PENAMPAT MAN KELUARGA
Cara Engkelengi Teman Geluh
Piga-piga kalak si enggo ertahun-tahun erjabu enggo jarang ncidahken kekelengen man teman geluhna. Adi bage si terjadi bas perjabunndu, kai si banci lakokenndu?
Kai si arus itehndu
Kekelengen e penting gelah perjabun banci paguh. Gelah banci kita tetap sehat ras megegeh, arus kita ratur man ras minem. Bage ka pe, gelah perjabun banci paguh, perbulangen ras ndehara arus terus sikeleng-kelengen. Enggo pe puluhen tahun kalak e erjabu, perlu iteh perbulangen ras ndehara maka teman geluhna tetap denga rate keleng ras rate ngena man bana.
Kekelengen e la egois. Adi keleng ateta teman geluhta, pasti ermeriah ukur ateta ia. Emaka, perbulangen ras ndehara si mehuli lalap ncidahken kekelengen man teman geluhna, labo sanga ia merhat saja ngenca. Perdiatekenna teman geluhna e gelah tehna ndigan ncidahken kekelengen man bana janah usahakenna ngelakokenca.
Biasana, ndehara perlu ikelengi lebihen asangken perbulangen. Banci jadi ngena kel ate sekalak perbulangen ndeharana. Tapi, adi katakenna keleng atena ndeharana sanga erpagi-pagi ras berngi wari saja ngenca ntah pe sope erhubungen seks ngenca, banci jadi sangsi ndeharana e tuhu-tuhu nge keleng ate perbulangenna ia ntah lang. Emaka arus rusur cidahken perbulangen kekelengenna man ndeharana.
Kai si banci lakokenndu
Kataken man teman geluhndu maka keleng atendu ia. Adi katakenndu bagenda, “Keleng ateku kam” ntah pe “Meriah kel ukurku kam jadi teman geluhku,” banci gejapken teman geluhndu maka keleng atendu ia.
Pedah Pustaka: “Kai si ibelasken rehna bas pusuh nari.”—Matius 12:34.
Si Banci Lakokenndu: Banci ka pesehndu perasanndu man teman geluhndu alu nulis surat, ngirim pesan singkat, ntah pe ngirim e-mail.
Buktiken keleng atendu teman geluhndu. Selain katakenndu man teman geluhndu “Keleng teku kam,” banci ka dakepndu ia, emandu, ntah pe jemakndu saja tanna. Adi bage banndu, banci gejapkenna maka tuhu-tuhu keleng atendu ia. Banci ka cidahkenndu kekelengenndu adi jemakndu ia alu lembut, tatapndu alu dem kekelengen, ntah pe berendu hadiah si la isangka-sangkana. Ntah pe, banci sampati perbulangen ndeharana, misalna mabaken tasna, mbukaken pintu, nuci piring ntah baju, ras erdakan. Si e ndai kerina labo penampat si biasa-biasa saja akap ndehara. Tapi e jadi bukti keleng ate perbulangenna ia.
Pedah Pustaka: “Kekelengenta ula min bas biber saja ntah pe cakap saja. Tapi arus teridah arah perbahanen.”—1 Johanes 3:18.
Si Banci Lakokenndu: Perbahanenndu man teman geluhndu bali min bagi sanga kena ngerondong mbarenda.
Banlah waktundu ras teman geluhndu. Adi banndu waktundu dua-dua ras teman geluhndu, reh paguhna me perjabunndu. Selain si e, iteh teman geluhndu maka meriah kel kapndu i deherna. Memang, banci jadi mesera kapndu dua-dua ras teman geluhndu adi enggo lit anak kena ntah pe melala si man urusen tiap wari. Adi bage, banci lakoken kena kegiaten si biasa saja, misalna rusur kena duana erdalan bas pagi-pagi wari.
Pedah Pustaka: ‘Pastiken kai si lebih penting.’—Pilipi 1:10.
Si Banci Lakokenndu: Perban sibuk, piga-piga perbulangen ras ndeharana erban waktu dua-dua guna man berngi ntah pe gawah-gawah bas akhir pekan.
Tandailah teman geluhndu. Tiap kalak perlu ikelengi, tapi beda-beda carana. Cakapkenlah ras teman geluhndu uga nge cara si ngena atena bas engkelengi ia. Cakapken ka enggo nge gejapken teman geluhndu ia ikelengi ntah lang. Kenca si e, usahakenndulah ngelakoken kai si ipindo teman geluhndu e. Ingetlah, penting kel kekelengen gelah perjabunndu tetap paguh.
Pedah Pustaka: “Kekelengen e . . . la mentingken bana.”—1 Korinti 13:4, 5.
Si Banci Lakokenndu: Ula tuntutndu gelah kelengi teman geluhndu kam. Tapi ukurilah, ‘Kai si banci kulakoken gelah reh kelengna ate teman geluhku man bangku?’