PENAMPAT MAN KELUARGA | PERJABUN

Cara Ngatasi Perasan Cemburu bas Perjabun

MAINKEN

Perjabun la banci bahagia adi perbulangen ras ndehara la siteken. Jadi, uga nge carana gelah perasan cemburu la ncedai perjabun?

Si ibahas bas artikel enda:

Salah nge perasan cemburu e?

Perasan cemburu banci turah adi lit siakap kalak si deban tertarik man pasangenta ntah pe pasangenta si tertarik man kalak si deban. Banci saja terancam siakap perjabunta. Adi bage si terjadi, wajar saja adi cemburu kita. Hubungen si ndeherna antara dua kalak eme perjabun. Emaka perbulangen ras ndeharana arus usahakenna ngelindungi perjabunna.

Nina Pustaka si Badia: “Kalak e lanai dua, tapi sada. . . . Kai si enggo persada Dibata, la banci sirangken manusia.”—Matius 19:6.

“Adi terancam perjabunta, perasan cemburu e bagi alarm kebakaren si mpersingeti kita maka lit bahaya janah mis kita bertindak.”—Benjamin.

Tapi lit ka perasan cemburu si la lit dasarna. Adi tuhu kin keleng ateta pasangenta, arusna la sipediat perasan si bage lit bas perjabunta. (1 Korinti 13:4, 7) Itulis Dr. Robert L. Leahy maka perasan cemburu si la lit dasarna, banci erban kita ngelakoken kai si ncedai hubungenta. Padahal hubungen e nge ateta sijaga. a

Engkai maka banci turah perasan cemburu la pe lit dasarna?

Banci saja gampang kam cemburu perban pernah kam ihianati pasangenndu si sebelumna. Ntah pe, banci saja ceda perjabun orang tuandu perban lit si selingkuh, janah mbiar kam bage ka kari si terjadi bas perjabunndu.

“Sanga aku kitik denga, selingkuh bapakku. Emaka trauma aku janah mesera kuakap tek man kalak si deban. Mon-mon man perbulangenku pe mesera kuakap tek.”—Melissa.

Selain si e, adi kam jelmana gampang minder, banci saja gampang kam curiga man kalak si deban perban akapndu rebutna atena pasangenndu. Ntah pe, menurutndu pasangenndu e pasti kari selingkuh adi lit kesempaten.

“Perbulangenku ipindoken temanna nampati bas acara perjabun temanna e. Enda ertina perbulangenku arus ras-ras erdalan ras diberu si deban. Sitik pe la aku setuju. Emaka, kusuruh gelah ula ueken perbulangenku pemindon temanna e.”—Naomi.

Wajar nge Naomi cemburu? Memang kebiasan bas acara perjabun labo seri bas tiap kebudayan. Janah keputusen kalak Kristen kerna si enda arus sesuai ras nasehat Pustaka si Badia. Bas pudi wari, akui Naomi maka arusna labo ia cemburu. Nina, “Sanga si e, minder aku janah kuatir aku banding-bandingken perbulangenku kari aku ras diberu si deban. Tapi kepeken, e perasanku saja.”

La soal kai si erban kam cemburu, perasan cemburu si la lit dasarna banci erban kam curiga man pasangenndu, janah tuduhndu ia la setia. Akibatna, perasan si bage banci mbahayaken perjabunndu bage pe kesehatenndu.

Nina Pustaka si Badia: “Perasan cemburu, bali bagi penakit si erban macik tulan.”—Kuan-kuanen 14:30.

Uga nge carana ngendaliken perasan cemburu?

Usahakenlah gelah reh tekna kam man pasangenndu. Asangken daram-daramindu alasen guna curiga, pangen ukurindu kai si enggo lakoken pasangenndu si erban tek kam man bana.

“Kuukuri sipat-sipat perbulangenku si mehuli. Adi ermediate ia man kalak si deban, e perban ia memang jelmana ermediate. Labo perban lit maksudna si deban. Arus ka rusur kuinget maka kai si terjadi bas perjabun orang tuaku, lenga bo tentu terjadi bas perjabunku.”—Melissa.

Nina Pustaka si Badia: “Kekelengen e . . . tek man kai pe.”—1 Korinti 13:7.

Ula mis ban kesimpulen. Dr. Leahy si enggo ituriken ndai, itulisna, “Mon-mon tek kita kai si lit bas perukurenta e enggo pasti benar. Tapi, perasan tek e la banci jadi bukti maka e enggo pasti benar.” b

“Adi rusur kita curiga janah mis siban kesimpulen, situhuna kita ndaram-ndarami masalah.”—Nadine.

Nina Pustaka si Badia: “Buktikenlah perukuren kena masuk akal man kerina kalak.”—Pilipi 4:5.

Cakapkenlah kai si kuatirkenndu. La soal kai si erban kam cemburu, turikenlah man pasangenndu gelah kena duana banci erban batasen si masuk akal sanga erurusen ras kalak si deban.

“Sanga situriken kekuatirenta man pasangenta, siusahakenlah gelah positip perukurenta kerna ia. Ula siakap sakitina atena kita. Banci saja ia pe usahakenna ngelakoken si mehulina. Ntah pe banci saja, la ia sadar kurang perhatian ia man banta. Banci ka, kita nge si metersa megelut ntah pe mbuesa nuntut.”—Ciara.