Adi sangana anakndu santai, kai nge si ilakokenna: nonton ntah mbaca? Apai nge si biasana ibuatna: HP ntah buku?

 Situhuna puluhen tahun si lewat, enggo lanai akap kalak meriah mbaca, tangtangna perban TV janah gundari perban Internet. Bas buku Endangered Minds si iterbitken tahun 1990, lit sekalak penulis si gelarna Jane Healy ngataken, “Dungna pagi, ntah lanai bo kita mbaca.”

 Sanga kata-kata e itulis, banci jadi lit kalak si erpengakap, e la mungkin banci terjadi. Tapi gundari, enggo 30 tahun kenca si e, piga-piga guru bas erbage-bage negara si nggunaken teknologi ngataken maka mesera akap anak-anak ngangkai kai si ibacana.

Si ibahas bas artikel enda

•  Kai gunana adi meriah akap anak-anak mbaca?

•  Cara nampati anak-anak gelah meriah kapna mbaca

•  Nina orang tua

•   Banci ibayangken anak-anak kai si sangana ibacana. Contohna, sanga sibaca sada cerita, biasana banci sibayangken uga sora kalak ntah pe tokoh si lit bas cerita e, penampilenna, bage pe ingan-ingan si iceritaken. Memang lit piga-piga keterangen si enggo ikataken penulis, tapi lit denga ka keterangen si deban si banci ibayangken kalak si mbacasa.

   Sekalak pernanden si gelarna Laura ngataken, “Memang meriah nge nonton video ntah pe film, tapi situhuna kai si tontonna e eme kai si ibayangken kalak si deban. Adi kita mbaca, kita sendiri si mbayangkenca. Emaka pasti meriah kel siakap.”

•   Banci reh ulina sipat anak-anak. Mbaca banci nampati anak-anak reh beluhna ndungi masalah. Selain si e, sanga mbaca, anak-anak arus konsentrasi. Alu bage, erlajar ia gelah reh sabarna, terkuasaina dirina, ras ukurina kalak si deban.

   Kai hubungenna mbaca ras ngukuri perasan kalak si deban? Menurut piga-piga peneliti, adi tutus ate anak-anak mbaca sada cerita janah la ia buru-buru, banci angkaina perasan kalak ntah pe tokoh si lit bas cerita e. Hasilna, mbelin kemungkinenna nggit ka ia ngukuri perasan kalak si deban si itandaina.

•   Banci reh bagesna anak-anak rukur. Tiap anak labo seri terna mbaca. Adi la ia buru-buru mbaca, janah ulihina ka bagin si mesera kapna ngangkaisa, dungna banci angkaina kai kin maksud si penulis. Hasilna, banci reh dekahna ingetna kai si bacana janah banci ukurina kai pelajarenna.—1 Timotius 4:15.

   Sekalak perbapan si gelarna Joseph ngataken, “Sanga kita mbaca, banci siukuri kai erti sada kalimat, sihubungken ras kai si enggo siteh, janah siukuri kai pelajarenna man banta. Adi kita nonton, banci saja la bage bagesna kita rukur.”

 Intina: Memang nonton video ntah pe film lit nge gunana, tapi anak-anak perlu ka mbaca, perban e pe seh kel belinna gunana.

•   Lampaslah mulai. Chloe, si lit dua anakna dilaki ngataken, “Sanga anak kami bas bertin denga, enggo mbaca kami man kalak e. Terus lakoken kami si e seh ngasa kalak e lahir. Enda la sia-sia. Gundari enggo terbiasa kalak e mbaca janah meriah kapna mbaca.”

   Nina Pustaka si Badia: “Mulai kin kam lahir enggo tandaindu Kitap si Badia.”—2 Timotius 3:15.

•   Melala lah ban buku bas rumahndu. Adi melala buku bas rumahndu, banci reh nukahna akap anak-anak ndatken kai si man bacanna. Tamara, si lit empat anakna ngataken, “Daramilah buku-buku si banci saja meriah akap anakndu mbacasa, janah tamalah e i deher ingan medemna.”

   Nina Pustaka si Badia: “Ajarkenlah kai si benar man anak si nguda denga, gelah enggo pe pagi ia metua, la ia nilah je nari.”—Kuan-kuanen 22:6.

•   Batasi nggunaken Internet. Sekalak perbapan si gelarna Daniel ngataken, “Usahaken kami sada keluarga gelah la nonton TV silang-langna sada berngi bas sada minggu. Gunaken kami waktu e guna mbaca ras-ras ntah pe mbaca masing-masing.” Emaka isarankenna gelah keluarga-keluarga si deban pe banci bage.

   Nina Pustaka si Badia: “Pastiken kena kai si lebih penting.”—Pilipi 1:10.

•   Jadilah contoh. Karina, si lit dua anakna diberu, mereken saran enda: “Sanga bacakenndu sada cerita man anak-anak, semangatlah kam mbacasa, janah menarik ban cerita e. Adi meriah kapndu mbaca, banci saja anak-anakndu pe dungna meriah kapna mbaca.”

   Nina Pustaka si Badia: “Teruslah atendu tutus mbaca i lebe-lebe jelma si enterem.”—1 Timotius 4:13.

 Memang, labo kari kerina anak meriah kapna mbaca. Tapi usahandu guna nampati kalak e labo sia-sia. David si lit dua anakna diberu, labo saja erusaha gelah meriah akap anakna mbaca. Nina, “Kubaca ka buku-buku si baca kalak e. Dungna kuteh kai si meriah akapna janah lit bahan kami cerita. Ban kami ka kelompok mbaca. Seh kel kap kami riahna!”