Pustaka si Badia banci nampati kita erban keputusen si mehuli. Arah Pustaka banci sidat “kepentaren [ras] pengertin.” (Kuan-kuanen 4:5) Bas piga-piga situasi, jelas ikataken Pustaka kai si arus silakoken. Bas situasi si deban, berekenna nasehat si banci nampati kita erban keputusen si mehuli.

Si ibahas bas artikel enda

•  Carana erban keputusen si mehuli

•  Arus nge kuubah keputusen si enggo kuban?

•  Uga adi enggo sempat kuban keputusen si la mehuli janah la banci iubah?

•   Ula buru-buru. Nina Pustaka, “Kalak si cerdik, ukurina tiap langkahna.” (Kuan-kuanen 14:15) Adi buru-buru kam erban keputusen, banci saja lit informasi si terlewat. Emaka adi lit piga-piga pilihen, ukurilah manjar-anjar.​—1 Tesalonika 5:21.

•   Ula banndu keputusen menurut perasanndu saja. Ipersingeti Pustaka kita maka pusuhta la terteki. (Kuan-kuanen 28:26; Jeremia 17:9) Adi sangana kita merawa, sedih, putus asa, la sabar, ntah pe latihsa siakap, labo banci siban keputusen si mehuli.​—Kuan-kuanen 24:10; 29:22.

•   Ertotolah mindo kepentaren. (Jakup 1:5) Meriah ukur Dibata megiken toto si bage. Ia bali bagi bapak si perkeleng si ersura-sura gelah anakna la kena masalah. Nina Pustaka, “Jahwe kap si mereken kepentaren, arah babahNa nari ndarat pemeteh ras pengertin.” a (Kuan-kuanen 2:6) BereNa man banta kepentaren, terutama arah Pustaka.​—2 Timotius 3:16, 17.

•   Darami terbuen informasi. Gelah banci siban keputusen si mehuli, perlu sidarami informasi si terteki. Nina Pustaka, “Kalak si pentar nggit megiken janah lalap nggit erlajar.” (Kuan-kuanen 1:5) Ja nari banci sidat informasi si cocok man banta bage pe informasi si terteki?

   Si pertama, daramilah kai nina Pustaka. Iteh Dibata kai si mehulina man banta perban Ia Si Nciptaken kita. (Masmur 25:12) Emaka nasehat si lit bas Pustaka me nasehat si tertekina kel. (Jesaya 48:17, 18) Mon-mon, ibereken Pustaka perentah si jelas kerna kai si arus silakoken. Tapi rusur ka la berekenna perentah si jelas. Berekenna nasehat si banci nampati kita erban keputusen. Memang beda kalakna, banci saja beda pilihenna. Tapi adi pilihenna e enggo sesuai ras Pustaka, e keputusen si mehuli. Jadi, uga carana gelah banci sidat ayat si cocok ras situasita? Cubalah darami bacan, video, ntah pe artikel si erpalasken Pustaka bagi si lit bas situs web enda. b

   Mon-mon perlu ka daramindu informasi arah sumber si deban si terteki. Contohna, sope lenga nukur sada barang, apai ka adi barang e merga, perlu daramindu lebe informasi kerna barang e. Misalna kerna pabrikna, garansina, bage pe uga cara ngulihkenca adi barang e ceda. Pastiken ka lah lebe barang e nge situhu-tuhu iperlukenndu.

   Nina Pustaka, “Rencana gagal adi la icakapken lebe.” (Kuan-kuanen 15:22) Emaka sope lenga erban keputusen, cakapkenlah lebe ras kalak si banci mereken saran si mehulina. Contohna, adi banndu atendu keputusen kerna perawaten kesehaten, banci cakapkenndu lebe ras dokter. (Matius 9:12) Banci ka cakapkenndu ras kalak si pernah bage situasina. Tapi perlu ingetndu, kam nge si arus erban keputusen, labo kalak si deban, janah kam nge si arus ertanggung jawap kerna keputusenndu e.​—Galati 6:4, 5.

•   Ukurilah manjar-anjar kerina pilihen si lit. Kenca pepulungndu kerina informasi, banci tulisndu piga-piga pilihen si lit. Ukurilah alu jujur kai saja kelebihen ras kekurangen tiap pilihen. (Ulangen 32:29) Contohna, kai nge pengaruh keputusen e man bandu, man keluargandu, bage pe man kalak si deban? (Kuan-kuanen 22:3; Roma 14:19) Sanga ukurindu si e kerina, darami ka lah nasehat Pustaka kerna si e. Alu bage, banci banndu keputusen si mehuli.

•   Banlah keputusen. Mon-mon, la mis siban keputusen perban ragu denga kita. Tapi adi lalap kita ragu, dungna banci bene kesempatenta si mehuli ntah pe reh situasi si la siarapken. Emaka, adi lalap la siban keputusen, e seri ertina ras erban keputusen si salah. Enda seri ras kalak si nandangi nuan benih. Nina Pustaka, “Kalak si lalap mperdiateken angin labo pagi nuan benih, janah kalak si lalap mperdiateken embun labo pagi rani.”​—Pengerana 11:4.

 Perlu siinget maka labo lit keputusen si sempurna. Engkai? Sanga siban sada keputusen, biasana lit ka nge si arus sikorbanken. Selain si e, banci ka terjadi situasi si la sisangka-sangka. (Pengerana 9:11) Emaka, perlu tuhu-tuhu sidarami lebe informasi si terteki, kenca si e siban keputusen si mehulina.

 Mon-mon lit keputusen si banci siubah. Banci saja situasita berubah, ntah pe keputusen si enggo siban mbarenda kepeken kurang cocok. Adi bage si terjadi, banci siukuri ka kai saja pilihen si lit, kenca si e siban keputusen si terulin.

 Tapi lit keputusen si la banci iubah. (Masmur 15:4) Contohna, kalak si erjanji sanga ia erjabu. Ate Dibata kalak si enggo erjabu tetap setia man pasangenna bagi janjina sanga ia erjabu. c (Maleaki 2:16; Matius 19:6) Adi lit masalah bas perjabunna, labo sirang jalan keluarna, tapi arus usahakenna ndungi masalah e.

 Kita kerina pernah erban keputusen si la mehuli. (Jakup 3:2) Banci jadi menyesal kita janah salah siakap banta. Wajar nge bage. (Masmur 69:5) Situhuna, mejile ka nge perasan si bage, perban e banci nampati kita gelah lanai siulihi kesalahen e. (Kuan-kuanen 14:9) Tapi adi lalap salah siakap banta, dungna latih siakap rukur. Emaka nasehati Pustaka kita gelah ula lalap sisalahken banta. (2 Korinti 2:7) d Nina Pustaka, “Jahwe perkuah janah mehuli.” (Masmur 103:8-13) Jadi, adi enggo sempat banndu keputusen si la mehuli janah lanai banci ubahndu, erlajarlah kam arah kesalahen e janah usahakenlah asa bancina mpehuli situasina.