Lit kin Dibata?

MAINKEN

Lit kin Dibata?

Jawapen Pustaka si Badia

Ue, lit Dibata. Bas Pustaka si Badia lit bukti si jelas kerna si e. Iahken Pustaka kita gelah tek man Dibata, maksudna labo tek bage-bage saja man ajaren agama, tapi tek perban sigunaken “kengasupen rukur” ras “kengasupen guna ngangkai.” (Roma 12:1; 1 Johanes 5:20, cataten i teruh) Ukurilah penjelasen si masuk akal enda arah Pustaka:

Alam semesta si teratur enda mbuktiken maka Pencipta e lit, janah e erban banci lit kegeluhen. Nina Pustaka, “Tiap rumah lit si mbangunsa, tapi si mbangun kerinana eme Dibata.” (Heber 3:4) Memang keterangen e sederhana, tapi melala kalak si meganjang sekolahna pe ngakui maka keterangen e masuk akal kel. a
Kita manusia, memang enggo kin lit sura-surata guna meteh kai tujun geluhta ras kai ertina geluhta enda. Amin gia keperlunta secara jasmani enggo tercukupi, tapi merhat denga kita meteh kai kin tujun geluhta. Nina Pustaka, enda bagin arah “keperlun rohani,” eme sura-sura guna nandai ras nembah Dibata. (Matius 5:3, cataten i teruh; Ketangkasen 4:11) Keperlun rohani enda mbuktiken Dibata e lit, janah keperlun rohani e pe mbuktiken maka Ia Pencipta si perkeleng, si ateNa gelah sidat min keperlun e.—Matius 4:4.
Nubuat-nubuat bas Pustaka itulis piga-piga abad sope nubuat e terjadi janah nubuat e terjadi pas bagi si enggo ikataken. Nubuat si tepat ras jelas e mbuktiken maka nubuat e rehna arah sada sumber si ndauh hebaten asangken manusia.—2 Petrus 1:21.
Bas jamanna, enggo maju kel pemeteh penulis Pustaka kerna ilmu pengetahuan. Contohna, nai enterem kalak si tek maka lit binatang si natang doni enda, contohna gajah, babi, ntah pe lembu. Tapi nina Pustaka, ‘sangkutken Dibata doni bas si la lit.’ (Jop 26:7) Bas Pustaka pe, tepat ka katakenna kerna bentuk doni, eme “lingkaren.” (Jesaya 40:22) Enterem kalak si tek alasen si masuk akalna kel maka teh penulis Pustaka e kerna si e perban dat kalak e informasina arah Dibata.
Bas Pustaka lit jawapen man penungkunen-penungkunen si mesera, maksudna penungkunen si banci erban kalak la tek maka Dibata e lit, adi la datna jawapen si tepat. Contohna adi tuhu kin Dibata e perkeleng ras mbelin kuasaNa, engkai maka lit kesusahen ras kejahaten bas doni enda? Engkai maka pengaruh agama buen si la mehuli asangken si mehuli?—Titus 1:16.

a Contohna, sekalak ahli ilmu perbintangen si enggo mate, si gelarna Allan Sandage pernah ngataken, “Mesera kuakap tek maka alam semesta si teratur enda lit arah kai si la teratur. Pasti lit pengaturen si erban alam semesta enda teratur. Adi aku labo kuteh Dibata e lit ntah lang, tapi adi sungkun engkai maka lit ciptan si luar biasa, penjelasen si masuk akalna kuakap eme perban lit si nciptakenca asangken sikataken la lit si nciptakenca.”