Bas piga-piga tahun enda, ngeri kel pertambahen jumlah remaja si bunuh diri bas piga-piga negri. Engkai maka e terjadi? Mungkin nge lit sura-sura anakndu bunuh diri?

Si ibahas bas artikel enda:

•  Engkai maka perlu ukuri orang tua kerna si e?

•  Ja nari tehndu lit sura-sura anakndu bunuh diri?

•  Uga nge adi lit sura-sura anakndu bunuh diri?

 Mulai tahun 2009 seh 2019, jumlah remaja bas Amerika Serikat si kena gejala depresi tambah hampir dua kali lipat. Janah bas sepuluh tahun e pe, reh buena ka kalak si bunuh diri. a

Masalah enda pe terjadi ka bas Indonesia. Menurut sada survei bas tahun 2021, sada arah telu remaja bas Indonesia, eme kira-kira 15,5 juta kalak, kena masalah kesehaten mental. Janah lebih 80 persen remaja si ngataken bunuh diri atena, ngenanami masalah kesehaten mental.

 “Anak muda si gundari ngadapi masalah si lenga pernah iadapi anak muda si mbarenda . . . Masalah-masalah e erban ceda kel kesehaten mental kalak e.”​—Vivek H. Murthy, Kepala Dinas Kesehaten AS.

 Nina Pustaka si Badia: “Ukur si serbut erban bene semangat.”​—Kuan-kuanen 17:22.

 Perdiateken si telu enda:

•   Kejadin. Pernah nge gejapken anakndu kejadin si la mehuli? Contohna gagal ia, putus cinta, ntah pe erceda ate perban mate kalak si kelengina? Adi pernah, mungkin nge pengaruhna man anakndu belinen asangken si bayangkenndu?

•   Perbahanen. Lanai nge ia nggit pulung-pulung ras temanna ntah pe keluarga? Lanai nge ia merhat ngelakoken kegiaten si mbarenda meriah akapna ngelakokenca? Rempet nge berekenna barang-barang kesayangenna man kalak si deban?

•   Ranan. Lit nge cakapken anakndu kerna kematen? Pernah nge katakenna bagenda? “Kuakap pangen mate saja aku” ntah “Adi mate aku lanai kususahi kena.”

   Amin pe tempa-tempa ‘belasi anakndu saja ngerana,’ banci saja memang perlu ia tuhu-tuhu isampati. (Jop 6:3) Emaka ula sepelekenndu kai pe si kataken anakndu kerna sura-surana bunuh diri.

 Adi kepeken pernah bunuh diri ate anakndu, banci sungkunindu ia, “Sempat nge ukurindu ndigan atendu bunuh diri janah uga cara ngelakokenca?” Arah jawapenna banci tehndu uga terna masalah e arus idungi.

 “Mungkin ragu kita nungkuni anakta perban la kita siap megiken jawapenna. Tapi situhuna, e kesempaten man banta guna meteh isi pusuh anakta.”​—Sandra.

 Nina Pustaka si Badia: “Perukuren jelma bali bagi lau si mbages, tapi kalak si lit pengertinna banci nimbasa.”​—Kuan-kuanen 20:5.

•   Alu sabar, usahakenlah meteh uga perasanna. Si pertama, pujiken ia perban enggo nggit ia jujur. Kenca si e banci katakenndu, “Nggit nge kam nceritaken kai si terjadi man bandu mbaru-mbaru enda? Mamak (ntah Bapak) merhat nampati kam” ntah pe “Nggit nge kam nceritaken uga perasanndu sanga reh ukurndu bunuh diri?”

   Kenca si e, sabarlah kam megiken jawapenna. Ula sepelekenndu perasanna, janah ula kam buru-buru mereken jalan keluarna.

   Nina Pustaka si Badia: “Arus meter megiken, ula mis ngerana, janah ula mis merawa.”​—Jakup 1:19.

•   Banlah rencana. Sampatilah anakndu meteh ras nuliskenca si telu enda:

   Tanda bahaya. Kai nge si biasana terjadi man bana ntah pe si ukurina sope turah ukurna bunuh diri?

   Kegiaten si erguna. Kegiaten kai saja nge si bancina kel nampati ia gelah reh tenangna perasanna janah lanai lit ukurna bunuh diri?

   Kalak si banci nampati. Lit nge kalak si banci andalken anakndu sanga perlu ia penampat? Kalak si bage banci saja termasuk kam, kalak dewasa si debanna, psikiater, ntah pe lit organisasi si ahli i bas nampati kalak si bunuh diri atena.

   Nina Pustaka si Badia: “Rencana kalak rajin pasti berhasil.”​—Kuan-kuanen 21:5.

•   Tetaplah waspada. Teruslah perdiateken anakndu amin pe keadanna tempa enggo reh ulina.

   “Sanga kataken anakku lanai bo lit sura-surana bunuh diri, kuakap enggo dung masalahna. Kepeken salah kel aku. Adi kalak si pernah lit sura-surana bunuh diri ngadapi masalah si deban, sura-sura e banci reh ka mulihi.”​—Daniel.

   Sampati anakndu ngangkai kebenaren penting enda: Situhuna kai si sangana sigejapken, sementara ngenca. Buku The Whole-Brain Child ngataken, “[Perasanta e] seri ras cuaca. Udan memang lit, tapi adi cinder kita i teruh udan, janah siban tempa-tempa la lit udan, e sitik pe la masuk akal. Tapi, labo ka masuk akal adi siakap matawari lanai pernah reh mulihi.”

•   Petetap ukur anakndu: Kataken man anakndu maka keleng kel atendu ia janah pasti dukungndu ia. Banci ka katakenndu, “Mamak (ntah Bapak) pasti ngelakoken kai pe guna nampati kam.”

   Nina Pustaka si Badia: “Teman situhu-tuhu lalap ncidahken kekelengen, janah ia jadi senina sanga lit kesusahen.”​—Kuan-kuanen 17:17.