Menurut sada hasil survei, lit 97 persen anak muda si enggo nggunaken media sosial. Termasuk nge i je anakndu? Adi bage, lit piga-piga si perlu ukurindu.

Si ibahas bas artikel enda

•  Uga nge kari anakndu nggunaken waktuna?

•  Uga nge kari cara rukur anakndu kerna teman situhu-tuhu?

•  Uga nge kari pengaruhna ku perasan anakndu?

•  Uga nge kari pengaruhna ku perbahanen anakndu?

•  Arus nge anakku nggunaken media sosial?

•  Nina orang tua

 Situs web HelpGuide ngataken, “Media sosial memang enggo irancang gelah menarik, gelah tetap kam online, janah gelah rusur cekndu HP-ndu guna ngenen kai si mbaru.”

 “Tangtangna piga-piga menit saja ateku kunen media sosial, tapi la gejap kepeken enggo erjam-jam. Adi enggo mulai kunen HP, enggo mesera kel mpengadisa, padahal lit kegiaten si deban si lebih erguna.”—Lynne, 20 tahun.

 Si perlu ukuri orang tua: Banci nge kari ikutken anakku aturen si enggo kuban kerna asa dekahna banci nenna media sosial? Banci nge ban anakku batas waktuna ngenen media sosial, janah banci nge kari ikutkenna batasen si enggo ibanna e?

 Nina Pustaka si Badia: “Perdiatekenlah cara kena nggeluh, gelah kena nggeluh selaku kalak pentar . . . Gunakenlah waktu kena alu mehuli.”—Epesus 5:15, 16.

 “Media sosial” irancang gelah kalak erpengakap mbue temanna. Padahal situhuna, temanna si lit bas media sosial e lenga tentu teman situhu-tuhu.

 “Enterem kalak si salah carana rukur. Akapna adi reh buena bereken kalak like ntah pe reh buena kalak si jadi follower-na, e ertina enterem kalak si ermediate man bana. Padahal labo tandaina ise kalak ndai situhuna.”—Patricia, 17 tahun.

 Si perlu ukuri orang tua: Enggo nge angkai anakku maka terkenal bas media sosial situhuna labo penting? Adi la bas media sosial beluh nge ia erteman?

 Nina Pustaka si Badia: “Teman situhu-tuhu lalap ncidahken kekelengen, janah ia jadi senina sanga lit kesusahen.”—Kuan-kuanen 17:17.

 Menurut peneliti-peneliti adi ndekahsa kalak nggunaken media sosial, dungna banci melungen kapna, kuatir ia, janah banci ka stres.

 “Sanga siidah foto teman-temanta si sangana ras temanta si deban, tapi kita la ikut i je, seh kel getemna pusuhta.”—Serena, 19 tahun.

 Si perlu ukuri orang tua: Kai nge kari pengaruh media sosial e man anakku? Egois nge kari ia dungna? Jadi kalak si nggit ersaing nge kari ia? Terpengaruh kel nge kari ia ngidah kai si ilakoken kalak bas media sosial?

 Nina Pustaka si Badia: “Ula min kita sombong, ersaing, ntah pe sician-cianen.”—Galati 5:26.

 Bas media sosial melala kalak si i-bully. Banci ka kalak ngirim pesan, foto, ntah pe video si cabul. Selain si e, banci ka kalak ngenen pornografi. Amin pe labo lit sura-sura anakndu ngelakoken si e, banci saja dungna ia ikut-ikuten ntah pe ia si jadi korban.

 “Kai si lit bas media sosial banci saja labo lit siakap si salah, tapi ujung-ujungna kepeken la mehuli. Melala i je cakap kotor bage pe musik si la pantas.”—Linda, 23 tahun.

 Si perlu ukuri orang tua: Banci nge kari anakku nggunaken Internet alu pentar? Ngasup nge kari anakku nulak kai si la pantas bas media sosial?

 Nina Pustaka si Badia: “Ula sempat belasken kena kerna perbahanen seks si salah, ras kerina si najis ntah pe si merangap, . . . bage ka pe perbahanen si pemela-melaken, ranan si la erguna ntah pe cakap kotor.”—Epesus 5:3, 4.

 Labo arus lit media sosial gelah banci kita nggeluh, ntah pe gelah banci meriah ukurta. Enterem anak muda ipilihna la nggunaken media sosial, lit ka si pernah nggunaken media sosial tapi dungna lanai.

 “Kenca kuidah la mehuli pengaruh media sosial man kakakku, la aku nggit nggunaken media sosial. Mulai jenari reh riahna ukurku, janah puas kuakap perban reh buena kegiaten si banci kulakoken.”—Nathan, 17 tahun.

 Intina: Adi ijinkenndu atendu anakndu nggunaken media sosial, pastikenlah lebe banci batasina waktuna, banci benar cara rukurna kerna teman situhu-tuhu, janah la ia nggit ngenen kai si la mehuli.

 Nina Pustaka si Badia: “Kalak si cerdik, ukurina tiap langkahna.”—Kuan-kuanen 14:15.