Banci nge Kudat Kata Pergegeh arah Pustaka si Badia?
Jawapen Pustaka si Badia
Banci. (Roma 15:4) Perdiateken piga-piga ayat si enggo mpegegehi enterem kalak si sangana mberat situasina ras latih kel kapna rukur.
Si ibahas bas artikel enda
Sanga lit masalahta
Masmur 23:4: “Amin gia aku erdalan bas lembah si gelap, la aku mbiar kena bahaya, sebap Kam ras aku.”
Ertina: Banci kam terpegegehi sanga lit masalahndu adi ertoto kam man Dibata janah ikutkenndu kai nina Pustaka.
Pilipi 4:13: “Ngasup aku ngadapi kai pe perban gegeh si kualoken arah Dibata nari.”
Ertina: Banci bereken Dibata gegeh man bandu guna ngadapi masalahndu.
Sanga kalak si keleng ateta mate
Pengerana 9:10: “La lit pendahin ntah pe rencana, pemeteh, ntah pe kepentaren i bas Kuburen.”
Ertina: Kalak si enggo mate labo sangana menderita, labo ka banci cilakaina kita. Kalak mate lanai sadar.
Perbahanen Rasul-Rasul 24:15: “Lit pagi kekeken arah si mate nari.”
Ertina: Banci ipegeluh Dibata mulihi kalak si keleng ateta si enggo mate.
Sanga lalap salah siakap banta
Masmur 86:5: “O Jahwe, a mehuli kap Kam janah nggit ngampuni, mbelin kel kekelengenNdu si setia man kalak si erlebuh man baNdu.”
Ertina: Ampuni Dibata kalak situhu-tuhu menyesal janah usahakenna lanai ngelakoken kesalahenna e.
Masmur 103:12: “Bagi dauhna matawari terbit ku matawari terbenam, bage me dauhna pelanggarenta ipedauhNa arah kita nari.”
Ertina: Sanga iampuni Dibata kita, ndauh kel banNa kesalahenta e arah kita. Lanai inget-ingetNa kesalahenta e janah labo ihukumNa ntah pe isalahkenNa kita perban kesalahen e.
Sanga sedih kita
Masmur 31:7: “IdahNdu kesusahenKu, itehNdu uga latihna ukurku.”
Ertina: Iteh Dibata kerina kesusahenndu. AngkaiNa kel uga perasanndu, termasuk sanga la lit kalak si ngangkaisa.
Masmur 34:18: “Jahwe ndeher ras kalak si getem pusuhna, selamatkenNa kalak si lanai semangat.”
Ertina: Enggo erjanji Dibata ndukung kam sanga kam sedih. BerekenNa kam gegeh gelah ngasup kam ngadapi kai pe si erban getem pusuhndu.
Sanga sakit kita
Masmur 41:3: “Sanga sakit ia, pegegehi Jahwe ia.”
Ertina: Sanga mekelek penakitndu, sampati Dibata kam, banNa dame perukurenndu, berekenNa kam gegeh, sampatiNa kam gelah megenggeng, janah berekenNa kam kepentaren gelah banci banndu keputusen si mehuli.
Jesaya 33:24: “Si tading bas negri e lanai pagi lit si ngataken, ‘Sakit aku.’”
Ertina: Erjanji Dibata lit pagi masana kerina manusia lanai lit si sakit, kerinana sehat.
Sanga stres ras kuatir kita
Masmur 94:19: “Sanga kuatir kel aku, apuliNdu aku janah banNdu aku tenang.”
Ertina: Adi sipindo penampat Dibata sanga stres kita, banci sampatiNa kita gelah tetap tenang.
1 Petrus 5:7: “Benterkenlah kerina kekuatiren kena man Dibata, sebap perdiatekenNa kap kena.”
Ertina: Iperdiateken Dibata kesusahenta. IahkenNa kita ertoto man baNa kerna kekuatirenta.
Sanga lit perang
Masmur 46:9: “PengadiNa peperangen i belang-belang doni.”
Ertina: Lanai ndekah imasapken Kerajan Dibata pagi kerina perang.
Masmur 37:11, 29: “Kalak si meteruk ukur ndatken doni enda pagi, meriah kel pagi ukur kalak e perban dem kedamen i je. . . . Kalak si benar pagi si ndatken doni, ringan ia i je seh rasa lalap.”
Ertina: Umat Dibata nggeluh pagi alu dame bas doni enda seh rasa lalap.
Sanga kuatir kita kerna masa depan
Jeremia 29:11: “‘Kuteh kai ateKu Kulakoken man kena,’ nina Jahwe, ‘Kubereken ateKu kedamen man kena labo kesusahen. Kubereken ateKu masa depan si arapken kena.’”
Ertina: Erjanji Dibata man umatNa maka datken kalak e pagi masa depan si cerah.
Ketangkasen 21:4: “Apusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda enggo lanai lit.”
Ertina: Erjanji Dibata imasapkenNa pagi kerina si la mehuli si idahndu ras si igejapkenndu gundari.
a Jahwe eme gelar Dibata. (Masmur 83:18) Banci nenndu artikel “Ise kin Jahwe?”
Mungkin Menarik Ka Kapndu
SORA ERMOMO
Gunana Kekelengen Dibata Bandu
Ayat-ayat Pustaka banci erban kita tek man janji-janji Dibata kerna masa depan si luar biasa.
TOPIK SI DEBAN
Pengapul man Kalak si Erceda Ate
Sanga mate kalak si keleng ateta, banci saja la siakap lit kalak si banci ngangkai perasanta. Situhuna, angkai Dibata perasanta janah nggit Ia nampati kita.
AJAREN PENTING ARAH PUSTAKA
Engkai Pediat Dibata Mesera Kegeluhen Manusia?
Enterem kel kalak nungkun engkai maka melala kel segat ate ras masalah bas doni enda. Pustaka mereken jawapen si tepat ras erban malem ateta.
AJAREN PUSTAKA
Cubakenlah Kursus Pustaka ras Kami
Ikutilah kursus Pustaka si Badia gratis ras sekalak guru si ngajarisa.