Bas perumpaman Jesus lit iceritakenna kerna kalak bayak bage pe Lasarus. (Lukas 16:19-31) Kalak e duana nggambarken dua kelompok: (1) peminpin-peminpin agama Jahudi si sombong si lit bas jaman Jesus (2) rakyat biasa si rendah akap kalak, tapi nggit megiken berita si meriah si ipeseh Jesus.

Si ibahas bas artikel enda

•  Kai nge si ikataken Jesus kerna kalak bayak ras Lasarus?

•  Tuhu kin enda kisah nyata?

•  Tuhu kin cerita enda mbuktiken maka lit api neraka?

•  Kai ertina perumpaman kerna kalak bayak ras Lasarus?

 Bas Lukas pasal 16, iceritaken Jesus kerna dua dilaki si berubah kel geluhna.

 Ceritana bagenda: Lit sekalak dilaki si bayak janah mewah kel pergeluhna. Lit ka sekalak pemindo-mindo gelarna Lasarus si rusur ibaba ku lebe-lebe rumah kalak bayak e. Iarapken Lasarus gelah banci datna rimah-rimah si ndabuh arah meja kalak bayak e. Bas pudi wari, mate Lasarus janah ibaba malekat ia ku deher Abraham. Kalak bayak e pe mate ka janah ikuburken. Bas cerita Jesus, duana dilaki e tempa-tempa nggeluh denga amin pe kalak e enggo mate. Kalak bayak e isiksa bas api si gara. Ipindona gelah isuruh Abraham min Lasarus ncelupken ujung jarina ku lau janah itak-takkenna ku dilah kalak bayak ndai. Tapi la nggit Abraham ngelakoken pemindonna e. Ikatakenna maka enggo berubah kel kegeluhen dilaki e duana. Janah gundari lit embang si mbages si la banci isebrangi kalak bayak e bage pe Lasarus.

 Lang. Enda labo kisah nyata. Enda sada perumpaman si iceritaken Jesus guna ngajari kita. Pakar-pakar Pustaka pe akuina maka enda labo kisah nyata. Contohna, Pustaka terjemahen Martin Luther edisi 1912 ngataken maka enda perumpaman saja ngenca. Bukti si deban eme Pustaka Katolik The Jerusalem Bible. Bas salah sada cataten i teruh bas Pustaka e lit ikataken maka “kisah enda sada perumpaman si bentukna cerita, janah kalak si iceritaken i je labo tuhu-tuhu lit.”

 Kai nge ate Jesus si ajarkenna arah kisah e? Tuhu nge maksudna lit denga si nggeluh arah sekalak jelma kenca ia mate? Tuhu kin iajarken Jesus maka Abraham ras Lasarus lit i surga, janah lit kalak si isiksa bas api neraka kenca ia mate? Enda piga-piga keterangen si mbuktiken maka labo bage maksud Jesus.

 Misalna:

•   Adi tuhu kin kalak si bayak e isiksa bas api si gara, lau si lit bas ujung jari Lasarus e pasti mis kerah.

•   Amin pe lau e la mis kerah, lit kin gunana lau sentaktak man dilaki si bayak si sangana isiksa bas api si gara e?

•   Abraham la mungkin lit i surga, perban sanga Jesus i doni enggo jelas ikatakenna lenga pernah lit kalak si nangkih ku surga.​—Johanes 3:13.

 Lang. Tapi banci saja lit kalak si ngataken, cerita enda memang labo kisah nyata. Tapi enda gambaren si mbuktiken maka kalak si mehuli nangkih ku surga janah kalak jahat isiksa bas api neraka. a

 Masuk akal nge pendapat si bage? Lang.

 Ajaren api neraka la sesuai ras kai si ikataken Pustaka kerna keadan kalak mate. Contohna, la pernah kataken Pustaka maka kerina kalak bujur lawes ku surga kenca ia mate, janah kerina kalak jahat isiksa bas api neraka. Tapi jelas kel ikataken Pustaka, “Kalak si nggeluh denga tehna maka mate nge ia dungna. Tapi kalak mate la tehna kai pe.”​—Pengerana 9:5.

 Perumpaman Jesus e ncidahken maka lit dua kelompok si nandangi berubah kel keadanna.

 Kalak bayak e nggambarken peminpin-peminpin agama Jahudi “si mata duiten.” (Lukas 16:14) Begi kalak e nge berita si peseh Jesus, tapi tulak kalak e berita e. Rendah kel akap kalak e rakyat biasa.​—Johanes 7:49.

 Lasarus nggambarken rakyat biasa si rendah akap kalak tapi nggit megiken berita Jesus. Segat ate peminpin agama Jahudi ngidah kalak e.

 Berubah kel keadan dua kelompok enda.

•   Akap peminpin-peminpin agama Jahudi senang Dibata ngidah kalak e. Tapi perban la kalak e nggit megiken berita Jesus, tulak Dibata kalak e bage pe ibadahna. Emaka sanga si e kalak e tempa-tempa mate. Janah tersiksa kel kalak e sanga begina berita si peseh Jesus bage pe murid-muridna.​—Matius 23:29, 30; Perbahanen Rasul-Rasul 5:29-33.

•   Rakyat biasa bas jaman Jesus si la diate peminpin-peminpin agama, gundari enggo banci erteman ras Dibata. Melala si nggit megiken ajaren Jesus janah dungna melala datna gunana. Lit ka kesempaten kalak e erteman ras Dibata seh rasa lalap.​—Johanes 17:3.