Menurut sada survei, 80 persen anak muda bas Amerika ertoto. Tapi setengah ngenca arah kalak e si ertoto tiap wari. Lit arah anak muda e si tersungkun-sungkun, ‘La kin gelah tenang saja nge maka kita ertoto, lit denga kin gunana si deban?’

•  Kai kin ertoto e?

•  Begiken Dibata kin kita ertoto?

•  Kai saja si banci sitotoken?

•  Kai nina teman-temanndu

 Ertoto eme ngerana man Dibata, Pencipta kerinana. Enda luar biasa kel, la lit si hebaten asangken Jahwe, tapi “Ia labo ndauh arah kita nari sekalak-sekalak.” (Perbahanen Rasul-Rasul 17:27) Bas Pustaka si Badia, lit undangen si luar biasa. Nina, “Rembakkenlah diri kena ku Dibata, emaka rembakkenNa ka diriNa man kena.”​—Jakup 4:8.

 Uga kin carana gelah rembak kita ras Dibata?

•   Sada cara eme alu ertoto. Sanga ertoto kita, kita si ngerana man Dibata.

•   Cara si deban eme alu erlajar Pustaka si Badia. Sanga sipelajari Pustaka si Badia, Dibata si “ngerana” man banta.

 Kita perlu ngerana man Dibata janah perlu ka sibegiken Ia. Emaka perlu kita ertoto janah perlu sipelajari Pustaka si Badia. Adi bage siban, dungna rembak kita ras Dibata.

 “Hebat kel kuakap banci ngerana ras Jahwe, sebap Ia Dibata Si Madakuasa.”​—Jeremy.

 “Adi curhat aku man Jahwe sanga ertoto, ndeher kel kuakap aku ras Ia.”​—Miranda.

 Banci saja tek nge kam man Dibata janah ertoto ka kam man baNa, tapi mon-mon ragu denga kam ntah labo kam begikenNa. Adi bage ingetlah maka nina Pustaka si Badia, Jahwe eme “Si Megiken toto.” (Masmur 65:2) Bas Pustaka si Badia pe ikataken, “benterkenlah kerina kekuatiren kena man Dibata.” Engkai? “Sebap perdiatekenNa kap kena.”​—1 Petrus 5:7.

 Cuba ukurindu: Pasti rusur kam ngerana ras teman kompakndu. Ras Dibata pe perlu ka nge rusur kam ngerana. Sanga ertoto kam man baNa, lebuhlah gelarNa eme Jahwe. (Masmur 86:​5-7; 88:9) Janah bas Pustaka si Badia ikataken “teruslah ertoto.”​—1 Tesalonika 5:​17.

 “Adi kuakap ertoto eme ngerana man Bapak si i surga eme Dibata. Kuceritaken kerina isi pusuhku man baNa.”​—Moises.

 “Sanga ertoto aku man Jahwe, la aku mela ncritaken kai pe man baNa, bagi sanga cerita aku man mamakku ntah pe man teman kompakku.”​—Karen.

 Nina Pustaka si Badia, “Bas kerinana pesehlah pemindon kena man Dibata bas toto janah pindolah alu ngataken bujur.”​—Pilipi 4:6.

 Adi bage, banci nge siceritaken masalahta man Jahwe? Banci! Nina Pustaka si Badia, “Benterkenlah babanndu man Jahwe, Ia pagi si ndukung kam.”​—Masmur 55:22.

 Tapi ula min masalahta ngenca lalap siceritaken. Lit anak muda si gelarna Chantelle ngataken, “Adi mindo penampat ngenca kita lalap man Jahwe, labo kap kita teman si mehuli. Adi kuakap sanga ertoto, leben min sikataken bujur. Janah bas totota e, buen min kita ngata bujur asangken mindo.”

 Cuba ukurindu: Kai saja si bere Jahwe man bandu si banci erban kam ngata bujur? Ukurilah telu alasen si banci erban kam ngata bujur man Jahwe bas wari enda janah totokenlah e.

 “Hal-hal si sederhana pe banci erban kita ngata bujur man Jahwe. Contohna sanga siidah bunga si mejile.”​—Anita.

 “Adi ukurindu ciptan Jahwe si luar biasa ntah pe ayat Pustaka si Badia si kena kel ku pusuhndu, pasti kam banci ngata bujur man Jahwe.”​—Brian.