PENAMPAT MAN KELUARGA | CARA NGAJARI ANAK
Ajari Anakndu gelah La Nukah Nyerah
Bayangken anakndu sangana ngelakoken sada tugas. Tapi la ndekah kenca si e nina, “Mesera kel pe! Enggo me yah. La kuteh!” Pasti la meriah ukurndu ngidah anakndu susah. Tapi merhat ka kam gelah iteh anakndu min uga carana ndungi masalah. Adi bage, mis nge sampatindu atendu anakndu? Pediatndu nge ia nyerah? Ntah, banci nge ajarindu ia gelah jadi kalak si la nukah nyerah?
Si perlu tehndu
Penting kel gelah la nukah nyerah. Adi iajari orang tua anakna kerna uga pentingna kerja keras, banci reh ulina me sipat ras keterampilen anakna e. Mbelin ka kemungkinenna anakna e beluh bas sekolah, lebih sehat, lebih ermeriah ukur, nukah ia ergaul, janah banci pilihna teman alu mehuli. Tapi, adi lalap usahaken orang tua guna nampati anakna gelah anakna e la pernah gagal janah la pernah ngenanami kesuliten, mbelin kemungkinenna anakna e banci depresi. Selain si e, la kapna ia ngasup ngelakoken kai pe janah adi enggo galang ia, banci kurang kapna riahna ndalani kegeluhenna.
Sipat la nukah nyerah banci ipebelin. Anak si kitik denga pe banci ipebelinna tekadna guna ngelakoken kai si mesera iakapna bage pe guna ndungi sada masalah. Menurut sada penelitin, adi iidah bayi si umurna 15 bulan kalak si dewasa erjuang ngelakoken tugas si mesera, dungna ia pe banci la nukah nyerah bas ngelakoken tugas si mesera. Tapi adi si idahna kalak dewasa si la pernah erjuang tapi banci tetap berhasil, dungna anak bayi e pe banci jadi kalak si nukah nyerah.
“Kuinget sanga duana anakku si diberu kitik denga, kuajari kalak e uga cara ngiket nali sepatu. Enda labo banci ilakoken bas sada wari ngenca. Tiap kenca ipake kalak e sepatuna, perlu kalak e 10 seh 15 menit guna ngiket nali sepatuna janahna nginget-nginget mulihi uga cara si enggo kuajarken man kalak e. Tapi adi kenca si e pe lenga kalak e berhasil, kusampati me kalak e. Erbulan-bulan dekahna arus terus kalak e erlajar ngiket nali sepatuna, janah mon-mon tangis ia perban la berhasil. Tapi dungna berhasil kalak e. Situhuna banci saja kutukur sepatu si la lit nalina gelah la aku repot. Tapi selaku orang tua, kita la banci nyerah guna ngajari anak-anakta gelah kalak e la jadi kalak si nukah nyerah.”—Colleen.
Sipat la nukah nyerah banci dungna bene. Piga-piga orang tua la isadarina maka ia me si erban anak-anakna jadi kalak si nukah nyerah. Engkai maka bage? Perban la ate kalak e anakna jadi kalak si la percaya diri. Emaka sanga lit masalah, mis “isampatina” anakna gelah ula sempat gagal akap anakna e janah gelah anakna e pe la kecewa. Tapi situhuna kai si ilakoken orang tuana e la mehuli hasilna. Sekalak penulis si gelarna Jessica Lahey ngataken, “Tiap kenca siselamatken . . . anakta arah masalah, tempa-tempa sikataken man kalak e maka labo ia ngasup ngadapi masalah e janah labo ia terteki.” a Kai hasilna? Banci saja mis anak-anak e nyerah sanga ngadapi masalah, janah lalap atena isampati bas ndungi masalahna.
Banci ajarindu anakndu gelah la nukah nyerah adi la mis “sampatindu” anakndu sanga ia ngadapi situasi si sulit
Si banci lakokenndu
Ajarilah anakndu guna kerja keras. Salah sada cara si banci lakokenndu gelah anakndu la nukah nyerah, eme alu mereken tugas si cocok man kalak e sesuai ras umurna. Misalna adi ia TK denga, banci suruhndu ia ngelipat baju ntah pe nusun mainenna. Adi ia SD denga, banci suruhndu ia nusun belanjan, nikapken piring, ngambekken sampah, ntah pe mbersihken bekas pangan ntah pe inemen si mambur. Adi ia enggo remaja, banci berendu ia tugas si lebih sulit bagi bersih-bersih, ngerawat barang-barang, bage pe mpesikap barang-barang si ceda. Memang, biasana anak-anak la meriah kapna adi ibereken tugas. Tapi adi berekenndu tugas man anakndu kitik-kitikna nari, terbiasa me ia pagi guna kerja keras. Alu bage, la ia nukah nyerah adi datna pendahin si mesera sanga ia enggo galang pagi.
Nina Pustaka si Badia: “Kerina kerja keras pasti lit gunana.”—Kuan-kuanen 14:23.
“Ula sisuruh anakta ngelakoken sada tugas si erban ia sibuk tapi la lit gunana. Ise pe, termasuk anak si kitik denga la kapna meriah adi ibereken tugas si bage. Berekenlah man anakta tugas si lit gunana. Adi anakndu kitik denga, banci suruhndu ia ngelap peraboten si la mesera akapna mbersihkenca. Adi sangana kam nuci motor, banci suruhndu anakndu mbersihken bagin si mesera kapndu ngelakokenca, tapi menukah kapna ngelakokenca. Kenca si e, ula kam lupa muji anakndu perban enggo kerja keras ia.”—Chris.
Temani anakndu sanga ngelakoken tugas si mesera. Mon-mon, anak-anak mis tena nyerah adi la tehna uga cara ndahiken sada tugas. Jadi sanga ajarindu atendu anakndu, cubalah ikuti saran-saran enda. Si pertama, cidahken man bana uga cara ndahiken tugas e. Si peduaken, ras-raslah kena ngelakokenca. Si peteluken, suruhlah anakndu ngelakoken tugas e sisada, tapi perlu denga awasindu ia. Berelah masuken adi e iperluken. Si terakhir, pediat ia ngelakoken tugas e sisada.
Nina Pustaka si Badia: “Enggo kuban usihen man kena, gelah lakoken kena ka bagi si kuban e.”—Johanes 13:15.
“Menurut pengalamenku, adi ateta lit sipat si mehuli bas anakta, sipat e arus ka lit bas dirita. Emaka adi ateta gelah anakta e la nukah nyerah, kita pe selaku orang tua arus jadi usihen si mehuli man anakta e.”—Doug.
Sampati anakndu meteh maka kerina kalak arus erjuang janah banci saja gagal. Ceritakenlah pengalamenndu sanga lakokenndu sada tugas janah berhasil kam perban la kam nyerah. Kataken man anakndu maka wajar nge adi mesera akapna ngelakoken tugas-tugas si mbaru. Kataken ka man bana, adi ibanna kesalahen tetap banci buatna pelajaren arah kesalahenna e. Janah amin pe ia gagal, petetaplah ukurna maka tetap nge keleng atendu ia. Bali bagi otot si banci reh gegehna adi terus ilatih, anakndu pe banci jadi kalak si la nukah nyerah adi terus ilatihndu ia guna ngadapi kesuliten. Asangken mis sampatindu ia, berekenlah man bana kesempaten guna terus rusaha amin pe enggo nyerah saja atena. Buku How Children Succeed ngataken, “Cara si mehulina man anak muda gelah jadi kalak dewasa si paguh pendirinna, eme alu ngelakoken tugas si mesera.”
Nina Pustaka si Badia: “Mehuli kel adi sekalak jelma maba baban si mberat sanga ia nguda denga.”—Perngandungen 3:27
“Memang perlu iteh anak-anak maka orang tuana lalap nggit nampati ia. Tapi adi sibereken kesempaten man anakta guna erjuang ngelakoken tugas si sulit pasti dat kalak e manpaatna. Dungna, lanai kari kalak e perlu erjuang guna ngelakokenca. Hasilna, beluh kalak e ngelakoken tugasna janah tehna maka labo sia-sia perjuangenna.”—Jordan.
Pujikenlah usahana, labo kepentarenna. Asangken katakenndu man anakndu, “Mantap kel nilaindu, Nakku. Pentar kel kam!” padin katakenndu bagenda, “Mantap kel si ilakokenndu, perban enggo rajin kam erlajar guna ngikuti ujian enda. Bangga kel aku man bandu.” Engkai maka perlu silakoken e? Menurut sekalak penulis si gelarna Dr. Carol Dweck ngataken, “Adi kepentaren anak si ipuji orang tua, sanga iadapi anak e pagi kesuliten ntah kai si terjadi la sesuai ras kai si iarapkenna, dungna lanai ia percaya diri.” Ikataken penulis e ka, “Hadiah si mehulina si banci ibereken orang tua man anakna eme ngajari anak-anakna gelah meriah kapna ngadapi tentangen, nggit ia ngakui kesalahenna, meriah kapna kerja keras, ndarami cara-cara si mbaru guna ngelakoken sada tugas, janah terus erlajar. Adi bage si ilakoken orang tua, anak e labo kari ipuji-puji saja atena lalap.” b
Nina Pustaka si Badia: “Sekalak jelma iuji alu pujin si alokenna.”—Kuan-kuanen 27:21.