Kai Ertina Engkelengi Musuh?
Jawapen Pustaka si Badia
Bas khotbah Jesus si terkenal si rusur ka igelari Khotbah i Gunung, nina Jesus, “Teruslah kelengi musuh-musuh kena.” (Matius 5:44; Lukas 6:27, 35) E ertina arus lalap kita mehuli man kalak si segat atena kita ntah pe man kalak si la adil perbahanenna man banta.
Ibuktiken Jesus maka keleng atena musuh-musuhna. Contohna, nggit Jesus ngampuni kalak si enggo kejam kel man bana. (Lukas 23:33, 34) Ajaren Jesus kerna engkelengi musuh sesuai ras kai si itulis bas Kitap-Kitap Heber, ntah pe si rusur igelari Perjanjin Lama.—Keluaren 23:4, 5; Kuan-kuanen 24:17; 25:21.
“Teruslah kelengi musuh-musuh kena janah totokenlah kalak si nyiksa kena.”—Matius 5:43, 44.
Si ibahas bas artikel enda:
Engkai maka arus sikelengi musuhta?
Dibata pe bage lakokenNa. “Mehuli Ia man kalak si la meteh ngata bujur ras kalak jahat.” (Lukas 6:35) Janah “banNa terbit matawariNa man kalak si jahat.”—Matius 5:45.
Adi sikelengi musuhta, banci saja dungna robah ia. Isuruh Pustaka kita gelah mehuli kita man musuhta, perban adi bage perbahanenta, tempa-tempa ‘sipegun-gun rara si gara i datas takalna.’ (Kuan-kuanen 25:22, cataten i teruh) Bas jaman si mbarenda, rara ipake gelah biji logam si piher banci dungna jadi cair. Alu bage, bagin-bagin logam si meherga banci ipisahken. Seri ras si e, adi mehuli kita man kalak si segat atena kita, banci dungna lanai segat atena kita janah sipat-sipatna si mehuli banci dungna teridah.
Uga carata ncidahken kekelengen man musuh?
“Mehulilah kena man kalak si rate segat man kena.” (Lukas 6:27) Nina Pustaka, “Adi melihe musuh kena, bere ia man; adi muas ia, bere ia minem.” (Roma 12:20) Kai ka deba nari si banci silakoken man musuhta? Banci ka siikutken nasehat Jesus si terkenal, si rusur ka igelari Aturen Emas: “Kai si ate kena lakoken kalak man kena, lakoken ka si bage man bana.”—Lukas 6:31.
“Pasu-pasulah kalak si numpahi kena.” (Lukas 6:28) Uga carata masu-masu musuhta? Carana, sopan ras mehuli kita ngerana man bana, amin pe kasar ia ngerana man banta. Nina Pustaka, “Ola balas . . . sumpah alu sumpah. Tapi balaslah alu pasu-pasu.” (1 Petrus 3:9, Pustaka si Badia ras Ende-enden Edisi ke-4 © LAI 2003) Adi siikutken nasehat enda, banci dungna kita lanai sisegat-segaten.
“Totokenlah kalak si hinana kena.” (Lukas 6:28) Adi lit kalak si hinana kita, “ula balas kejahaten alu kejahaten.” (Roma 12:17) Sebalikna, sipindolah gelah iampuni Dibata ia. (Lukas 23:34; Perbahanen Rasul-Rasul 7:59, 60) Ula kam dendam man bana, tapi serahkenlah masalahna man Dibata si adil, perban balas Dibata kari ia sesuai ras perbahanenna.—Imamat 19:18; Roma 12:19.
“Teruslah kelengi musuh-musuh kena, mehulilah kena man kalak si rate segat man kena, pasu-pasulah kalak si numpahi kena, totokenlah kalak si hinana kena.”—Lukas 6:27, 28.
Teruslah “sabar ras mehuli.” (1 Korinti 13:4) Sanga jelasken Rasul Paulus kerna sipat kekelengen, gunakenna kata Junani agape. Kekelengen si bage me si imaksud bas Matius 5:44 bage pe bas Lukas 6:27, 35. Banci sicidahken kekelengen si bage termasuk man musuh-musuhta. Sabar ras mehuli kita man bana, la kita kasar, la percian, janah la kita sombong.
“Kekelengen e sabar ras mehuli. Kekelengen e la percian, la tual, la sombong, sopan, la mentingken bana, janah la nukah merawa. Kekelengen e la ngkira kesalahen kalak. Kekelengen e ermeriah ukur perban kai si benar, labo perban kai si la benar. Kekelengen e ngasup nggengken kai pe, tek man kai pe, tetap erpengarapen, janah sabar bas kai pe. Kekelengen e la erkeri-kerin.”—1 Korinti 13:4-8.
Banci nge kita erperang ngelawan musuh?
Lang. Ajarken Jesus man murid-muridna maka kalak e la banci erperang. Contohna, sanga persingeti Jesus kalak e maka iserang pagi Jerusalem, suruhna kalak e kiam, labo ngelawan musuh. (Lukas 21:20, 21) Kataken Jesus ka man Rasul Petrus, “Masukken pedangndu ena ku inganna, sebap kerina si make pedang mate pagi iban pedang.” (Matius 26:52) Arah Pustaka bage pe arah cataten sejarah banci siteh maka pengikut Jesus bas abad pertama la pernah ikut erperang. a—2 Timotius 2:24.
Pendapat si salah kerna engkelengi musuh
Pendapat si salah: Menurut Undang-Undang Musa, arus segat ate kalak Israel musuhna.
Faktana: Bas Undang-Undang Musa la lit peraturen si bage. Malahen bas Undang-Undang Musa, kalak Israel iperentahken gelah engkelengi kalak si deban. (Imamat 19:18) Piga-piga kalak Jahudi bas jaman Jesus anggapna “kalak si deban” e eme kalak Jahudi saja. Jadi menurut kalak e, kalak si labo Jahudi arus iban bagi musuh. (Matius 5:43, 44) Tapi pekena Jesus perukuren kalak e si salah alu nceritaken perumpaman kerna kalak Samaria si mehuli.—Lukas 10:29-37.
Pendapat si salah: Adi keleng ateta musuhta, e ertina setuju kita man perbahanenna si salah.
Faktana: Arah Pustaka banci siteh maka banci sikelengi kalak, tapi labo kita setuju man perbahanenna si salah. Contohna, amin pe segat ate Jesus kekerasen, ertoto ia man kalak si ngukum mate ia. (Lukas 23:34) Janah amin pe segat atena dosa, nggit ia ngorbanken kegeluhenna man kalak si erdosa.—Johanes 3:16; Roma 6:23.
a Bas buku The Rise of Christianity karya E. W. Barnes ikataken, “Adi sipereksa cataten-cataten sejarah si lit gundari, banci sisimpulken maka ngasa kira-kira pemerentahen Markus Aurelius [kaisar Romawi arah tahun 161 seh ku 180 M], la lit kalak Kristen si jadi tentera, janah la lit tentera si tetap bas dinas militer kenca ia jadi kalak Kristen.”
Mungkin Menarik Ka Kapndu
SORA ERMOMO
Carana gelah Ula Nai Sisegat-segaten—Ula Balas Dendam
Lanai ateta balas dendam adi tek kita kentisik nari ibalas Dibata kerina perbahanen si jahat.
PUSTAKA SI BADIA NGUBAH KEGELUHEN
Banci kin Kekelengen Naluken Segat Ate?
Ngambekken perasan negatip man kalak si deban la menukah. Perdiatekenlah uga sekalak Jahudi ras sekalak Palestina si enggo berhasil ngelakokenca.
AJAREN PUSTAKA
Cubakenlah Kursus Pustaka ras Kami
Ikutilah kursus Pustaka si Badia gratis ras sekalak guru si ngajarisa.