PENAMPAT MAN KELUARGA
Sanga Beda Pendapat
Bas perjabun, pasti lit perbedan antara perbulangen ras ndehara, misalna beda hobina, kebiasanna, ras sipat-sipatna. Mon-mon perbedan si bage pe banci jadi perubaten, apai ka kerna masalah si enda:
Waktu guna pulung ras keluarga bage pe kade-kade
Cara ngaturken sen
Lit anak ntah lang
Kai si banci lakokenndu adi beda pendapatndu ras teman geluhndu?
Si perlu itehndu
Serasi labo ertina lalap sada arih. Perbulangen ras ndehara si enggo serasi kel pe labo lalap seri pendapatna, apai ka bas masalah si penting.
“Meriah akap keluargaku pulung-pulung. Adi enggo kenca wari Sabtu ras Minggu, biasana pulung kami ras bulang, nini, kila, bibik, mama, mami, bage pe ras turang seninaku arah keluarga bapak ras mamak. Tapi, adi keluarga perbulangenku jarang pulung-pulung. Emaka, la seri pendapatku ras perbulangenku kerna ndigan saja waktuna kami arus pulung-pulung ras keluarga ntah pe ngerana-ngerana ras keluarga si ndauh inganna tading.”—Tamara.
“Perban caraku ipebelin la seri ras ndeharaku, la seri cara kami ngaturken sen. Sanga mbaru denga kami erjabu, piga-piga kali rubat kami kerna si e. Enggo pe piga-piga kali cakapken kami, la mis dung masalah e.”—Tyler.
Aminna pe dua kalak lit bas ingan si seri, banci saja beda si perdiateken kalak e. Bage ka pe, banci beda pendapat perbulangen ras ndehara kerna sada masalah
Labo kerina masalah menukah ndungisa. Misalna, uga adi rempet sakit simetuandu janah perlu irawat? Ntah, uga adi teman geluhndu lit atena anak kena tapi kam lang? a
“Enggo rusur kucakapken ras ndeharaku kerna lit anak kami ntah lang, janah sanga cakapken kami kerna si e ndekah kami ngerana. Tapi reh dekahna reh merhatna ia lit anak kami. Lalap la seri pendapat kami kerna si e. Bingung aku uga nge jalan keluarna.”—Alex.
Beda pendapat labo ertina gagal perjabunndu. Menurut piga-piga ahli, adi beda pendapatndu ras teman geluhndu kerna masalah si penting, arus lakokenndu kai pe gelah seh sura-surandu, amin pe banci jadi arus kena cerai. Tapi, “jalan keluar” si bage situhuna egois. E pe mbuktiken maka sepele kapndu janji perjabunndu i lebe-lebe Dibata gelah tetap setia man teman geluhndu kai pe si terjadi.
Si banci lakokenndu
Usahakenlah nepati janji perjabunndu. Adi usahakenndu e, kam ras teman geluhndu banci jadi sada tim si kompak guna ndungi masalah kena.
Pedah Pustaka: “Kai si enggo persada Dibata, la banci sirangken manusia.”—Matius 19:6.
Ukuri kai untungna ras rugina. Misalna, ndehara merhat ia lit anakna, tapi perbulangenna lang. Lit piga-piga si banci iukuri, misalna:
Rembak ntah lang kam ras teman geluhndu.
Ngasup nge kena adi lit pagi masalah bas mpebelin anak?
Tanggung jawap jadi orang tua.
Selain mereken pangan, uis, ras ingan tading man anakna, melala denga tanggung jawap orang tua.
Keuangen kena.
Banci nge seimbang waktundu guna dahin, keluarga, ras tanggung jawap si debanna?
Pedah Pustaka: “Adi lit arah kena nari si atena mbangun sada menara, pasti kundul ia lebe janah kirana biayana.”—Lukas 14:28.
Ukuri kai saja si erbanca la seri pendapat kena. Kenca ukuri kena, banci saja lit piga-piga masalah si banci dungi kena. Contohna, adi lenga sada arih kena kerna lit anak ntah lang, si la ia merhat lit anakna banci ukurina enda:
‘Sanga kukataken la aku nggit lit anak kami, tuhu-tuhu nge aku la nggit ntah lenga aku siap lit anak kami gundari?’
‘Mbiar nge aku banci ntah lang pagi aku jadi orang tua si mehuli?’
‘Mbiar nge aku adi lit kari anak kami, lanai ermediate teman geluhku bangku?’
Janah, si merhat ia lit anakna banci ukurina enda:
‘Enggo nge banci dalanken kami tanggung jawap jadi orang tua?’
‘Enggo nge bias sen kami guna mpebelin anak?’
Pedah Pustaka: “Kepentaren si rehna surga nari . . . masuk akal.”—Jakup 3:17.
Positiplah perukurenndu kerna pendapat teman geluhndu. Aminna pe dua kalak lit bas ingan si seri, banci saja beda si perdiateken kalak e. Bage ka pe, banci beda pendapat perbulangen ras ndehara kerna sada masalah, misalna kerna cara ngaturken sen. Emaka sanga mbahassa, banci bahas kena lebe kai saja pendapat kena si seri kerna masalah e.
Rencana kai saja nge si enggo ban kena?
Kai nge si positip si datndu arah pendapat teman geluhndu?
Gelah tetap paguh perjabun kena, nggit nge salah sada arah kena ntah pe duana kena mengalah gelah sada arih kena?
Pedah Pustaka: “Tiap kalak arus min ngukuri kepentingen kalak si deban, labo kepentingenna saja.”—1 Korinti 10:24.
a Masalah si penting arusna enggo ibahas sope erjabu. Tapi kenca erjabu, banci lit kejadin si la isangka-sangka ntah pe banci berubah cara rukur teman geluhndu.—Pengerana 9:11.