Enterem orang tua la berena anakna nggunaken media sosial perban lit bahayana. Tapi, adi ijinkenndu anakndu nggunaken media sosial, uga carandu nampati ia gelah la kena pengaruh si la mehuli janah banci ia bijak nggunakenca?

Si ibahas bas artikel enda:

•  Kai nge si pentingna akap anakndu?

•  Uga nge pengaruhna ku perasan anakndu?

•  Uga nge perbahanen anakndu bas media sosial?

•  Si banci bahasndu ras anakndu

 Si perlu tehndu: Media sosial e enggo irancang gelah candu kita makesa, emaka perlu sampatindu anakndu gelah banci batasina waktuna nggunakenca.

 Nina Pustaka si Badia: ‘Pastikenlah kai si lebih penting.’​—Pilipi 1:10.

 Si perlu ukurindu: Terganggu nge pertunduh anakndu, tugas sekolahna, bage pe waktuna ras keluarga gara-gara media sosial? Menurut para peneliti, anak remaja perlu medem kira-kira siwah jam tiap berngi. Tapi anak remaja si ndekahsa main media sosial, lanai bo seh pitu jam ia medem.

 Si banci lakokenndu: Cakapkenlah ras anakndu gelah tehna kai si lebih penting. Kataken ka man bana maka perlu batasina waktuna nggunaken media sosial. Banlah aturen si masuk akal. Contohna, la ia banci main HP adi enggo waktuna medem. Tujunna gelah ngasup anakndu nguasai diri, sebap sipat e seh kel pentingna seh ngasa ia galang.​—1 Korinti 9:25.

 Si perlu tehndu: Foto-foto si tama kalak ntah pe si postingna bas media sosial, biasana enggo iedit janah si meriah-meriah saja ngenca si postingna. Adi idah anak muda foto-foto si bage, banci melungen kapna, kuatir ia, janah stres ia.

 Nina Pustaka si Badia: “Ula nai . . . rate cian.”​—1 Petrus 2:1.

 Si perlu ukurindu: Kai nge kari pengaruh media sosial e man anakku? Usur nge kari banding-bandingkenna dirina ras kalak si deban janah lalap kapna kurang jile bana? Sedih nge kari ia perban riahen idahna kegeluhen kalak asangken ia?

 Si banci lakokenndu: Katakenlah man anakndu kai saja bahayana adi banding-bandingkenna dirina ras kalak si deban. Perlu tehndu, asangken anak dilaki, anak diberu lebih kuatir kerna teman-temanna bage pe kerna penampilenna. Emaka banci saja nukahen anak si diberu terpengaruh nandangi kai si idahna bas media sosial asangken anak si dilaki. Banci ka sarankenndu man anakndu gelah ngadi lebe ia sementara nggunaken media sosial. Nina sekalak anak muda si gelarna Jacob, “Kuhapus sange lebe aplikasi media sosial bas HP-ku. Emaka banci dungna kulakoken kai si lebih penting. Reh ulina ka caraku ngenen diriku bage pe kalak si deban.”

 Si perlu tehndu: Adi anakndu nggunaken media sosial, enterem kalak si banci ngidah kai si lakokenna. Emaka, pasti kari lit kalak si salah paham ntah pe si mandangi ia.

 Nina Pustaka si Badia: ‘Tadingkenlah kerina perasan dendam, merawa, ngamuk, megang ngerana janah kasar kata-katana, ras ngisakken. Tapi mehulilah man sada ras si debanna.’​—Epesus 4:31, 32.

 Si perlu ukurindu: Kai nge pengaruh media sosial man anakndu? Nggit nge ia dungna cikurak, rubati, ntah pe cakap kotor?

 Si banci lakokenndu: Sampati anakndu gelah sopan ia bas media sosial. Nina buku Digital Kids, “Orang tua ertanggung jawap ngajari anakna gelah ula kasar man ise pe, la soal man kalak si tandaina secara langsung ntah pe man kalak si tandaina arah Internet.”

 Ingetlah, labo arus lit media sosialta, enda labo kebutuhen. Janah labo kerina orang tua ngijinken anakna si remaja denga nggunakenca. Adi ijinkenndu anakndu nggunaken media sosial, pastikenlah anakndu e enggo beluh ngaturken waktuna, beluh ia erteman, janah pang ia nulak kai si la pantas si lit bas Internet.