Lit nge Dibata i Japa Pe?
Jawapen Pustaka si Badia
Dibata banci ngidah kerinana janah i japa pe banci lakokenNa sura-suraNa. (Kuan-kuanen 15:3; Heber 4:13) Tapi, bas Pustaka si Badia la lit iajarken maka Dibata lit i japa pe. Malahen bas Pustaka si Badia ikataken maka lit nge ingan tading Dibata.
Rupa Dibata: Dibata la banci siidah. (Johanes 4:24) La lit manusia si banci ngidah Dibata. (Johanes 1:18) Bas piga-piga pengenehenen si lit bas Pustaka si Badia, Dibata igambarken lit bas ingan si seri. La pernah igambarken maka Dibata lit bas kerina ingan.—Jesaya 6:1, 2; Ketangkasen 4:2, 3, 8.
Ingan tading Dibata: Bas Pustaka si Badia ikataken maka Dibata ‘inganNa i surga.’ Enda ertina Dibata tading i surga labo bas doni ntah pe bas alam semesta enda. (1 Raja-Raja 8:30) Bas Pustaka si Badia ikataken maka malekat-malekat reh “ngadap man Jahwe.” a Jadi banci ikataken, lit ingan Dibata tading.—Jop 1:6.
Adi labo bas kerina ingan Dibata lit, banci nge perdiatekenNa janah sampatiNa aku?
Banci. Keleng kel ate Dibata man kita kerina sekalak-sekalak. Emaka perdiatekenNa nge manusia si tuhu-tuhu nggit jadi temanNa janah sampatiNa kalak e. (1 Raja-Raja 8:39; 2 Kronika 16:9) Nenlah bukti-bukti maka perdiateken Jahwe umatNa si setia:
Sanga kita ertoto: Mis begiken Jahwe totota sanga kita ertoto.—2 Kronika 18:31.
Sanga latih siakap rukur: “Jahwe ndeher ras kalak si getem pusuhna, selamatkenNa kalak si lanai semangat.”—Masmur 34:18.
Sanga la siteh kai si arus silakoken: Nina Jahwe, “Kubere pagi kam pengertin ras Kuajari.” AjariNa kita arah KataNa eme Pustaka si Badia.—Masmur 32:8.
Pendapat si salah maka Dibata lit i japa pe
Pendapat si salah: Dibata lit bas tiap ciptan.
Faktana: Dibata labo tading i doni ntah pe bas ingan si deban i alam semesta enda. (1 Raja-Raja 8:27) Memang bintang-bintang ras kerina ciptan Dibata ‘nceritaken kemulian Dibata.’ (Masmur 19:1) Tapi, bali bagi sekalak pelukis si labo mungkin tading bas lukisenna, Dibata pe la mungkin tading bas ciptanNa. Arah lukisenna, banci melala siteh kerna pelukisna, bage ka pe, arah ciptan, banci siteh “sipat-sipat [Pencipta] si la teridah” bagi kuasa, kepentaren ras kekelengenNa.—Roma 1:20.
Pendapat si salah: Dibata arus lit bas kerina ingan gelah banci tehNa kerina janah banci lakokenNa kerina.
Faktana: Kesah si badia eme gegeh ntah pe kuasa Dibata. Gunaken Dibata kesah si badiaNa gelah banci tehNa janah ilakokenNa kai pe, i japa pe, ras ndigan pe arah inganNa nari.—Masmur 139:7.
Pendapat si salah: Bas Masmur 139:8 ikataken, “Adi nangkih aku ku langit, enggo i je Kam, adi tayang aku i bas Kuburen, enggo i je Kam.” La kin ayat e ertina maka Dibata lit i japa pe?
Faktana: Ayat e labo nceritaken i ja ingan Dibata tading. Tapi ayat e ngajarken alu puitis man banta maka Dibata banci nampati kita i japa pe inganta.
a Jahwe eme gelar Dibata si lit bas Pustaka si Badia.
Mungkin Menarik Ka Kapndu
PENUNGKUNEN SI IJAWAP PUSTAKA
Kai kin Kesah si Badia e?
Bas Pustaka si Badia, kesah si badia mon-mon ikataken “tan” Dibata.
KERNA KAMI
Dahi Kenalah Aku
Banci datndu jawapen penungkunenndu arah Pustaka si Badia, janah banci ka pelajarindu terbuen kerna Saksi-Saksi Jahwe.