Gundari, enterem anak-anak enggo lit HP-na janah banci pakena HP-na e guna mbuka Internet sanga sisada ia bas kamar. Kai saja nge bahayana adi anak-anak enggo er-HP? Kai ka gunana? Kai akibatna adi ndekahsa anak-anak main HP? a

•  Si perlu teh orang tua

•  Si perlu ukuri orang tua

•  Banci nge sidalanken tanggung jawapta selaku orang tua

 Gunana

•   Anak-anak banci aman, orang tua jadi tenang. Sekalak pernanden si gelarna Bethany lit dua anakna remaja. Nina, “Gundari seh kel bahayana. Emaka adi terjadi kai-kai, banci mis ihubungi anakta kita.”

   Sekalak pernanden si gelarna Catherine ngataken, “Arah aplikasi si lit bas HP, banci siteh ja sangana anakta. Arah aplikasi e, HP-ta banci terhubung ras HP anakta. Janah adi anakta sangana maba motor, banci siteh uga terna ia maba motor.”

•   Reh nukahna akap anak-anak ngerjaken tugas sekolah. Sekalak pernanden si gelarna Marie ngataken, “Guru mereken PR man anak-anak lewat e-mail ntah pe pesan singkat, janah arah e ka kalak e komunikasi.”

 Bahayana

•   Enggo ndekahsa main HP. Biasana, lit piga-piga jam waktu si igunaken anak muda main HP tiap wari. Tapi labo ngenca anak muda si bage, orang tua pe bage kang. Si parahna, buena waktu si igunaken orang tua main HP banci seri ras waktu si igunakenna man anak-anakna. Menurut sekalak ahli, enterem keluarga gundari seri bagi kalak si sangana pulung tapi la sitandan perban sibuk kalak e main HP. b

•   Pornografi. Menurut sada laporen, lit lebih 50 persen anak remaja si ndarami situs pornografi tiap bulan. La ateta mamang kerna si e perban arah HP menukah kel mbuka situs pornografi. William, sekalak perbapan si lit dua anakna remaja ngataken, “Sanga enggo lit HP anakta, e ertina banci reh nukahna ia ngenen pornografi.”

•   Jadi candu. Gundari, enterem kalak si enggo candu main HP. Adi la lit HP i deherna, stres ia, bingung, janah banci dungna sakit. Piga-piga orang tua ngataken maka anakna jadi anak si la sopan sanga main HP. Nina Carmen, “Mon-mon, sanga ngerana teku ras anakku, jerlengna aku janah kata-katana pe jadi la sopan perban terganggu kapna ia.”

•   Bahaya si debanna. Anak-anak si enggo er-HP banci i-bully bas Internet janah banci ka kalak e sexting. c Selain si e, banci ka kalak e sakit perban dungna kurang mejile bentuk dagingna ras perban kurang perpedem. Lit ka aplikasi si tampilenna iban bagi aplikasi biasa, contohna bagi aplikasi kalkulator, tapi situhuna isina la mehuli. Piga-piga anak muda nggunaken aplikasi e guna muniken kai si la mehuli arah orang tuana.

   Daniel, sekalak perbapan si lit anakna singuda-nguda, bagenda nina, “HP bali bagi kunci si banci mbuka pintu ku Internet, i je lit si mehuli tapi lit ka si la mehuli.”

•   ‘Enggo nge perlu anakku HP?’

   Nina Pustaka, “Kalak si cerdik, ukurina tiap langkahna.” (Kuan-kuanen 14:15) Emaka, cuba ukuri enda:

   ‘Gelah aman nge anakku maka kubereken ia HP? Enggo nge kuukuri kai saja manpaat ras bahayana? Lit nge alat komunikasi si deban si banci kubereken man anakku selain HP si lit Internetna?’

   Nina sekalak perbapan si gelarna Todd, “Gundari lit denga nge HP si banci nelpon ras ngirim SMS saja ngenca. Emaka banci sihubungi anakta make HP si bage, janah ergana pe labo merga.”

•   ‘Banci nge anakku ertanggung jawap nggunaken HP?’

   Nina Pustaka, “Pusuh kalak si pentar mabai ia ku dalan si benar.” (Pengerana 10:2) Emaka, cuba ukuri enda:

   ‘Kai saja nge buktina maka anakku e banci terteki? Nggit nge ia nceritaken kai pe man bangku? Nggit nge ia erbual man bangku, misalna sanga nceritaken kerna teman-temanna? Sedekah enda, banci nge kendalikenna dirina sanga nggunaken perangkat elektronik si deban, bagi TV, tablet, ntah pe laptop?’ Sekalak pernanden si gelarna Serena ngataken, “Memang HP mbue kel gunana, tapi mbue ka bahayana. Emaka, sope sibereken HP man anakta, arus siukuri lebe: Banci nge anakku si lenga erpengalamen ertanggung jawap nggunaken HP-na?”

•   ‘Banci nge kulakoken tanggung jawapku selaku orang tua?’

   Nina Pustaka, “Ajarkenlah kai si benar man anak si nguda denga.” (Kuan-kuanen 22:6) Emaka, cuba ukuri enda:

   ‘Uga caraku nampati anakku gelah banci gunakenna HP alu bijak? Enggo nge kuangkai fitur-fitur si lit bas HP gelah banci kuajari anakku meteh kai saja bahayana janah gelah banci ia hati-hati? Kuangkai nge carana nggunaken aplikasi parental control (aplikasi gelah la banci ibuka anak-anak situs web si berbahaya)? Daniel si enggo ibahas ndai ngataken, “Gundari melala orang tua si mereken HP man anakna, tapi kenca si e la iawasina.”

 Intina: Anak-anak perlu iajari gelah bijak nggunaken HP. Ikataken bas buku Indistractable, “Biasana anak-anak la ingetna waktu sanga main HP, apai ka adi la iawasi orang tua.”