Ise kin Jahwe?
Jawapen Pustaka si Badia
Jahwe eme Dibata si benar si iceritaken bas Pustaka si Badia. Ia me Si Nciptaken kerinana. (Ketangkasen 4:11) Jahwe me si isembah nabi Abraham, Musa, bage pe Jesus. (Kejadin 24:27; Keluaren 15:1, 2; Johanes 20:17) Ia labo Dibata man sada bangsa saja, tapi Dibata man kerina kalak “i belang-belang doni enda.”—Masmur 47:2.
Gelar Jahwe, Dibata ngenca punana bagi si ikataken bas Pustaka. (Keluaren 3:15; Masmur 83:18) Gelar e arah kata kerja Heber nari si ertina “jadi.” Menurut melala ahli, erti gelar e “Ia si Erbanca Jadi.” Cocok kel erti gelar e perban Jahwe eme Pencipta janah lalap tepatiNa janjiNa. (Jesaya 55:10, 11) Arah Pustaka banci siteh uga kin Jahwe e, khususna kerna kekelengenNa, eme sipatNa si utama.—Keluaren 34:5-7; Lukas 6:35; 1 Johanes 4:8.
Bas bahasa Heber tulisen gelar Dibata eme empat hurup יהוה (YHWH), si igelari Tetragramaton. Janah bas bahasa Karo, gelar e iterjemahken jadi Jahwe. La siteh uga pastina mbarenda gelar e ibelasken bas bahasa Heber. Tapi gelar “Jahwe” enggo ndekah kel ipake bas bahasa Karo.
Engkai maka la siteh uga cara mbelasken gelar Dibata bas bahasa Heber si nai?
Bas bahasa Heber si nai, kata-kata itulis nggunaken hurup mati ngenca, la lit hurup hidup. Sanga mbaca, kalak Heber mis tehna hurup hidup si apai si cocok ipake. Tapi kenca Kitap-Kitap Heber (“Perjanjin Lama”) dung itulis, piga-piga kalak Jahudi tek man cerita si la tuhu maka pantang mbelasken gelar Dibata. Emaka, sanga mbaca ayat alu sora megang si lit i je gelar Dibata, ganti kalak e jadi “Tuhan” ntah pe “Dibata.” Reh dekahna reh teremna kalak si tek man cerita e, dungna lanai iteh uga aslina mbelasken gelar Dibata. a
Lit si erpengakap cara si benar mbelasken gelar Dibata eme “Yahweh,” si debanna beda-beda ka pendapatna. Bas Gulungen Laut Mati, si isina sebagin buku Imamat bas bahasa Junani, gelar Dibata iterjemahken jadi Iao. Penulis Junani si deban erpengakap maka cara mbelaskenca eme Iae, Iabe, ras Iaoue. Tapi la lit buktina cara mbelasken si bage igunaken bas bahasa Heber si nai. b
Pendapat si salah kerna gelar Dibata si lit bas Pustaka
Pendapat si Salah: Penerjemah nge si nambahken gelar “Jahwe” bas Pustaka.
Fakta: Gelar Dibata bas Tetragramaton Heber lit kira-kira 7.000 kali bas Pustaka. c Piga-piga penerjemah ate-atena ngganti gelar Dibata jadi kata “Tuhan” ntah pe si debanna.
Pendapat si Salah: Dibata Si Madakuasa la perlu lit gelarNa.
Fakta: Dibata si negu-negu kalak si nulis Pustaka guna nulisken gelarNa ribun kali. Janah pindoNa kalak si nembah Ia nggunaken gelarNa. (Jesaya 42:8; Joel 2:32; Maleaki 3:16; Roma 10:13) Malahen, segat ate Jahwe man nabi-nabi palsu si erusaha erban kalak ngelupaken gelarNa.—Jeremia 23:27.
Pendapat si Salah: Gelar Dibata arus ihapus arah Pustaka sesuai kebiasan kalak Jahudi.
Fakta: Lit piga-piga penulis Jahudi si la nggit mbelasken gelar Dibata. Tapi gelar e labo hapus kalak e arah Pustaka. Si pentingna, la ate Dibata siikutken kebiasan manusia si la sesuai ras perentahNa.—Matius 15:1-3.
Pendapat si Salah: Gelar Dibata la banci igunaken bas Pustaka perban la siteh uga aslina gelar e ibelasken bas bahasa Heber.
Fakta: Kalak si bage pendapatna berarti akapna seri min ate Dibata cara mbelasken gelarNa bas tiap bahasa. Tapi arah Pustaka banci siteh maka umat Dibata bas jaman si mbarenda, labo seri carana mbelasken gelar-gelar, belaskenna gelar e sesuai bahasana.
Contohna, gelar hakim Israel eme Josua. Kalak Kristen bas abad pertama si nggunaken bahasa Heber, belaskenna gelar e Yehohshua. Tapi kalak si nggunaken bahasa Junani, belaskenna Iesous. Gelar Josua aslina arah bahasa Heber, tapi bas Pustaka icatat kang terjemahen gelar e bas bahasa Junani. E buktina, kalak Kristen bas abad pertama, labo akapna masalah nggunaken gelar si biasa ipake bas bahasana.—Perbahanen Rasul-Rasul 7:45; Heber 4:8.
Gelar Dibata pe bage kang. La banci seri cara mbelasken gelar e bas tiap bahasa. Tapi si pentingna, gelar e la ihapus arah Pustaka.
a New Catholic Encyclopedia, Edisi si Peduaken, Jilid 14, halamen 883-884, ngataken, “La ndekah kenca kalak Jahudi mulih arah Pembuangen, gelar Yahweh enggo badiasa akap kalak, emaka mulai gantina jadi kata ADONAI ntah pe ELOHIM.”
b Guna ndatken terbuen keterangen, nen keterangen tambahen A4, “Gelar Dibata bas Kitap-Kitap Heber,” bas Pustaka si Badia Terjemahen Doni si Mbaru.
c Nen buku Theological Lexicon of the Old Testament, Jilid 2, halamen 523-524.
Mungkin Menarik Ka Kapndu
AJAREN PENTING ARAH PUSTAKA
Lit kin Gelar Dibata?
Dibata mbue penggelarenna, misalna Si Mada Kuasa, Si Nepa, ras Tuhan. Tapi, gelar Dibata tersurat kira-kira 7.000 kali i bas Pustaka si Badia.
PENUNGKUNEN SI IJAWAP PUSTAKA
Piga nge Gelar Dibata?
Lit kalak si erpengakap maka gelar Dibata eme ‘Allah,’ ‘Alpa ras Omega,’ ‘El Shaddai,’ ras ‘Jahwe-Jireh.’ Engkai maka carata ngelebuh Dibata e penting?
AJAREN PUSTAKA
Cubakenlah Kursus Pustaka ras Kami
Ikutilah kursus Pustaka si Badia gratis ras sekalak guru si ngajarisa.