Apai nge riahen akap anakndu: mbaca arah buku ntah mbaca arah perangkat elektronik?

 Gundari enterem anak-anak riahen akapna mbaca arah HP ntah pe tablet. Sekalak pakar psikologi si gelarna Dr. Jean M. Twenge ngataken, “Anak-anak gundari enggo terbiasa langsung klikna link ntah pe geserna layar HP-na gelah banci nenna halamen seterusna. Emaka, mesera akap kalak e konsentrasi sanga mbaca buku. Bosan akapna mbaca arah buku.” a

 Memang lit nge kelebihenna adi mbaca kita arah HP ntah pe tablet. John, si umurna 20 tahun ngataken, “Mbarenda sanga sekolah, pake kami buku elektronik. Banci kugunaken kotak pencarian bas HP-ku gelah banci meter kudat informasi bas buku-buku e.”

 Lit piga-piga kelebihen si deban. Misalna, sanga mbaca kita arah HP ntah pe tablet, sekali klik saja pe banci sinen erti sada kata, banci siputar rekamen audio, sitonton video kerna topik si sangana sibaca, ntah pe sibuka link si isina informasi tambahen. Tapi situhuna, mbaca arah buku ras bahan tercetak si debanna pe melala kelebihenna.

 Piga-piga kalak riahen kapna mbaca arah buku ntah pe bahan tercetak si debanna sanga pelajarina atena sada bahan terbagesen. Engkai maka bage?

•   Banci lebih konsentrasi. Sekalak remaja si gelarna Nathan ngataken, “Sanga mbaca aku arah HP ntah pe tablet, rusur lit iklan ras notifikasi si masuk, dungna mesera kuakap konsentrasi.”

   Karen, si umurna 20 tahun, bage kang perasanna. Bagenda nina, “Sanga mbaca aku arah HP ntah pe tablet, rusur aku tergoda mbuka aplikasi si deban ntah pe main game.”

   Nina Pustaka si Badia: “Gunakenlah waktu kena alu mehuli.”​—Kolose 4:5.

   Cuba ukuri: Banci nge anakndu konsentrasi sanga mbaca ntah pe erlajar alu nggunaken perangkat elektronik? Adi lang, kai nge si banci lakokenndu guna nampati ia gelah banci lebih konsentrasi?

   Saran: Kataken man anakndu adi la ia konsentrasi sanga erlajar perban kai si lit bas HP ntah pe tabletna, tugasna la kari dung-dung janah e banci erban lanai lit waktuna ngelakoken kegiaten si deban.

•   Banci lebih angkaina. Buku Be the Parent, Please ngataken, “Menurut mbue penelitian, banci lebih siangkai kai si sangana sibaca adi sipake bahan si tercetak, labo arah HP ntah pe tablet.”

   Salah sada alasenna, sanga mbaca kita arah HP ntah pe tablet, biasana meter kel kita mbaca janah labo siukuri kel kai si sangana sibaca. Emaka, banci jadi labo siangkai kel isina. Sekalak penulis si gelarna Nicholas Carr ngataken, “Sanga kita mbaca arah Internet, biasana mbue kel ateta sipepulung informasi. Emaka mata ras jarita meter kel bergerak.” b

   Memang mon-mon, mbaca alu meter lit gunana. Tapi menurut Carr, si jadi masalahna “kai pe meter ateta sibaca janah e enggo jadi kebiasanta.” Banci jadi anakndu pe terbiasa meter mbaca tapi la tuhu-tuhu angkaina kai si bacana.

   Nina Pustaka si Badia: “Arah kerina si datndu, datken ka pengertin.”​—Kuan-kuanen 4:7.

   Cuba ukuri: Kai si banci lakokenndu guna nampati anakndu gelah banci daramina terbuen keterangen, la soal ia mbaca arah buku ntah pe arah perangkat elektronik?

   Saran: Seimbanglah kam milih mbaca arah buku ntah pe arah perangkat elektronik perban masing-masing lit kelebihenna. Misalna adi mbaca kita arah perangkat elektronik, lit piga-piga fitur si banci nampati kita gelah lebih siangkai bahan si sangana sibaca. Emaka, sanga icakapkenndu ras anakndu kerna kelebihen ras kekurangen tiap pilihen, masuk akal lah kam. Selain si e, ingetlah maka tiap anak la seri.

•   Banci lebih ingetna. Bas sada artikel si iterbitken Scientific American, Ferris Jabr ngataken, ‘Latihen akap otakta mbaca arah perangkat elektronik asangken mbaca arah bahan si tercetak janah seran ka siakap ngingetsa.’

   Sanga mbaca buku, banci lebih siinget informasi si enggo sibaca perban banci sibayangken ja letakna bas buku e. E bali bagi “peta” bas pikirenta si banci sipake sanga perlu ka kari kita informasi e.

   Memang menurut penelitian, reh nukahna siakap nginget kai si enggo sibaca adi sibaca arah bahan si tercetak. Enda banci terjadi perban kai si enggo sibaca e tuhu-tuhu masuk ku pikirenta.

   Nina Pustaka si Badia: “Jagalah kepentaren ras kengasupen rukurndu.”​—Kuan-kuanen 3:21.

   Cuba ukuri: Mesera nge akap anakndu ngangkai ntah pe nginget kai si enggo ibacana ntah pe ipelajarina? Adi ue, uga carandu nampati anakndu gelah reh ulina carana erlajar? Ulin nge adi gunakenna bahan si tercetak?

   Saran: Cuba ukuri si apai si buen gunana man anakndu: perangkat elektronik ntah buku. Ula banndu keputusen arah kai si meriah akap anakndu saja. Enterem kalak si ngataken maka angkaina nge informasi si bacana arah perangkat elektronik. Padahal situhuna banci saja labo bage.