Gundari enterem kalak sekolah arah rumah nari. Adi kam pe sekolah rumah nari, uga nge carana gelah meriah kapndu erlajar? Enda piga-piga saran si banci nampati kam. a

•  Lima saran gelah meriah akapndu erlajar arah rumah nari

•  Kai nina teman-temanndu

•   Banlah rencana. Biasana, bas sekolah enggo lit jadwalndu si teratur. Emaka, sanga erlajar kam rumah nari, ban ka lah bage. Banlah jadwalndu man kegiaten sekolah, nampati orang tua, bage pe guna pendahin si debanna. Tapi adi lit dahinndu si lebih penting, banci ka sesuaikenndu mulihi jadwalndu e.

   Nina Pustaka si Badia: ‘Lakokenlah kerinana alu teratur.’—1 Korinti 14:40.

   “Banlah jadwalndu bagi sanga kam bas sekolah janah dungilah tugasndu bagi si enggo ijadwalkenndu.”—Katie.

   Ukurilah: Kai nge gunana adi banndu jadwal ras itamandu jadwal e bas ingan si nukah ngidahsa?

•   Disiplinlah kam. Mislah dahiken tugasndu. Adi tetap dahikenndu tugasndu aminna pe sangana kam kisat, e banci nampati kam jadi kalak si ertanggung jawap.

   Nina Pustaka si Badia: “Rajinlah kena, ula kisat.”—Roma 12:11.

   “Memang labo gampang jadi kalak si disiplin. Nukah siakap erban alasen janah ninta, ‘Kari saja kudahiken dahin e yah.’ Tapi kepeken la sidahiken dahin e, dungna reh buena dahin si lenga dung.”—Alexandra.

   Ukurilah: Kam banci jadi kalak si lebih disiplin adi dahikenndu tugas sekolahndu bas ingan ras waktu si seri tiap wari. Engkai maka banci bage?

•   Daramilah ingan si cocok guna erlajar. Tamalah i deherndu kerina si iperlukenndu guna erlajar. Banlah inganndu erlajar nyaman. Tapi ula nyamansa gelah ula kam sempat terpedem. Adi la lit inganndu si khusus guna erlajar, banci kam erlajar bas ingan si tenang ntah pe bas kamarndu.

   Nina Pustaka si Badia: “Rencana kalak rajin pasti berhasil.”—Kuan-kuanen 21:5.

   “Simpan lebe bola basketndu, alat-alat game-ndu, ras gitarndu. Atur HP-ndu gelah ula lit sorana. Banci kam reh fokusna erlajar adi la lit si ngganggu kam.”—Elizabeth.

   Ukurilah: Gelah banci kam konsentrasi erlajar, kai si banci iubahndu bas inganndu erlajar?

•   Fokuslah kam. Ula lakoken piga-piga dahin sekaligus. Sada-sada dungi dahinndu. Adi dadapndu piga-piga dahin sekaligus, pasti banndu kesalahen ras reh dekahna maka dung dahinndu.

   Nina Pustaka si Badia: “Gunakenlah waktu kena alu mehuli.”—Epesus 5:16.

   “La aku banci fokus adi lit HP i deherku. Dungna, kukeriken waktuku man kai si la penting.”—Olivia.

   Ukurilah: Banci nge usahakenndu gelah reh fokusna kam ngelakoken sada tugas?

•   Istrahatlah kentisik. E banci erban kam lebih semangat. Banci kam erdalan-dalan, naik sepeda, ntah pe olahraga. Banci ka lakokenndu hobi-ndu. Nina buku School Power, “Adi dungindu lebe tugasndu, banci reh riahna iakapndu sanga istrahat.”

   Nina Pustaka si Badia: “Ulin sitik istrahat asangken melala kerja keras ras usaha ngayaki angin.”—Pengerana 4:6.

   “Bas sekolah, biasana lit pelajaren musik ntah pe pelajaren seni. Kenca aku sekolah arah rumah nari, je maka kusadari meriah kepeken pelajaren-pelajaren e. Emaka, sanga erlajar rumah nari perlu silakoken kai si erban meriah siakap.”—Taylor.

   Ukurilah: Kai saja nge si banci erban kam semangat erlajar?