Kuatir nge teman geluhndu perban kebiasanndu si nggit minem-minem? Adi ue, lit piga-piga si perlu ukurindu.

Si ibahas bas artikel enda:

•  Kai saja nge bahayana adi candu minem alkohol?

•  Candu nge kam minem alkohol?

•  Ula lalap daramindu alasen

•  Si banci lakokenndu

 Candu minem inemen alkohol banci erban turah erbage-bage penakit, misalna penakit jantung, penakit liver, bage pe kanker. Tapi labo e saja, candu minem alkohol banci ka erban masalah bas perjabun, misalna kekerasen bas rumah tangga, masalah sen, selingkuh, bage pe cerai.

 Menurut Kuan-kuanen 23:32, alkohol si iinem alu lebihsa banci ‘nagut bali bagi nipe, janah semburkenna racunna bali bagi nipe si erbisa.’ Ja nari banci tehndu enggo candu kam minem alkohol?

 Gelah banci tehndu, cuba ukuri piga-piga penungkunen enda:

•   Mesera nge akapndu ngendaliken kebiasanndu minem-minem?

•   Rusur nge ukurindu ndigan ka banci inemndu inemen alkohol?

•   Tetap nge kam minem-minem amin pe e banci erban erbage-bage masalah bas kegeluhenndu termasuk bas perjabunndu?

•   Lit nge gejapkenndu gejala-gejala tertentu sanga ngadi kam minem alkohol?

•   Mon-mon rubati nge kam ras teman geluhndu perban kebiasanndu si nggit minem-minem?

•   Ngasup nge kam minem terbuen inemen alkohol asangken si enggo-enggona?

•   Lit nge bunikenndu inemen alkohol bas rumah ntah pe bas inganndu erdahin janah inemndu alu erbuni-buni?

 Adi jawapndu ue man salah sada ntah piga-piga penungkunen e, mbelin kemungkinenna enggo candu kam minem alkohol.

 Pernah nge ikataken teman geluhndu maka kuatir ia kerna kebiasanndu si nggit minem-minem? Adi pernah, mungkin usahakenndu ndarami alasen maka e labo masalah. Mungkin salahkenndu kalak si deban termasuk teman geluhndu, alu ngataken:

•   “Adi mehuli perbahanenndu, la mungkin aku minem-minem.”

•   “Adi bagi dahinku e min ndai dahinndu, kam pe pasti nge minem-minem.”

•   “Buen denga nge si iinem teman-temanku asangken aku.”

 Adi bage si katakenndu, mungkin utamakenndu sura-surandu guna minem-minem asangken perjabunndu. Tapi apai nge arusna si lebih penting?

 Nina Pustaka si Badia: “Dilaki si enggo erjabu si kuatirkenna kerna . . . uga gelah ngena ate ndeharana.”—1 Korinti 7:33.

•   Ula sepeleken pendapat teman geluhndu. Amin pe enggo kuatirsa kel teman geluhndu kerna kebiasanndu si nggit minem-minem, banci denga banndu piga-piga perubahen. Tapi adi la nggit kam robah janah tetap kam minem-minem, mungkin e tandana maka alkohol enggo mulai ncedai perjabunndu.

   Nina Pustaka si Badia: “Tiap kalak arus min ngukuri kepentingen kalak si deban, labo kepentingenna saja.”—1 Korinti 10:24.

•   Darami terbuen informasi. Gelah banci menang sanga erperang, sekalak prajurit perlu tehna taktik musuhna. Bage ka pe, gelah banci kam menang ngelawan alkohol, perlu tehndu terbuen kerna alkohol janah uga e banci njerat enterem kalak. Perlu ka daramindu kai si perlu lakokenndu gelah banci kam ngadi minem alkohol, janah gelah ula nai kam mulihi minem-minem.

   Nina Pustaka si Badia: “Terus min tulak kena sura-sura daging si erdosa si erperang ngelawan kena.”—1 Petrus 2:11.

•   Darami penampat. Lit mbue layanen kesehaten si fokus nampati kalak si candu minem alkohol, termasuk program ras pusat rehabilitasi bage pe rumah sakit. Banci ka pindondu penampat sekalak teman si terteki guna meteh kai saja si erban kam candu minem alkohol. Kenca si e, hubungi ia sanga turah ka mulihi sura-surandu guna minem-minem.

   Nina Pustaka si Badia: “Teman situhu-tuhu lalap ncidahken kekelengen, janah ia jadi senina sanga lit kesusahen.”—Kuan-kuanen 17:17.

 Candu minem alkohol eme masalah si serius. E la banci idungi alu terjeng mbaca sada artikel si gendek ntah pe alu ngataken, “Kukurangi kari minem-minem yah.” Tapi ingetlah, carandu ngatasi gelah lanai candu minem alkohol labo ngenca mpengaruhi kesehatenndu, tapi si e pe banci mpengaruhi perjabunndu.

 Guna ndatken terbuen informasi: Bacalah artikel-artikel enda kerna kalak si lanai candu minem alkohol:

 ”Saya Tidak Lagi Kejam Seperti Dulu”

 ”Saya Tidak Lagi Malu dengan Diri Saya”

 ”Jalanan Adalah Rumah Saya”

 Banci ka nenndu video ‘Ciga Ateku Geluhku’