Panjahaion 2. Kelaparan

“Masa ma homa lohei [kelaparan].”​—MARKUS 13:8.

● Dong sada dalahi na peak i atas amak i huta Quaratadji, i Niger. Domma galek ia. Mase sahalaksi ijai? Si Sidi, pangulu ni huta ai mangkatahon, “Na laho do ia hun hutani halani lang tarbere ia mangan kaluargani, janah lang homa tahan ia mangidah sidea kelaparan.” Tapi lang pitah ia na sonai, sanina botouni pe laho do homa hun huta halani kelaparan ai.

AHA NA MASA? I sab dunia on, humbani pitu halak dong hira-hira sahalak na hurang sipanganon bai ganup ari. Tapi parahan do kelaparan na masa i sub Sahara, Afrika. Anggo ijai, humbani tolu halak dong sahalak na hurang sipanganon janah martahun-tahun do masa kelaparan ijai. Ase urah iarusi nasiam bayangkon ma on. Dong sada kaluarga, dong bapani, omakni pakon sada anak. Tapi pitah hubani dua halak dassa sungkup sipanganon. Jadi ise ma na lang mangan? Bapani, omakni, atap anakni do? On ma pilihan na maningon ibahen sidea bai ganup ari.

AHA NA IHATAHON BUEI HALAK? Sasintongni sungkup do hasil panen ni tanoh on bai ganup halak, tapi maningon adong na mangatur ase boi ganup dapotan.

TONGON DO NA IHATAHON SIDEA AI? Tongon, bahatan do hasil panen ni parjuma janah urah do mangirimhon ai sonari on marimbangkon na hinan. Anjaha maningon dear do iatur pamarentah ai ase ulang adong be kelaparan i sab tanoh on. Tapi, age pe domma marpuluh tahun sidea marusaha, lalab do lang tarsaloseihon sidea parsoalan ai.

SONAHA PANDAPOTMU? Ai saud do panjahaion bani Markus 13:8 sonari on? Age pe domma maju teknologi, ai lang adong be halak na hurang sipanganon i sab dunia on?

Gati do gempa bumi pakon kelaparan mambahen dong use parsoalan na legan, na gabe tanda humbani panorang parpudi. Pardiateihon ma artikel na mangihut.

[Kutipan]

“Bahat do dakdanak na matei halani radang paru-paru, diare, atap panahit na leganni. Boi do namin ipamalum sidea anggo lang hurang gizi.”​—ANN M. VENEMAN, MANTAN DIREKTUR EKSEKUTIF UNICEF.

[Picture Credit Line]

© Paul Lowe/​Panos Pictures