PENAMPAT MAN KELUARGA | CARA NGAJARI ANAK
Anak-Anak ras HP—Bagin 2: Ngajari Anak gelah Bijak Nggunaken HP
HP eme alat si canggih. HP e banci erguna tapi lit ka bahayana, tergantung uga carata nggunakenca. Emaka, kai nge si banci ilakoken orang tua gelah banci sampatindu anakndu nggunaken alat si canggih enda alu bijak? Contohna, bas sada wari asa kai nge dekahna anakndu banci main HP? a
Si perlu teh orang tua
Bas HP banci idah anak-anak kai si la mehuli. Anak-anak si nggunaken HP banci nenna kai pe si lit bas Internet, termasuk ngenen kai si la mehuli. Bage me si ikataken bas artikel “Anak-Anak ras HP—Bagin 1: Enggo nge Cocok Anakku Er-HP?”
“Rusur kita lupa maka bas HP banci idah anak-anak kai si la mehuli. Selain si e, banci ka kalak e terhubung ras kalak jahat.”—Brenda.
Anak-anak perlu iajari gelah bijak. Memang beluhen anak-anak nggunaken teknologi asangken orang tua, perban enggo terbiasa kalak e nggunakenca kitik-kitik nari. Tapi, labo maksudna maka la iangkai orang tua cara nggunaken teknologi. Janah labo ka maksudna maka enggo pasti iangkai anak-anak uga carana nggunaken HP alu bijak.
Memang, banci jadi beluhen anakndu nggunaken HP asangken kam, tapi perlu denga ia iajari orang tuana gelah bijak ras ertanggung jawap nggunaken HP.
“Adi sibereken anakta HP, perlu siajari ia uga cara nggunakenca alu bijak. Adi la siajari, e bali bagi sibereken anakta maba motor ras sikataken, ‘Hati-hati ya,’ padahal lenga siajari ia uga carana maba motor.”—Seth.
Si banci ilakoken orang tua
Pelajarilah fitur-fitur kai saja si lit bas HP anakndu. Contohna:
Fitur kai saja nge si banci kugunaken gelah ula ndekahsa anakku main HP, ras gelah banci kuteh situs kai saja si ibukana?
Tehndu nge maka fitur-fitur si igunakenndu e pe labo jaminen maka lanai banci ibuka anakndu situs si la mehuli?
Adi tehndu fitur-fitur si lit bas HP anakndu, reh nukahna akapndu ngajari anakndu nggunaken HP alu bijak.
Nina Pustaka si Badia: ‘Pemeteh erban sekalak jelma reh gegehna.’—Kuan-kuanen 24:5.
Ban aturen. Kam si ngatursa kai si banci ilakoken anakndu ras si la banci ilakokenna. Contohna:
Banci nge anakndu main HP sanga kena man, ntah pe sanga pulung ras keluarga bage pe ras teman?
Banci nge anakndu main HP sisada bas kamar?
Aplikasi kai saja nge si banci ipake anakndu?
Bas sada wari, asa kai nge dekahna anakndu banci main HP?
Lit nge banndu aturen asa kai dekahna anakndu banci main HP?
Perlu teh anakndu aturen si ibanndu, janah adi la ia patuh man aturen e perlu hukumndu ia.
Nina Pustaka si Badia: “Ula kam mbiar ndisiplin anakndu.”—Kuan-kuanen 23:13.
Pereksa HP anakndu. Perlu tehndu password (kata sandi) HP anakndu. Banci ka pereksandu isi HP-na, isi chat-na, aplikasi, foto, ras situs Internet si ibukana.
“Kataken kami man anak kami maka banci rempet-rempet ipereksa kami HP-na. Adi la ia patuh man aturen si iban kami, lanai ia bebas nggunaken HP.”—Lorraine.
Arus iteh orang tua kai saja isi HP anakna.
Nina Pustaka si Badia: “Anak si kitik denga pe banci itandai arah perbahanenna, benar ras bersih ntah lang lagu langkahna.”—Kuan-kuanen 20:11.
Ajari anakndu ngelakoken kai si benar. Ateta min anakta ngelakoken kai si benar arah pusuhna nari, labo perban ipaksa. Engkai? Perban adi la arah pusuhna nari ngelakoken kai si benar, lit lalap cara anak e muniken kesalahenna arah orang tuana. b
Emaka, ajarilah anakndu gelah mehuli sipat-sipatna. Banci iajarindu ia gelah jadi kalak si jujur, ngasup nguasai diri, ras ertanggung jawap. Adi sipat-sipat e lit bas anakndu, banci ia bijak sanga nggunaken HP.
Nina Pustaka si Badia: ‘Kalak si dewasa rusur pakena kengasupen rukurna, alu bage terlatih ia bas mbedaken kai si benar ras kai si salah.’—Heber 5:14.