BANI NA MAPOSO
11: Ringgas
AHA DO ARTINI
Halak na ringgas ai ma halak na rosuh mangkorjahon aha pe laho manggoki haporluan ni kaluargani ampa mangurupi halak na legan.
MASE PONTING ON
Sonari on bahat do halak na lang pongkut marhorja, hape ganup do halak dong bei tanggung jawabni. Jadi anggo ringgas hita marhorja, hita sandiri do na mandapot laba.—Parambilan 3:13.
“Anggo ringgas ahu marhorja, sonang ma pangahapku. Halani ai, lambin rosuh ma ahu marhorja janah gabe dear ma ahu itanda halak.”—Si Reyon.
BIBEL MANGKATAHON: “Ibagas sagala [halojaon] adong do untung.”—Podah 14:23.
NA BOI IBAHEN HANIMA
Ringgas ma horjahon tugasmu. Ase boi sonai coba ma on.
Dear ma horjahon ganup tugasmu. Atap aha pe horjamu, umpamani mamborsihkon rumah, mangkorjahon PR, atap mansari duit, horjahon ma ai humbani gok ni uhur. Anggo domma dear ihorjahon ho ai, marusaha ma mangkorjahon lambin dear use. Umpamani sonaha ase boi lambin podas ihorjahon ho ai. Lambin pandei ho mangkorjahon ai, lambin marosuh ma ho bani horjamu.
BIBEL MANGKATAHON: “Halak na pongut bani horjani, boi do marhorja ia i lobei ni raja-raja; seng bani halak na [miskin] ia marugas.”—Podah 22:29.
Pingkirhon ma gunani hubani na legan. Anggo dear idalankon ho tanggung jawabmu, dong do labani ai bani na legan. Umpamani, anggo ringgas ho mangkorjahon tugas i rumah gabe moru ma horja ni na legan.
BIBEL MANGKATAHON: “Martuahan do na mambere ase na manjalo.”—Lahoan 20:35.
Horjahon ma lobih humbani na ipindo. Anggo ihorjahon ho tugasmu halani isuruh, songon na tarpaksa do ho mangkorjahon ai. Tapi anggo marusaha ho mangkorjahon ai lobih humbani na ipindo, artini na marosuh do ho mangkorjahon ai.—Mateus 5:41.
BIBEL MANGKATAHON: “Ase ulang ma songon paksaan dear ni layakmu, tapi humbani rosuh ni uhurmu ma.”—Pilemon 14.
Seimbang. Halak na ringgas ai sedo halak na lalab marhorja. Halak na ringgas ai rosuh do marhorja janah ipasirsir do panorangni laho marsaran.
BIBEL MANGKATAHON: “Dearan do sanggolom marhasoman sonang ni uhur humbani dua [golom], tapi gok hangaluton anjaha manangkap logou tumang.”—Parambilan 4:6.