Cara Ertoto—Pertoton Tuhan nge Pertoton si Mehulina?
Jawapen Pustaka si Badia
Arah Pertoton Tuhan banci siteh uga cara ertoto ras kai si perlu sitotoken. Ajari Jesus kerna si e perban pindoken murid-muridna bagenda, “O Tuan, ajari dage kami cara ertoto.” (Lukas 11:1) Tapi pertoton si begiken Dibata labo ngenca Pertoton Tuhan ntah pe Doa Bapa Kami. a Ajarken Jesus pertoton e jadi contoh kerna toto si ibegiken Dibata.
Si ibahas bas artikel enda
Kai kin isi Pertoton Tuhan?
Pertoton Tuhan icatat bas Matius 6:9-13. Bas piga-piga terjemahen, kata-katana lit bedana. Enda dua contohna.
Terjemahen Doni si Mbaru: “O Bapak kami si i surga, ipebadia min gelarNdu. Reh min KerajanNdu. Jadi min peratenNdu i doni bagi i surga. Bereken min man kami pangan bas wari enda, janah ampuni min dosa-dosa kami, bagi kami enggo ngampuni kalak si erdosa man kami. Ula min pediat kami nyerah man percuban, tapi selamatken min kami arah si jahat nari.”
Pustaka si Badia ras Ende-enden Edisi ke-4 © LAI 2003: “O Bapa kami si ni Surga. GelarNdu ipebadia min; reh min KinirajanNdu; sehlah min peratenNdu, i bas doni enda bagi ni Surga. Bereken min man kami nakan cukup i bas wari si sendah enda. Alemi min salah kami bagi nialemi kami salah kalak kempak kami. Ola min kami ibaba Kam kubas percuban, tapi olangilah kami idur si ilat nari.” b
Kai ertina Pertoton Tuhan e?
Ajaren Jesus sesuai ras kerina isi Pustaka si Badia, emaka ayat-ayat si deban si lit bas Pustaka banci nampati kita ngangkai erti Pertoton Tuhan.
“O Bapak kami si i surga”
Cocok kel silebuh Dibata ‘Bapakta’ perban Ia si nciptaken kita ras si mereken kegeluhen man banta.—Jesaya 64:8.
“Ipebadia min gelarNdu”
Gelar Dibata, Jahwe, arus imuliaken ras ipebadia. Uga carana? Alu ncakapken sipat-sipat Dibata ras tujunNa man kalak si deban.—Masmur 83:18; Jesaya 6:3.
“Reh min KerajanNdu”
Kerajan Dibata eme pemerentahen si lit i surga janah Rajana eme Jesus. Iajarken Jesus gelah sitotoken Kerajan e merentah ku belang-belang doni.—Daniel 2:44; Ketangkasen 11:15.
“Jadi min peratenNdu i doni bagi i surga”
Bas surga la lit kejahaten ras kematen. Ate Dibata bas doni enda pe manusia banci nggeluh rasa lalap bas keadan dame ras aman.—Masmur 37:11, 29.
“Bereken min man kami pangan bas wari enda”
Arus siinget maka kita banci nggeluh perban bereken Dibata panganta ras keperlunta si debanna.—Perbahanen Rasul-Rasul 17:24, 25.
“Ampuni min dosa-dosa kami, bagi kami enggo ngampuni kalak si erdosa man kami”
Kerina kalak erdosa janah perlu iampuni. Tapi adi iampuni Dibata ateta kita, kita pe arus nggit ngampuni kalak si deban si ersalah man banta.—Matius 6:14, 15.
“Ula min pediat kami nyerah man percuban, tapi selamatken min kami arah si jahat nari”
Setan si Iblis eme “si jahat” si igelari ka “Penggoda,” cubaina atena kita. (1 Johanes 5:19; Matius 4:1-4) E me sebapna, sipindo penampat Jahwe gelah banci kita tetap patuh man baNa sanga kita igoda ngelakoken kai si salah.
Bagi Pertoton Tuhan saja kin ngenca banci totota?
Sanga ajarken Jesus Pertoton Tuhan jadi contoh, labo atena sihapal kata-kata bas toto e. Sope ajarkenna Pertoton Tuhan, persingetina murid-muridna, nina, “Sanga ertoto, ula ulih-ulihi kata-kata si seri.” (Matius 6:7) Bas kesempaten si deban sanga ajarken Jesus kerna cara ertoto, la seri kata-kata si pakena.—Lukas 11:2-4.
Cara si mehulina i bas ertoto eme nggunaken kata-kata si rehna arah pusuhta nari.—Masmur 62:8.
Uga arusna kita ertoto?
Pertoton Tuhan eme contoh si mehuli kerna uga kin pertoton si ibegiken Dibata. Perdiateken uga ayat-ayat si deban si lit bas Pustaka mbuktiken kerna si e.
Totota arus man Dibata saja
Ayat: “Bas kerinana pesehlah pemindon kena man Dibata bas toto janah pindolah alu ngataken bujur.”—Pilipi 4:6.
Maksudna: Totota arusna itujuken man Dibata, labo man Jesus, Maria, ntah pe santo-santo. Bas kata pembuka Pertoton Tuhan, sanga kataken Jesus, “O Bapak kami,” ajari Jesus kita gelah ertoto man Dibata Jahwe saja.
Totota sesuai min ras peraten Dibata
Ayat: “Kai pe sipindo man baNa adi sesuai ras peratenNa, begikenNa kita.”—1 Johanes 5:14.
Maksudna: Banci sitotoken kai pe adi e sesuai ras peraten Dibata. Bas Pertoton Tuhan lit ikataken Jesus “jadi min peratenNdu.” E ertina penting kel sitotoken peraten Dibata. Banci siteh kai kin peraten Dibata nandangi doni ras manusia adi sipelajari Pustaka si Badia.
Sitotoken kai si erban kita kuatir
Ayat: “Benterkenlah babanndu man Jahwe, Ia pagi si ndukung kam.”—Masmur 55:22.
Maksudna: Perdiateken Dibata kai si erban kita kuatir. Bagi si lit bas Pertoton Tuhan si ajarken Jesus, banci sitotoken keperlunta tiap wari, banci sipindo petunjuk sanga siban ateta keputusen si penting, sipindo penampat sanga lit masalahta, janah sipindo gelah iampuni dosa-dosata. c
a Contohna, Jesus ras murid-muridna pernah ka ertoto janah la seri kata-kata ras topik si ipakena ras isi Pertoton Tuhan.—Lukas 23:34; Pilipi 1:9.
b Bas terjemahen Pustaka si Badia ras Ende-enden Edisi ke-4 © LAI 2003, Pertoton Tuhan itutup alu kata-kata, “Sabap Kam kap si mada Kinirajan, ras kuasa, ras kemulian si ndekah-ndekahna. Amin.” Kata-kata pujin man Dibata enda si igelari ka doxologi, lit ka bas piga-piga terjemahen Pustaka si deban. Tapi, The Jerome Biblical Commentary ngataken, “Doxologi e . . . la lit bas [manuskrip-manuskrip] si bancina kel terteki.”
c Kalak si perlu akapna ia iampuni Dibata, banci saja ertoto pe lanai ia pang. Tapi nina Jahwe man kalak si bage, “Mari sidungi masalahta.” (Jesaya 1:18) Labo itulakNa ise pe situhu-tuhu mindo pengampunenNa.
Mungkin Menarik Ka Kapndu
SORA ERMOMO
Engkai Kita Perlu Ertoto?
Pernah nge iakapndu la ibegi Dibata totondu? Adi pernah, labo kam sisada.
AJAREN PENTING ARAH PUSTAKA
Kerina nge Pertoton Ibegiken Dibata?
Uga kerna toto si mentingken bana? Uga adi lit sekalak dilaki kasar man diberuna, tapi paginna ertoto ia mindo pasu-pasu Dibata?
SORA ERMOMO
Engkai maka La Ijawap Dibata Kerina Toto?
I bas Pustaka ijelasken toto si uga si ijawap Dibata janah toto si uga si la ijawapNa.
SORA ERMOMO
“Reh min KerajanNdu”—Jutan Kalak Notokenca
Penungkunen kai kerna Kerajan Dibata si perlu siteh jawapenna gelah siangkai erti toto e?
KERNA KAMI
Rehlah ku Perpulungen Ibadah Saksi-Saksi Jahwe
Darami keterangen kerna perpulungen kami. Datken alamat perpulungen si ndeherna.