Lang. Bas Pustaka si Badia jelas ikataken maka tangtangna nari iciptaken Dibata manusia bage pe “erbage-bage” binatang ras sinuan-sinuan. a (Kejadin 1:12, 21, 25, 27; Ketangkasen 4:11) Ikataken bas Pustaka si Badia maka kerina kita manusia eme keturunen Adam ras Hawa, orang tuata si pertama. (Kejadin 3:20; 4:1) Lit sada teori ngataken, arah evolusi me Dibata nciptaken erbage-bage mahluk hidup. Teori e mon-mon ikataken ka teori evolusi teistik. Tapi teori e la sesuai ras Pustaka si Badia. Amin gia bage, Pustaka si Badia labo bertentangen ras pendapat ilmuwan si ngataken maka sada jenis mahluk hidup banci melala variasina. b

•  Piga-piga kalak tek nandangi kai?

•  Sesuai nge teori evolusi ras ajaren Pustaka si Badia?

•  Uga kerna kengasupen sinuan-sinuan ras binatang guna nyesuaiken diri?

 Kalak si tek maka Dibata nciptaken alu evolusi, beda-beda pendapatna. Ikataken bas Encyclopædia Britannica, “salah sada cara Dibata ngendaliken alam eme alu proses seleksi alam [si megegeh tetap nggeluh, tapi si lemah mate].”

 Lit ka si tek maka:

•   Kerina mahluk hidup sada leluhurna.

•   Sada jenis mahluk hidup banci berevolusi jadi mahluk hidup jenis si deban si seh kel bedana. Proses e mon-mon ikataken makroevolusi.

•   Amin gia la siteh uga carana, Dibata nciptaken kerinana arah evolusi.

 Teori evolusi teistik erban kalak erpengakap maka cerita kerna penciptan si lit bas buku Kejadin, labo kerina si benar. Padahal, Jesus pe ngakui maka benar nge sejarah si icatat bas buku Kejadin. (Kejadin 1:26, 27; 2:18-24; Matius 19:4-6) Bas Pustaka si Badia ikataken maka Jesus enggo nggeluh i surga sope ia reh ku doni. Janah sampatina Dibata erban “kerina” jadi lit. (Johanes 1:3) Jadi pendapat si ngataken maka arah evolusi nge Dibata nciptaken erbage-bage mahluk hidup, labo sesuai ras ajaren Pustaka si Badia.

 Bas Pustaka si Badia labo ijelasken uga buena variasi si lit bas sada jenis mahluk hidup. Memang, variasi banci terjadi perban binatang ras sinuan-sinuan berkembang biak ntah pe perban nyesuaiken diri ras lingkungen si mbaru. Labo pernah ikataken Pustaka si Badia maka keterangen e la tuhu. Tapi nyesuaiken diri labo seri ras evolusi, perban labo lit mahluk hidup jenis si mbaru si ihasilken.