Bage lalap si terjadi: Perbulangenna tereteh nonton pornografi. Mindo maap kel ia man ndeharana, janah erjanji ia lanai pagi tontonna. Ngasa piga-piga waktu memang lanai tontonna, tapi kenca si e mulihi ka lakokenna kebiasan si la mehuli e, janah tereteh ka. Mulih-ulih terjadi si bage.

 Kam pe bage nge situasindu? Mesera nge kapndu ngadi nonton pornografi? Adi bage, perlu tehndu kai pengaruh kebiasanndu si la mehuli e man teman geluhndu, janah perlu ka tehndu uga carana gelah banci kam tuhu-tuhu ngadi nonton pornografi seh rasa lalap. a

Si ibahas bas artikel enda:

•  Si perlu tehndu

•  Si banci lakokenndu

•  Adi perbulangenndu nonton pornografi

 Pornografi banci ncedai perjabun. Adi perbulangen nonton pornografi, banci segat ate ndeharana man perbulangenna e janah lanai ia tek man perbulangenna. b

 Perbulangen si nonton pornografi banci erban bagenda dungna perasan ndeharana:

•   Ihianati kapna ia. Sekalak ndehara si gelarna Sarah ngataken, “Bagi tempa mulih-ulih kuakap perbulangenku selingkuh.”

•   Rendah kapna bana. Sekalak ndehara ngataken maka kebiasan perbulangenna nonton pornografi erban ndehara e erpengakap “mejin kapna bana janah mela ia.”

•   Lanai ia tek man perbulangenna. Sekalak ndehara si gelarna Helen ngataken, “Lalap aku curiga man perbulangenku.”

•   Lalap kuatir. Sekalak ndehara si gelarna Catherine ngakui, “Tiap wari lalap aku kuatir man kebiasan perbulangenku. Ku je lalap ukurku.”

 Cuba ukuri: Ikataken bas Pustaka si Badia maka perbulangen arus engkelengi ndeharana. (Epesus 5:25) Adi tuhu kin keleng ate perbulangen man ndeharana, nggit nge ia erban perasan ndeharana bagi si enggo ituriken ndai?

 La menukah mpengadi kebiasan nonton pornografi. Sekalak ndehara si gelarna Stacey ngataken, “Perbulangenku banci ngadi ngisap, ngadi make narkoba, ras ngadi minem-minem. Tapi ngasa gundari, mesera denga kapna ngadi nonton pornografi.”

 Adi kam pe mesera akapndu, saran-saran enda banci nampati kam mpengadi kebiasan si la mehuli e seh rasa lalap.

•   Arus angkaindu maka pornografi e la mehuli. Pornografi banci erban kalak ngukuri kepuasenna saja, dungna perjabunna la bahagia. Engkai? Perban bas perjabun penting kel kekelengen, kesetian, bage pe siteken man sada ras si debanna gelah banci bahagia. Kalak si nonton pornografi la ngergai Dibata Jahwe, Si Nciptaken perjabun.

   Nina Pustaka si Badia: “Kerina kalak arus ergaina perjabun.”​—Heber 13:4.

•   Ula salahken kalak si deban. Ula nindu, ‘Aku nonton pornografi perban kurang kuakap kekelengen ndeharaku man bangku.’ La adil adi salahkenndu ndeharandu. Malahen, e banci jadi alasenndu guna mulihi nonton pornografi sanga banna kam kecewa.

   Nina Pustaka si Badia: “Tiap kalak icubai sanga itarik janah igoda alu sura-surana.”​—Jakup 1:14.

•   Ngeranalah kam alu jujur ras terbuka man teman geluhndu. Sekalak perbulangen si gelarna Kevin ngataken, “Tiap wari terbuka aku ngerana man ndeharaku. Kukataken man bana adi lit kunen kai si la pantas, ntah pe adi berhasil aku nulaksa. Dungna, iteh ndeharaku maka la lit kai pe si kubuniken arah ia.”

   Nina Pustaka si Badia: “Ersura-sura kami gelah jujur bas kai pe.”​—Heber 13:18.

•   Lalaplah hati-hati. Amin pe enggo ertahun-tahun lanai tontonndu pornografi, sura-sura e banci reh ka mulihi. Kevin, si iceritaken ndai ngataken, “Enggo sepuluh tahun aku ngadi nonton pornografi janah kuakap masalahna enggo dung. Tapi, kepeken lit denga sura-sura e. E bagi musuh si kejam si sangana cebuni janah nimai waktu si tepat guna nyerang aku.”

   Nina Pustaka si Badia: “Kalak si paguh kapna pertedisna, hati-hatilah gelah ula ia ndabuh.”​—1 Korinti 10:12.

•   Sanga reh sura-sura si salah, tahan lebe. Mungkin la banci cegahndu reh sura-sura si salah e. Tapi, banci pilihndu la ngikutken sura-sura e. Sura-sura e banci bene, janah banci saja reh terna sura-sura e bene adi usahakenndu ngukuri si deban.

   Nina Pustaka si Badia: “Masing-masing kena arus teh kena uga nguasai daging kena gelah tetap badia ras mehamat. Labo bagi [kalak] si la terkuasaisa napsu seksna janah la pernah puas.”​—1 Tesalonika 4:4, 5.

•   Hindari situasi si banci erban mulihi ka lakokenndu kebiasan si la mehuli e. “Sada buku si erjudul Willpower’s Not Enough (Sura-Sura Saja La Bias) ngatakan, “Adi kam lit bas situasi si erban kam tergoda, tempa-tempa sangana pegarandu korek api. Sitik saja pe bensinna . . . banci erban gurlah api e.”

   Nina Pustaka si Badia: “Ula min pediat kai pe si jahat nguasai aku.”​—Masmur 119:133.

•   Ula bene arapenndu. Mungkin melala waktu si iperluken, banci saja ertahun-tahun dekahna gelah banci tek mulihi teman geluhndu man bandu. Tapi, melala pasangen enggo mbuktiken maka e banci terjadi.

   Nina Pustaka si Badia: “Kekelengen e sabar.”​—1 Korinti 13:4.