Enggo. Bas Pustaka si Badia enggo ikataken maka sipat kalak bas jamanta reh jahatna. Perban sipat kalak reh jahatna, dungna lanai mehuli perbahanenna man sada ras si debanna. a (2 Timotius 3:1-5) Tapi ikataken ka bas Pustaka maka labo kerina kalak bage. Lit kalak si erusaha la ipengaruhi perukuren doni enda, janah usahakenna ngelakoken kai si ngena ate Dibata.​—Jesaya 2:2, 3.

Si ibahas bas artikel enda

•  Uga nge nina Pustaka kerna perukuren ras perbahanen kalak bas jamanta gundari?

•  Kai nge akibatna man kalak si deban adi lit kalak si mentingken bana?

•  Engkai maka reh jahatna sipat kalak?

•  Kai nge si arus silakoken?

•  Kerina nge kalak reh jahatna sipatna?

•  Kacau nge kari kerina keadan doni enda?

 Ikataken bas Pustaka sipat kalak jadi reh jahatna. Enda terjadi perban kalak mentingken bana. Contohna, “la kuasaina dirina,” “engkelengi dirina saja,” ras “lanai diatena Dibata tapi kesenangenna saja si daramina.”—2 Timotius 3:2-4.

 Tuhu si enggo ikataken Pustaka e. Kalak bas jamanta ngukuri dirina saja. Si penting puas kapna ras meriah ukurna. Janah enda lalap reh parahna. Enterem kalak si ngukuri dirina saja, emaka “la tena ngena si mehuli.” Maksudna, la kapna penting sipat-sipat si mehuli. Selain si e, kalak e pe “la meteh ngata bujur.” La syukurina kai si lit bas ia janah la tehna ngataken bujur man kalak si deban.—2 Timotius 3:2, 3.

 Perban mentingken bana, turah ka sipat si deban si la mehuli. Janah nina Pustaka, sipat si bage me si melala bas jamanta gundari. Contohna:

•   Merangap. Enterem kalak si “mata duiten.” Sukses kapna bana adi melala senna ntah pe bayak ia.—2 Timotius 3:2.

•   Sombong. Enterem kalak si “tual, meganjang rukur,” janah “sombong.” (2 Timotius 3:2, 4) Meriah kapna ncakapken kengasupenna, kiniulinna, bage pe kebayakenna, janah lebih-lebihkenna ka kerna si e.

•   Tukang hina. I japa pe lit “tukang hina” ras “tukang pitnah.” (2 Timotius 3:2, 3) Hinana ntah pe pitnahna kalak si deban bage pe Dibata.

•   Keras kepala. Enterem kel kalak si “la setia,” “la nggit arih-arih,” “penghianat,” ras “keras kepala.” (2 Timotius 3:2-4) La kalak e nggit arih-arih guna ndatken sada keputusen ntah pe guna ndungi sada persoalen. La ka tepatina janjina.

•   Kasar. Melala kel kalak si “kasar.” Sitik-sitik mis tena merawa, dungna jahat ntah pe kejam kel perbahanenna.—2 Timotius 3:3.

•   La nggit matuhi peraturen. Enggo ikataken Jesus “reh buena kejahaten” bas jamanta. (Matius 24:12) Katakenna ka lit pagi “kerusuhen” bas erbage-bage ingan.—Lukas 21:9.

•   La lit kekelengen bas keluarga. Anak-anak “la patuh man orang tua” janah enterem kalak “la lit kekelengenna” bas keluarga. Dungna, enterem anggota keluarga si terlantar, ilecehken, janah ngenanami perbahanen si kejam bas keluarga.—2 Timotius 3:2, 3.

•   Munapik. Enterem kalak si “tempa-tempa sembahna Dibata.” (2 Timotius 3:5) Labo ikutkenna kai nina Dibata, tapi daramina peminpin agama si ngataken kai si merhat ia megikenca.—2 Timotius 4:3, 4.

 Kalak si mentingken bana erban kalak si deban tertekan ras stres. (Pengerana 7:7) Contohna, lit kalak si la mbiar ngerugiken kalak si deban perban mata duiten. Lit ka kalak si kasar man anggota keluargana perban la tena keleng keluargana. Dungna, anggota keluargana jadi stres janah lit ka si bunuh diri atena. Selain si e, kalak si la setia erban kalak si ihianatina e sakit hati, janah luka bas pusuhna e banci ndekah kel maka malem.

 Ijelasken bas Pustaka kai kin situhuna alasenna:

•   Lanai keleng ate kalak Dibata bage pe kalak si deban. (Matius 24:12) Dungna, reh teremna kalak si mentingken bana.

•   Setan si Iblis enggo ipelawes arah surga nari, janah bas doni ngenca ia banci erkuasa. (Ketangkasen 12:9, 12) Mulai je nari, reh egoisna sipat manusia perban ipengaruhi Setan.—1 Johanes 5:19.

 Nina Pustaka, “Kalak si bage, ula deheri.” (2 Timotius 3:5) Enda labo maksudna pangen siakap sisada. Tapi la kita nggit kompak ras kalak si mentingken bana janah la diatena Dibata.—Jakup 4:4.

 Lang. Nina Pustaka lit kalak “si kesusahen ras si rate mesui perban kerina si erban ciga ate si enggo ilakoken.” (Esekiel 9:4) Kalak e la mentingken bana janah ikutkenna perentah Dibata. Ranan ras perbahanenna pe beda kel ras jelma si enterem. (Maleaki 3:16, 18) Contohna, erusaha kel kalak e gelah banci erdame ras kerina kalak. La ka kalak e nggit ikut erperang ntah pe ngelakoken kekerasen.—Miha 4:3.

 Lang. Labo kari sempat kerinana kacau bas doni enda. Kentisik nari, ikernepken Dibata me kerina kalak si la nggit matuhi Ia. (Masmur 37:38) IbanNa kari “doni si mbaru.” Ertina, ibanNa kari kalak si meteruk ukur jadi rakyatNa janah nggeluh kalak e rasa lalap i doni enda alu dame. (2 Petrus 3:13; Masmur 37:11, 29) Enda pasti terjadi. Gundari pe, lit nge kalak si enggo ngubah kegeluhenna sesuai ras sura-sura Dibata perban pelajarina Pustaka.—Epesus 4:23, 24.