Pendirian na toguh ai mardomu pakon haporsayaonmu, sifat-sifatmu, ampa parlahoumu na madear. Jadi pendirian na sisonai ma pataridahkon halak na sonaha do hanima na sasintongni.

Anggo toguh pendirianmu, gabe lang urah be ipengaruhi hasoman hanima.

“Bahat do halak na usih songon patung na ipajang i toko baju. Lang boi sidea mamilih baju na laho sipakeonni. Maningon halak do na mamakeihon ai bani.”​—Si Adrian.

“Marusaha do ahu lambin toguh pendirianku hassi pe ibagas situasi na sunsah. Gabe hubotoh ma ise hasomanku na dear halani sidea mangkargai pendirianku​—Si Courtney.

BIBEL MANGKATAHON: “Ulang ma sarupa nasiam pakon dunia on, tapi mubah ma marhitei habayuon ni uhur.”​—Rom 12:2.

Pingkirhon ma, ‘Jolma na sonaha do ahu sonari?’ anjaha, ‘Anggo harosuhku gabe jolma na sonaha do ahu holi?’ Ase ibotoh hanima balosni, pingkirhon ma aha halobihanmu, aha hahuranganmu, pakon aha na ihaporsayai hanima. Coba ma balosi sungkun-sungkun on.

Halobihan: Aha do bakat pakon keterampilanku? Aha do halobihanku? (Umpamani: Ai jolma na topat waktu do ahu? Boi do huorom diringku? Rajin do ahu marsibere-bere?) Aha do na dear na domma huhorjahon?

COBA MA ON: Ai payah do ho laho mambotoh na dear bani dirimu sandiri? Anggo sonai, sungkun ma namatoras atap hasomanmu pasal aha do na dear na ididah sidea bani dirimu, anjaha aha alasannni.

BIBEL MANGKATAHON: “Ganup ma mamareksa horjani bei; jadi halani dirini tumang ma ia mamuji-muji diri, sedo halani na legan.”​—Galatia 6:4.

Hahurangan: Sifat aha do na porlu hupadear? Somalni, sanggah attigan do ahu urah targoda laho mangkorjahon na salah? Bani situasi aha do ahu lambin porlu mangorom diri?

BIBEL MANGKATAHON: “Anggo ihatahon hita seng dong dousanta, ipaoto-oto hita do dirinta.”​—1 Johannes 1:8.

Na ihaporsayai hanima: Parlahou na sonaha do na hudalankon anjaha mase? Porsaya do ahu bani Naibata? Aha do na mambahen ahu porsaya? Pangahapku, parlahou na sonaha do na lang dear anjaha mase? Aha do na huhaporsayai pasal masa depan ni jolma?

BIBEL MANGKATAHON: “Uhur hapantason ma [atap, anggo anget ho marpingkir] manramotkon ho, anjaha pangarusion siparjaga bam.”​—Podah 2:11.