Lit dua kali seminggu Saksi-Saksi Jahwe pulung bas Bale Kerajan. Kai kin Bale Kerajan e, janah kai gunana reh ku je?

•  Kai kin Bale Kerajan e?

•  Kai gunana man bandu adi reh kam?

•  Kai nina teman-temanndu

 Bale Kerajan eme ingan kalak erlajar Pustaka si Badia, janah kai si ipelajari i je erguna bas kegeluhenta. Perpulungen si lit i je banci nampati kam:

•   meteh uga kin situhuna Dibata e.

•   ngangkai hubungen kejadin-kejadin si terjadi gundari ras kai nina Pustaka si Badia kerna si e.

•   jadi kalak si reh ulina.

•    ndatken teman-teman si mehuli.

 Tehndu nge? Ingan perpulungen Saksi-Saksi Jahwe igelari Bale Kerajan, perban rusur kel Kerajan Dibata ibahas i je.​—Matius 6:​9, 10; 24:14; Lukas 4:​43.

 Informasi si ibegindu i je erguna man bandu. Pembahasen Pustaka si Badia bas perpulungen Saksi-Saksi Jahwe nampati kam ‘ndatken kepentaren.’ (Kuan-kuanen 4:5) Maksudna, Pustaka si Badia banci nampati kam gelah reh beluhna erban keputusen si mehuli. Pustaka si Badia pe banci ka njawap penungkunen-penungkunen si penting, contohna:

•   Kai kin tujun geluh enda?

•   Dibata nge si erban manusia menderita?

•   Uga nge keadan kalak mate?

 Enda piga-piga contoh judul khotbah si ipeseh bas perpulungen akhir pekan:

•   Engkai maka Perlu Ibimbing Pustaka si Badia?

•   Ija Kam Banci Ndatken Penampat Paksa Ngadapi Kesusahen?

•   Kai si Ilakoken Kerajan Dibata man Banta Gundari?

 “Lit teman sekolahku si reh ku perpulungen. Ras keluargaku kami kundul, janah kongsi kami make bukuku. Kenca si e, sanga lit pembahasen tanya jawab, mantap kel kapna komentar-komentar kalak bas acara e. Katakenna ka bas gerejana la lit pelajaren si bage.”​—Brenda.

 Tehndu nge? Bas Bale Kerajan acarana gratis janah la lit kolekte.

 Pergaulen ras kalak si lit i je banci erban kam terpegegehi. Bas Pustaka si Badia ikataken engkai maka kalak Kristen arus reh ku perpulungen, eme gelah ‘sipegegehi sada ras si debanna.’ (Heber 10:24, 25) Gundari enterem kel kalak si ngukuri dirina saja, tapi sanga reh kita ku perpulungen, meriah siakap bergaul i je perban kalak e ngutamaken Dibata ras kalak si deban.

 “Mon-mon perban sibuk sada warin enggo latih kuakap, tapi kalak si lit bas Bale Kerajan erban aku semangat ka mulihi. Sanga mulih perpulungen enggo meriah ukurku, janah enggo siap aku ngadapi wari berikutna.”​—Elisa.

 Tehndu nge? I sebelang doni lit lebih 120.000 runggun Saksi-Saksi Jahwe, janah kalak e pulung bas lebih 60.000 ingan. Perban reh teremna rusur kalak si reh ku perpulungen, lit kira-kira 1.500 Bale Kerajan si ibangun tiap tahun. a