Kitik denga pe anakndu, banci saja enggo idahna la seri perbahanen kalak man sada ras si debanna perban lit perbedan warna kulit, suku, ntah pe bangsa. Uga carandu nampati anakndu gelah ula ia terpengaruh? Kai si banci lakokenndu adi anakndu si jadi korbanna?

Si ibahas bas artikel enda:

•  Cara njelasken kerna erbage-bage suku ras bangsa man anak-anak

•  Cara njelasken masalah perbedan suku ras budaya man anak-anak

•  Cara mereken usihen si mehuli

•  Adi anakndu si jadi korban perbahanen si la adil

 Si banci jelaskenndu man anakndu. Kerina kalak bas doni enda, beda-beda nge kerina. Tapi lit kalak, perbedan e banna jadi alasenna guna nokohi kalak si beda penampilenna ras budayana.

 Tapi nina Pustaka si Badia, kerina kita sada nge nini bulangta. Emaka banci ikataken, kita kerina sada keluarga.

 “Perban anak-anak kami erteman ras kalak arah erbage-bage latar belakang, banci iteh kalak e maka kerina kalak arus ikelengi ras iergai la soal kai suku ras budayana.”​—Karen.

 Lit nge kari waktuna, pasti begi anakndu berita kerna perbahanen si la adil ntah pe kejahaten si ilakoken kalak perban perbedan suku ntah pe budaya. Adi bage, uga carandu njelasken masalah e man anakndu? Lit piga-piga cara guna njelaskenca sesuai ras umur anakndu.

•   Umur 5 tahun ku teruh. Nina Dr. Allison Briscoe-Smith, bas majalah Parents, “Anak-anak megermet kel ia ngidah perbahanen si adil ras si la adil. Situhuna, e banci jadi kesempaten si mehuli man orang tua guna ncakapken kerna kai si adil ras si la adil man anakna.”

•   Umur 6-12 tahun. Anak-anak si umurna 6 tahun seh ku 12 tahun, biasana kalakna penasaren. Mon-mon, mesera penungkunen kalak e, tapi arus usahakenndu mereken jawapen si mehulina. Cakapken ras anakndu kerna kai si idahna bas sekolah, bas TV, ntah pe bas Internet. Banlah topik e jadi kesempaten guna mbahas maka la mehuli adi la adil perbahanenta man kalak si beda suku ras budayana ras kita.

•   Umur 13-19 tahun. Anak remaja biasana enggo banci ukurina terdauhen kerna sada masalah. Emaka, i je me kesempaten si mehulina guna mbahas kerna perbahanen si la adil perban masalah suku ntah pe budaya.

 “Penting kel akap kami ncakapken masalah perbedan suku ras budaya ras anak kami. Perban i ja pe kalak e kari tading, pasti adapi kalak e masalah si bage. Adi lenga pernah cakapken kami masalah e ras anak kami, menukah kari kalak e terpengaruh perukuren jelma si enterem. Dungna melala kari informasi si lenga tentu benar, tuhu akap kalak e.”​—Tanya.

 Biasana, anak-anak ngusih kai si ilakoken orang tuana. Emaka penting kel ukuri orang tua kai si ikatakenna ras si ilakokenna. Contohna:

•   Tokohindu ntah jadi pertawan nge banndu suku ntah pe budaya kalak? “Biasana, iperdiateken anakndu kam, janah usihna kai si ilakokenndu,” nina Akademi Psikiatri Anak dan Remaja Amerika Serikat.

•   Meriah nge kapndu erteman ras kalak si beda suku ras budayana ras kam? Nina dokter anak Alanna Nzoma, “Adi erteman atendu anakndu . . . ras kalak si erbage-bage latar belakangna, kam pe arus bage.”

 “Rusur undang kami ku rumah kami kalak arah erbage-bage suku ras budaya. Pan kami pangan kalak e, pelajari kami musikna, janah pake kami ka baju arah daerah kalak e. Sanga cakapken kami kerna kalak si deban ras anak kami, si bahas kami labo kerna perbedan suku ntah pe budaya kami. La ka banding-bandingken kami suku kami ntah pe budaya kami ras kalak e.”​—Katarina.

 Enterem kalak ncakapken kerna hak asasi manusia, tapi melala denga perbahanen si la adil. Emaka, banci saja anakndu si jadi korbanna, apai ka adi beda suku ntah pe budaya anakndu ras teman-temanna. Adi e si terjadi . . .

 Darami lebe faktana. Sengaja nge bage perbahanenna, ntah lang? (Jakup 3:2) Perlu nge ipertanggung jawapkenna masalah e, ntah banci lupakenndu saja?

 Memang perlu kel kita seimbang. Lit nasehat bas Pustaka si ngataken, “Ula meter tersinggung.” (Pengerana 7:9) Adi la adil perbahanen kalak man bandu perban perbedan suku ntah budaya, si e labo masalah si sepele. Tapi sanga la adil perbahanen kalak man bandu, lenga tentu perban segat atena suku ntah pe budayandu.

 Memang beda-beda kerina situasina. Emaka, sope dungindu sada masalah, ukuri lebe kai kin situhuna si terjadi.

 Kenca tehndu kai kin situhuna terjadi, ukurilah penungkunen enda:

•   ‘Adi ianggap anakku asal tokohi kalak ia gara-gara beda suku ras budayana, erguna nge perukuren si bage man bana?’

•   ‘Lit nge gunana man anakku adi ikutkenna nasehat bas Pustaka si ngataken, “Ula padah latihsa akapndu ngukuri kerina ranan kalak”?’​—Pengerana 7:21.

 Uga adi tempa-tempa sengaja bage banna? Ajari anakndu gelah tehna maka tanggapenna banci nentuken reh ulina, ntah reh parahna kari situasina. Mon-mon, lit kalak si gangguna ntah pe bully-na kalak si deban perban merhat ia ngidah uga kari tanggapenna. Adi bage si terjadi, mungkin cara si mehulina ngadapisa eme la padah tanggapindu.

 Banci cakapken anakndu ras kalak si ngganggu ia, adi situasina la mbahayaken ia. Mungkin alu sopan banci bagenda nina anakndu, “La kuakap cocok bage banndu ya.”

 Uga adi perlu kapndu ngelaporken masalah e? Adi anakndu enggo bas bahaya ntah pe masalah e enggo serius, laporkenlah man guru sekolahna ntah pe man polisi adi perlu akapndu.