Lit nge Isi Pustaka si Badia si Enggo Iubah?

MAINKEN

Lang. Memang enggo ribun tahun dekahna Pustaka si Badia mulih-ulih isalin bas bahan si nukah ceda. Tapi adi ibandingken ras naskah-naskah kuno, isi Pustaka si Badia la berubah.

La nge pernah lit si salah sanga isi Pustaka si Badia isalin?

Lit ribun naskah kuno Pustaka si Badia si enggo idat. Sanga piga-piga naskah ibandingken, memang lit bedana. Berarti lit kesalahen sanga Pustaka si Badia isalin. Amin gia bage, buen arah perbedan e perbedan si kitik ngenca janah maknana sesuai denga ras naskah aslina. Tapi lit ka nge perbedan si mbelin. Enda terjadi perban lit piga-piga kalak sengaja ngubah isi Pustaka si Badia. Perdiatekenlah dua contoh enda:

Bas 1 Johanes 5:7, bas piga-piga terjemahen Pustaka si Badia si enggo ndekah, lit kata-kata: “bas surga, Bapak, Kata, ras Kesah si Badia: janah teluna e eme sada.” Tapi, naskah-naskah si terteki mbuktiken maka e la lit bas naskah aslina. Kata-kata e itambahken bas pudi wari. a Emaka bas piga-piga terjemahen si terteki si lit gundari, la masukkenna kata-kata e.
Bas naskah-naskah kuno Pustaka si Badia, gelar Dibata lit ribun kali itulis. Tapi melala terjemahen Pustaka si Badia si enggo gantina gelar Dibata jadi “Tuhan” ntah pe “Dibata.”

Kai si erban kita tek maka lanai bo pagi lit kesalahen si idat?

Gundari enggo melala kel naskah si idat, emaka adi lit kesalahen banci reh nukahna siakap metehsa. b Kenca naskah-naskah e ibandingken, kai nge si banci sisimpulken kerna terteki nge Pustaka si Badia si lit bas kita gundari?

Sekalak ahli si gelarna William H. Green ngataken kerna naskah Kitap-Kitap Heber (biasa igelari “Perjanjin Lama”), nina, “La lit naskah kuno si deban si bage kel tepatna.”
Sekalak ahli Pustaka si Badia si gelarna F. F. Bruce nulisken kerna Kitap-Kitap Junani Kristen, ntah pe “Perjanjin Baru,” itulisna, “Ndauh buen bukti si ndukung Perjanjin Baru asangken bukti si ndukung tulisen kuno si deban. Tapi la lit sada pe si ragu asli ntah lang tulisen kuno e.”
Sekalak ahli naskah Pustaka si Badia si gelarna Sir Frederic Kenyon, ngataken maka sekalak jelma “banci jemakna Pustaka si Badia janah katakenna alu pang maka si jemakna e eme Kata Dibata, si la berubah isina amin gia enggo iterusken arah jaman ku jaman.”

Kai ka si erban kita tek maka isi Pustaka si Badia tepat amin gia enggo mulih-ulih isalin?

Sanga Pustaka si Badia isalin kalak Jahudi bage pe kalak Kristen, labo hapus kalak e cerita kerna kesalahen si mbelin si lakoken umat Dibata. c (Bilangen 20:12; 2 Samuel 11:2-4; Galati 2:11-14) Catat kalak e ka nge kerna bangsa Jahudi si la patuh. Selain si e, labo hapus kalak e bagin Pustaka si Badia si ncidahken maka lit ajaren si salah si iban manusia. (Hosea 4:2; Maleaki 2:8, 9; Matius 23:8, 9; 1 Johanes 5:21) Perban catat kalak e cerita-cerita si ndai alu tepat, ibuktikenna maka iergaina janah tek ia man Pustaka si Badia.
Perban Pustaka si Badia rehna arah Dibata, la kin masuk akal nge adi jagaNa isina la berubah? d (Jesaya 40:8; 1 Petrus 1:24, 25) Ate Dibata, Pustaka si Badia erguna labo man kalak si mbarenda saja, tapi man kita gundari pe. (1 Korinti 10:11) Situhuna, “kerina ayat-ayat si enggo itulis mbarenda itulis guna ngajari kita. Ayat-ayat e erban kita megegeh janah apulina kita, alu bage lit arapenta.”—Roma 15:4.
Jesus ras pengikut-pengikutna pe, ikutipna nge salinen arah Kitap-Kitap Heber janah tek kalak e maka tepat nge isi salinen-salinen e.—Lukas 4:16-21; Perbahanen Rasul-Rasul 17:1-3.

a Kata-kata e la lit bas Kodeks Sinaitikus, Kodeks Aleksandrinus, Naskah Vatikanus 1209, naskah asli Vulgata Latin, Philoxenian-Harclean versi bahasa Siria, ntah pe Pesyita Siria.

b Misalna, lit lebih 5.000 naskah Junani si biasa igelari Perjanjin Baru ntah pe Kitap-Kitap Junani Kristen si enggo idat.

c Bas Pustaka si Badia, la lit ikataken maka sempurna nge kalak si pake Dibata nyalin Pustaka si Badia. Bas Pustaka si Badia ikataken, “Labo lit kalak si la erdosa.”—1 Raja-Raja 8:46.

d Bas Pustaka si Badia ikataken maka amin gia la ibelasken Dibata isi Pustaka si Badia kata per kata, itegu-tegu Dibata nge perukuren kalak si nulisken Pustaka si Badia.—2 Timotius 3:16, 17; 2 Petrus 1:21.