Panjahaion 6. Marbarita hu Sab Dunia On

“Ambilankononkon do ambilan na madear on pasal Harajaon in i sab dunia on.”​—MATEUS 24:14.

● Si Vaiatea tading i sada huta i Kepulauan Tuamotu, Pasifik. Dong hira-hira 80 pulau na etek ijai, anjaha pendudukni hira-hira 16.000 halak. Janah luasni kepulauan ai dong 802.900 kilometer persegi. Hassi pe daoh-daoh ganup huta i kepulauan ai, tapi das do Saksi Jahowa marbarita hujai. Mase? Halani sidea sihol padaskon ambilan na madear pasal Harajaon ni Naibata hubani ganup halak, lang soal ija pe sidea tading.

AHA NA MASA? Sonari on barita pasal Harajaon domma ipadas i sab dunia on. Bani tahun 2010 tumang, igunahon Saksi Jahowa do 1,6 miliar jam laho padaskon ambilan na madear i 236 nagori. Anggo irata-ratahon hira-hira 30 menit ma tiap ari sahalak Saksi laho marbarita. Hira-hira ibagas sapuluh tahun na salpu dong lobih humbani 20 miliar sibasaon na isetak pakon na ibagihon laho mangurupi halak marlajar Bibel.

AHA NA IHATAHON BUEI HALAK? Humbani marribu tahun na salpu domma ibaritahon ambilan na madear.

TONGON DO NA IHATAHON SIDEA AI? Memang, humbani na hinan domma bahat halak na marbarita. Tapi tongkin dassa ai janah pitah i piga-piga ianan. Legan do anggo Saksi Jahowa, iorganisasi do horja parambilanon ni sidea ase boi das barita ai hubani marratus juta halak i sab tanoh on. Totap do sidea marbarita hassi pe bahat tantangan humbani pamarentah na markuasa. (Markus 13:13) Leganni ai, lang igaji Saksi Jahowa sanggah marbarita. Ibere sidea do panorangni laho mangkorjahon ai. Anjaha gratis do ibagihon sidea sibasaon. Humbani sumbangan sukarela do ganup dana na igunahon sidea laho marbarita.

SONAHA PANDAPOTMU? Ai memang ibaritahon do “ambilan na madear pasal Harajaon” ai i sab tanoh on? Halani domma ididah hita parsaudni panjahaion ai, boi do on patuduhkon anggo ari na lambin dear domma dohor?

[Kutipan]

“Sadokah ibere Jahowa ope panorang, ringgas ma hita mambaritahon pasal Harajaon janah marusaha ma manjumpahi buei halak.”​—BUKU TAHUNAN SAKSI-SAKSI YEHUWA 2010.