Kesah si badia eme kuasa Dibata ntah pe gegeh Dibata. (Miha 3:8; Lukas 1:​35) Gunaken Dibata kesah si badia ntah pe gegehNa e guna ngelakoken sura-suraNa.​—Masmur 104:30; 139:7.

 Bas Pustaka si Badia, “kesah si badia” ntah pe gegeh Dibata, iterjemahken arah bahasa Heber eme ruakh ras bahasa Junani eme pneuma. (Kejadin 1:2) Tapi selain ngertiken kesah si badia, ruakh ras pneuma lit ka nge ertina si deban, eme:

•   Kesah.​—Habakuk 2:​19; Ketangkasen 13:15.

•   Angin.​—Kejadin 8:1; Johanes 3:8.

•   Kegeluhen.​—Jop 34:14, 15.

•   Sipat sekalak jelma.​—Bilangen 14:24.

•   Pribadi si la teridah, termasuk Dibata ras malekat-malekat.​—1 Raja-Raja 22:21; Johanes 4:​24.

 Kerina enda lit perserina, la teridah tapi pengaruhna teridah. Kesah si badia pe bage, “seri bagi angin si la teridah, la lit bentukna, tapi megegeh kel.”​—An Expository Dictionary of New Testament Words, by W.  E. Vine.

 Bas Pustaka si Badia pe, ikataken ka maka kesah si badia e eme ‘tan’ ntah pe “jari” Dibata. (Masmur 8:3; 102:25; Lukas 11:20; bandingken Matius 12:28.) Seri bagi tukang si ahli nggunaken tanna ras jarina guna ngelakoken pendahinna, Dibata pe nggunaken kesah si badia guna erban enda:

•   Alam semesta.​—Masmur 33:6; Jesaya 66:​1, 2.

•   Pustaka si Badia.​—2 Petrus 1:​20, 21.

•   Mukjizat si iban umat Dibata mbarenda, ras erban umatNa banci mberitaken berita si meriah alu semangat.​—Lukas 4:​18; Perbahanen Rasul-Rasul 1:8; 1 Korinti 12:​4-​11.

•   Sipat-sipat si mehuli bas kalak si patuh man bana.​—Galati 5:​22, 23.

Kesah si badia labo sada pribadi

 Arah Pustaka si Badia banci siteh maka kesah si badia labo sada pribadi, perban katakenna kesah si badia Dibata e eme “tan,” “jari,” ntah pe ‘kesah’ Dibata. (Keluaren 15:​8, 10) Seri bagi sekalak tukang, labo banci tanna saja si erdahin la radu ras dagingna bage pe pikirenna. Kesah si badia pe banci erdahin adi Dibata si nggerakkenca. (Lukas 11:13) Bas Pustaka si Badia, ibandingkenna kesah si badia Dibata ras lau janah belaskenna radu ras kiniteken bage pe pemeteh. Kerina e mbuktiken maka kesah si badia labo sada pribadi.​—Jesaya 44:3; Perbahanen Rasul-Rasul 6:5; 2 Korinti 6:6.

 Bas Pustaka si Badia lit ikataken ise gelar Dibata, eme Jahwe, janah gelar AnakNa eme Jesus Kristus. Tapi gelar kesah si badia la lit ikataken. (Jesaya 42:8; Lukas 1:​31) Sanga kalak Kristen si gelarna Stepanus ngidah surga alu mukjizat, dua pribadi ngenca idahna labo telu. Nina Pustaka si Badia, “Stepanus si dem alu kesah si badia natap ku langit, idahna kemulian Dibata. Idahna ka Jesus tedis i sebelah kanan Dibata.” (Perbahanen Rasul-Rasul 7:​55) Si erban Stepanus banci ngidah kemulian Dibata e pe, perban kesah si badia Dibata si erdahin.

 Pendapat si salah: Kesah si badia eme sada pribadi janah e bagin arah Tritunggal ntah pe Dibata Si Telu Sada, bagi si ikataken Matius 28:19, 20.

 Faktana: Bas Matius 28:19, 20, Bapak, Anak, ras kesah si badia, radu ras itulisken bas ayat e. Lit piga-piga si ngataken, e maksudna Tritunggal. Tapi cuba perdiateken, lit nge ikataken bas ayat e maka teluna e Dibata si seri kuasana, kedudukenna, kepentarenna, janah teluna e Dibata si lit rasa lalap? Lang. Bas ayat si deban pe, amin pe Bapak, Anak, ras kesah si badia radu ras itulisken bas sada ayat, e labo maksudna Tritunggal.

 Pendapat si salah: Bas Pustaka si Badia, lit kata-kata si ncidahken kesah si badia e sada pribadi. E buktina kesah si badia e sada pribadi.

 Faktana: Memang bas Pustaka si Badia, lit kata-kata si erbanca kesah si badia e tempa-tempa sada pribadi. Contohna sanga kataken Jesus kesah si badia eme “penampat” (parakletos) si banci mereken bukti, negu-negu, ngerana, megi, mberitaken, muji ras ngaloken. (Johanes 16:7-15) Tapi, situhuna e labo mbuktiken kesah si badia e sada pribadi. Sebap bas Pustaka si Badia pe, banna ka nge kepentaren, kematen, ras dosa, tempa-tempa sada pribadi. (Kuan-kuanen 1:​20; Roma 5:​17, 21) Contohna, katakenna kepentaren e lit ‘perbahanenna’ ras “anakna,” janah dosa igambarken banci nggoda, munuh, janah erban merhat kita nandangi jang kalak.​—Matius 11:19; Lukas 7:​35, cataten i teruh; Roma 7:​8, 11.

 Pendapat si salah: Iperidiken bas gelar kesah si badia mbuktiken maka kesah si badia e sada pribadi.

 Faktana: Bas Pustaka si Badia mon-mon gunakenna “gelar” guna ncidahken kuasa. (Ulangen 18:​5, 19-​22; Ester 8:​10) Enda seri bagi istilah bas bahasa Karo, “Ersumpah aku i bas gelar undang-undang,” pasti labo maksudna undang-undang e sada pribadi. Kalak si iperidiken “bas gelar” kesah si badia, ertina akuina kesah si badia e kuasa Dibata ntah pe gegeh Dibata guna ngelakoken sura-suraNa.​—Matius 28:19.

 Pendapat si salah: Rasul-rasul Jesus ras kalak Kristen abad pertama tek maka kesah si badia e sada pribadi.

 Faktana: Bas Pustaka si Badia ntah pe bas sejarah, la lit bage katakenna. Nina buku Encyclopædia Britannica, “Kesah si Badia mulai ikataken kalak sada Pribadi . . . sanga Konsili Konstantinopel tahun 381 M.” Kejadin e enggo lebih 250 tahun kenca mate rasul si terakhir.