia.

PINGKIRHON MA ON

Anggo borit uhurmu holi ibahen pasanganmu, pingkirhon ma on:

• ‘Ai ahu do na urahtu marborit n uhur?’

• ‘Ai memang banggal do hasalahanni ai ase porlu humaafkon, atap boi do on mintor husalpuhon?’

RIAHKON MA PAKON PASANGANMU

• Somalni, piga dokah do hita marborit ni uhur paima mardear use?

• Aha ma na boi ibahen hita ase podas marsisasapan dousa?

COBA NASIAM MA ON

• Sanggah borit uhurta, ulang ma iagan hita na sengaja do pasanganta ai mambahen borit uhurta.

• Marusaha ma mangarusi pasanganta. Dingat ma ‘ganup do hita gati marsalah’.​—Jakobus 3:2.

“Urah do hita marsisasapan anggo haduasi hita marsalah. Tapi anggo pitah sada do, ai ma na lang urah. Maningon martoruh ni uhur ma hita ase boi manalpuhon hasalahanni”​—Si Kimberly.

BIBEL MANGKATAHON: “Podas ma ho mardear.”​—Mateus 5:25.