“Situhuna teh kami bahayana pornografi. Angkai kami e seh kel bahayana. Tapi la sangka kami kepeken anak kami si diberu, banci ka nukah kapna ngidahsa.”—Nicole.

Si ibahas bas artikel enda:

•  Si perlu tehndu

•  Cara ngelindungi anakndu arah pornografi

•  Adi anakndu enggo sempat ngenen pornografi

 Si perlu tehndu

 Pornografi banci idat anak si kitik denga. Menurut penelitian, rata-rata umur anak-anak si tangtangna ngidah pornografi eme 11 tahun.

 Pornografi banci idat anak-anak amin pe la daramina. Contohna, banci saja idahna pornografi sanga daramina informasi bas Internet ntah pe sangana ngenen-ngenen bas media sosial. Ntah pe, iklan pornografi banci saja rempet-rempet reh sanga kalak e main game online. Pornografi lit bas erbage-bage format, si mbuena eme foto ras video. Memang lit ka bas bentuk tulisen bage pe rekamen audio, janah enda nukah ibaca ras ibegiken arah Internet ntah pe i-download.

 Perlu ka iteh orang tua maka banci kirimken kalak bahan-bahan si cabul man anak kalak e secara elektronik, contohna arah pesan-pesan ku HP anakna e. Bas sada penelitian man lebih 900 anak muda, hampir 90 persen anak si diberu janah hampir 50 persen anak si dilaki ngataken maka rusur idat kalak e video ras foto telanjang arah teman-teman sekelasna.

 Pornografi si rusurna idah kalak eme si lit kekerasenna. Jenis pornografi si riahna akap kalak ngidahsa janah si mbuena tersedia biasana lit kekerasenna, janah kekerasen e rusuren man diberu.

 Pornografi la mejile pengaruhna man anak-anak. Menurut penelitian, adi anak-anak ngenen pornografi, belinen kemungkinenna kalak e:

•   mesera akapna ngikuti pelajaren i sekolah

•   rusur la tenang, depresi, janah rendah diri ntah pe minder

•   wajar akapna maksaken kalak si deban erhubungen seks

 Intina: Anak-anak banci nukah kel kena pengaruh si la mehuli arah pornografi, janah orang tuana me si bancina kel ngelindungi kalak e.

 Nina Pustaka si Badia: “Kata-kata si kupeseh wari enda arus lit bas pusuh kena, arus ulih-ulihi kena ngajarkenca man anak-anak kena. Cakapkenlah e sanga kundul i rumah, sanga bas perdalanen, sanga nandangi medem, ras sanga kena medak.”—Ulangen 6:6, 7.

 Cara ngelindungi anakndu arah pornografi

 Usahakenlah gelah reh buena si tehndu. Ukurilah katawari ras i ja banci saja idat anakndu pornografi. Contohna, banci nge bukana Internet bas jam istrahat sekolah janah la lit si ngawasisa?

 Daramilah informasi kerna fitur keamanen kai saja si lit bas HP anakndu, janah aplikasi si uga nge si gunakenna bage pe game kai si mainkenna. Contohna, piga-piga aplikasi pesan elektronik lit fiturna guna ngapus pesan secara otomatis kenca piga-piga waktu, emaka teks, gambar, ntah pe video si cabul banci otomatis terhapus janah la itehndu. Selain si e, reh buena ka game online si pemainna banci nonton pornografi ntah pe erhubungen seks secara virtual bas game e.

 “Arah pengalamenku, adi lit HP anakta, kita orang tua arus siteh uga cara nggunakenca, cara mbatasi kai si banci idah anakta bas HP-na alu nggunaken fitur ‘parental controls’ (kontrol orang tua), bage pe cara mereksa kai saja si lakoken anakta bas HP-na.”—David.

 Usahakenlah asa bancina gelah la inen ntah pe ibegiken anakndu pornografi. Lit si banci lakokenndu. Contohna, banlah pengaturen bas HP anakndu bage pe bas kerina perangkat i rumahndu gelah bahan-bahan si cabul banci terblokir. Aktifken fitur parental controls. Janah arus tehndu kerina kata sandi si igunaken anakndu.

 “Adi aku, kupasang fitur ‘parental controls’ bas kerina perangkat kami. Kubatasi ka acara-acara si banci itonton anakku arah TV kami si terhubung ku Internet, janah kuteh PIN HP-na.”—Maurizio.

 “La kubereken anakku nonton video bas kamarna adi tutupna pintu. Janah adi enggo waktuna medem, la banci baba kalak e perangkat elektronikna ku kamar.”—Gianluca.

 Persiapkenlah anakndu. Sekalak pernanden si gelarna Flavia ngataken, “Piga-piga orang tua la nggit ncakapken kerna pornografi ras anakna. Menurut kalak e, labo kari mungkin lit masalah anakna kerna pornografi.” Lit ka orang tua si erpengakap, ‘Adi kucakapken kari kerna pornografi, e kang kari dalan-dalanna maka darami anakku pornografi.’ Tapi cara rukur si bage la benar. Orang tua si bijaksana ajarina anakna kerna bahayana pornografi sope idat anak e. Kai nge si banci lakokenndu?

 Ajarilah anakndu si kitik denga kai si arus lakokenna adi datna bahan si cabul. Contohna, banci tutupna matana ntah pe matekenna perangkat elektronikna. Janah ajari ia gelah katakenna man bandu kai si idahna ntah pe si begina. a

 “Kataken kami man anak kami kerna bahayana pornografi mulai kin ia kitik denga. Sanga umurna kira-kira 11 tahun, lit iklan pornografi si reh ku ‘game’ si i-downloadna bas HP-na. Bas gambar e, lit ka undangen guna ngirimken fotona sendiri. Perban enggo pernah bahas kami kerna kai si arus lakokenna, mis dahina aku janah katakenna man bangku.”—Maurizio.

 Sampatilah anakndu si enggo tergalangen nulak godan guna nonton, megiken, ntah pe mbaca bacan si isina pornografi. Contohna, sampati kalak e erban perjanjin kerna kai si lakokenna adi datna pornografi janah engkai maka lakokenna bage. Banci ka tuliskenna kai akibatna adi sengaja tontonna pornografi. Misalna, e banci erban lanai lit harga dirina, lanai tek orang tuana man bana, bage pe ceda hubungenna ras Dibata. b

 “Kenca enggo reh galangna anak-anakta, sampatilah kalak e nulak godan guna ngenen pornografi alu ngukuri akibat jangka panjangna.”—Lauretta.

 “Adi angkai anakta kai bahayana pornografi janah tehna uga perasan Jahwe nandangi pornografi, e banci ngelindungi kalak e.”—David.

 Rusurlah ngerana ras anak-anak. Tek kam ntah lang, situhuna anak-anak merhat ia ncakapken ras orang tuana kerna kai si lit hubungenna ras seks, termasuk pornografi. Nina Dame Rachel de Souza, komisioner guna komisi perlindungen anak bas Inggris, “Si penting [man anak-anak] eme ngerana man kalak e sanga kalak e kitik denga janah rusur ngerana-ngerana. Merhat anak-anak ncakapken kerna si e, janah pembahasenna perlu isesuaiken ras umur kalak e.”

 “Sanga aku kitik denga, lit topik-topik si la pernah cakapken orang tuaku ras aku. Tapi situhuna, ulin adi mbarenda cakapken kami alu terbuka. Gundari kenca lit anakku, kuusahaken rusur ngerana-ngerana ras anakku kerna seks janah cakapken kami alu santai.”—Flavia.

 Adi anakndu enggo sempat ngenen pornografi

 Tetaplah kam tenang. Adi enggo kepeken tonton anakndu, begikenna, ntah pe bacana bahan si isina pornografi, usahakenlah ngendaliken reaksindu. Banci saja enggom kapna salah bana, sengget ia, ntah pe terganggu ia perban kai si lakokenna. Adi merawa-rawa ka kam man bana, perasanna banci reh hancurna. Janah banci saja lanai ia nggit ngatakenca man bandu sanga terjadi ka si e mulihi.

 Usahakenlah gelah tehndu kai kin situhuna si terjadi. Asangken langsung banndu kesimpulen, cubakenlah nungkuni anakndu uga maka banci sempat datna pornografi. Contohna, lit nge kalak si ngirimken gambar si cabul man bana ntah ia sendiri si ndatkenca? Enda denga nge tangtangna terjadi ntah enggo pernah nenna pornografi sebelumna? Lit nge fitur parental controls ntah pe fitur pengaman si debanna bas HP-na ntah pe tabletna? Adi ue, sengaja nge ia ndarami cara gelah banci tetap nenna pornografi? Sanga sungkunindu anakndu kerna si enda, perlu ingetndu tujunndu gelah banci ceritakenna perukurenna ras perasanna, labo guna ngerawai ia.

 Ula sinik saja. Adi la sengaja enggo dat anakndu pornografi, banci saja perlu sesuaikenndu pengaturen si lit bas fitur parental controls ntah pe fitur keamanen si debanna bas HP ntah tablet anakndu.

 Adi sengaja darami anakndu pornografi, perlu berekenndu disiplin si perkeleng, tapi tegas. Sampatilah anakndu gelah reh paguhna tekadna nulak pornografi. Banci bahas kena ayat-ayat bagi Jop 31:1, Masmur 97:10, ras Masmur 101:3. c Kataken man bana maka tiap minggu, cakapken kena pagi kerna si enda guna ngenen enggo nge ia berhasil nulak pornografi, bage pe ntah lit denga si deban si banci lakokenndu guna nampati ia.