BANI NAMATORAS
7: Parlahou na Madear
AHA DO ARTINI
Ponting tumang do iajarhon hubani niombah sonaha marparlahou na madear. Umpamani, sihol do ham ase tongtong jujur? Anggo sonai, marusaha do homa ham mangajarhon ai bani niombahmu.
Porlu do homa iajarhon hubani niombah pasal sopan santun. Umpamani, ase mamingkirhon na porlu bani na legan, ase rajin, ampa ase ulang mambeda-bedahon halak. Haganupan on porlu do ipasomal-somal humbani na etek.
BIBEL MANGKATAHON: “Pasomal-somal ma dakdanak mardalan bani dalan sidalanonni, ia dob matua ia, seng manlembang ia hunjai.”—Podah 22:6.
MASE PONTING ON
Bahat do pengaruh na buruk bani jaman teknologi sonari on. Sahalak inang na margoran si Karyn mangkatahon, “Boi do sompong pengaruh na buruk ai masuk marhitei HP, TV, pakon na legan. Sipata hundul do niombahta i lambungta, hape ia manonton aha na masambor!”
BIBEL MANGKATAHON: ‘Na dob matoras, ipasomal-somal do dirini laho mambotoh parleganan ni na madear ampa na masambor.’—Heber 5:14.
Ponting tumang do sopan santun. Tarmasuk do ai patuduhkon hormat bani na legan. Umpamani mangkatahon “tolong” pakon “tarima kasih” anjaha parduli bani na legan. Sonari on, bahat do halak lang sopan na lang mampardiateihon halak na legan halani sibuk marhenpon.
BIBEL MANGKATAHON: “Songon na pinindo nasiam bahenon ni halak bani nasiam, sonai ma bahen nasiam bani sidea.”—Lukas 6:31.
NA BOI IBAHEN NASIAM
Maningon bagas ma ajarhon parlahou na madear. Umpamani, sada penelitian patuduhkon na maposo na domma iajari namatorasni ase lang marhubungan seks paima marhajabuan, gabe lang ra be ia mangkorjahon ai.
COBA NASIAM MA ON: Laho mangajari pasal parlahou na madear, boi do igunahon nasiam barita na baru-baru on. Umpamani, anggo adong barita pasal hajahaton boi do ihatahon hita, “Mase adong jolma sonai jahatni tene? Anggo pandapotmu, mase ra ia mangkorjahon ai?”
“Lang urah bani niombah laho mambotoh ija na dear atap na salah anggo lang ongga iajarhon namatorasni bani sidea.”—Si Brandon.
Ajarhon ma sopan santun. Hassi pe etek ope dakdanak, boi do sidea marlajar mangkatahon “tolong”, “tarima kasih”, anjaha mamingkirhon halak na legan. Buku Parenting Without Borders patugahkon, “Anggo iahapkon dakdanak sidea bagian humbani sada kaluarga, sikolah, pakon masyarakat, lambin urah ma sidea parduli bani na legan, lang pitah mamingkirhon dirini sandiri.”
COBA NASIAM MA ON: Bere ma horja i rumah bani niombahmu ase tarojur sidea mangidangi na legan.
“Anggo somal niombah mangurupi horja i rumah, lang be tarsonggot ia mangkorjahon tugas-tugas i rumah sanggah lang be sarumah ia pakon namatorasni halani sidea domma somal mangkorjahon ai.”—Si Tara.
