Banci! Pustaka si Badia rehna arah Dibata nari, “Dibata si lalap ngapuli kalak si latih rukur.” (2 Korinti 7:6) Memang Pustaka labo buku si mbahas kerna kesehaten mental, tapi enggo enterem kalak la surung bunuh diri perban ikutkenna nasehat si lit bas Pustaka. Nasehat enda pe banci ka nampati kam.

•  Kai nasehat si lit bas Pustaka si Badia?

•  Bas Pustaka si Badia, lit nge pengalamen kerna kalak si mate saja atena?

•  Ayat-ayat si apai si banci nampati kam ngambekken sura-sura bunuh diri?

•  Uga adi lit temanndu si ngataken maka mate saja atena?

•  Uga adi pernah kucubaken bunuh diri?

• ● Turiken perasanndu.

   Nina Pustaka si Badia: “Teman situhu-tuhu lalap ncidahken kekelengen, janah ia jadi senina sanga lit kesusahen.”—Kuan-kuanen 17:17.

   Ertina: Sanga stres kita, perlu kita penampat kalak si deban.

   Adi la kam nggit nceritaken masalahndu e, banci reh beratna akapndu. Tapi adi nggit kam nceritakenca, banci reh nahangna akapndu. Carandu rukur pe banci reh ulina.

   Banci cubakenndu enda: Ceritakenlah perasanndu man sekalak jelma bas wari enda, mungkin banci saja man anggota keluargandu ntah pe man teman si tek kel kam man bana. a Banci ka tuliskenndu perasanndu.

• ● Pindolah penampat dokter.

   Nina Pustaka si Badia: “Kalak si sehat labo perlu dokter, kalak si sakit nge perlu.”—Matius 9:12.

   Ertina: Adi sakit kita, perlu kita penampat dokter.

   Adi lit sura-surandu bunuh diri, banci jadi e tandana terganggu kesehaten mentalndu. Biasana adi sakit kam labo kam mela ertambar, bage ka pe adi terganggu kesehaten mental ras emosindu, ula kam mela ertambar. Perban banci nge itambari dokter penakitndu e.

   Banci cubakenndu enda: Mislah pindo penampat dokter.

• ● Ingetlah iperdiateken Dibata nge kam.

   Nina Pustaka si Badia: “La kin lima perik cipcip adi idayaken ergana dua sen logam si kitik ngenca? Tapi labo sada pe perik e lupaken Dibata. . . . Emaka ula kena mbiar, ergan nge kena asangken melala perik cipcip.”—Lukas 12:6, 7.

   Ertina: Meherga kam i lebe-lebe Dibata.

   Banci jadi la akapndu lit si ermediate man bandu. Tapi situhuna, ermediate nge Dibata man bandu aminna pe lanai atendu gedang nggeluh. Nina Masmur 51:17, ‘Labo tulak Dibata pusuh si getem ras hancur.’ Ate Dibata tetap min kam nggeluh, perban keleng ateNa kam.

   Banci cubakenndu enda: Bacalah bukti-buktina arah Pustaka maka keleng ate Dibata kam. Contohna banci bukandu buku Mendekatlah kepada Yehuwa pasal 24, buku si ipake guna erlajar Pustaka.

• ● Ertotolah man Dibata.

   Nina Pustaka si Badia: “Benterkenlah kerina kekuatiren kena man Dibata, sebap perdiatekenNa kap kena.”—1 Petrus 5:7.

   Ertina: Ate Dibata turikenndu min man baNa kai pe si erban latih kel ukurndu.

   Banci ban Dibata dame pusuhndu janah banNa kam ngasup ngadapi masalahndu. (Pilipi 4:6, 7, 13) Bage me cara Dibata njawap pertoton kalak si mindo penampat man baNa.—Masmur 55:22.

   Banci cubakenndu enda: Ertotolah kam man Dibata bas wari enda. Gunakenlah gelarNa, Jahwe, janah turiken uga perasanndu man baNa. (Masmur 83:18) Pindolah gelah sampatiNa kam megegeh.

• ● Ukurilah arapen si lit bas Pustaka.

   Nina Pustaka si Badia: “Arapenta e pasti ras paguh, bagi jangkar bas geluhta.”—Heber 6:19.

   Ertina: Perasanndu banci jadi la stabil bali bagi kapal si sangana kena badai. Tapi arapen si lit bas Pustaka banci nampati kam tetap paguh.

   Arapen enda pasti terjadi, perban Dibata enggo erjanji guna nasapken kerina si erban latih ukurta.—Ketangkasen 21:4.

   Banci cubakenndu enda: Gelah tehndu terbuen arapen si lit bas Pustaka, bacalah pelajaren 5 arah brosur Berita si Meriah i bas Dibata nari!

• ● Lakokenlah kai si erban meriah ukurndu.

   Nina Pustaka si Badia: “Pusuh si senang eme tambar si mejile.”—Kuan-kuanen 17:22.

   Ertina: Adi lakokenndu kai si erban meriah ukurndu, perasanndu banci reh tenangna.

   Banci cubakenndu enda: Lakokenlah kai si meriah akapndu, misalna megiken musik si erban kam semangat, mbaca buku, ntah pe ngelakoken hobindu. Banci ka reh riahna ukurndu adi isampatindu kalak si deban, amin pe sitik ngenca si banci ilakokenndu.​—Perbahanen Rasul-Rasul 20:35.

• ● Jagalah kesehatenndu.

   Nina Pustaka si Badia: ‘Latihen gerak badan lit gunana.’—1 Timotius 4:8.

   Ertina: Banci kam reh sehatna adi olahraga kam, la kam kurang medem, janah panndu pangan si sehat.

   Banci cubakenndu enda: Olahraga min kam silang-langna 15 menit tiap wari.

• ● Ingetlah perasanta ras situasita banci berubah.

   Nina Pustaka si Badia: “La teh kena uga geluh kena pagi.”—Jakup 4:14.

   Ertina: Aminna pe mberat kel sangana masalahndu, tempa-tempa la lit jalan keluarna, ingetlah labo kari bage lalap.

   La soal uga beratna masalahndu gundari, teklah kam banci nge kari e berubah. Emaka daramilah cara ngadapisa. (2 Korinti 4:8) Reh dekahna, situasindu e banci saja kari reh ulina. Tapi adi enggo sempat kam bunuh diri, e lanai banci iubah.

   Banci cubakenndu enda: Bacandulah pengalamen-pengalamen si lit bas Pustaka kerna kalak si sempat putus asa janah mate saja atena. Perdiateken uga situasina dungna reh ulina amin pe perubahen e labo isangkana terjadi. Enda piga-piga contohna.

 Lit. Pustaka nceritaken kerna kalak si mate saja atena. Amin pe bage, labo rawai Dibata kalak e tapi sampatiNa. Emaka, ate Dibata pe nampati kam.

Elia

•  ● Ise kin ia? Elia eme sekalak nabi si perpang. Tapi ia pe pernah kang putus asa. Nina Jakup 5:17, “Elia pe seri perasanna ras kita.”

•  ● Engkai maka mate atena? Perban sempat sisada akap Elia bana, mbiar ia, janah la kapna erguna bana. Emaka ertoto ia, nina, ‘Jahwe, buatlah kesahku.’​—1 Raja-Raja 19:4.

•  ● Kai si nampati ia? Ituriken Elia isi pusuhna man Dibata. Uga Dibata mpegegehi ia? Ituduhken Dibata maka ermediate Ia man Elia janah icidahkenNa ka uga belinna kuasaNa man Elia. Ipetetap Dibata ka ukur Elia maka meherga kel ia. Selain si e, bereken Dibata ka teman si ermediate ras banci iandalken guna nampati Elia.

•  ▸ Bacalah pengalamen Elia bas: 1 Raja-Raja 19:2-18.

Jop

•  ● Ise kin ia? Jop e kalak bayak, melala anakna, janah tek ia man Dibata si benar.

•  ● Engkai maka mate atena? Perban rempet berubah kegeluhen Jop. Keri kerina ertana, mate kerina anakna, ia pe sakit ka janah mekelek kel penakitna. Selain si e, lit ka si ngataken maka kerina masalah si terjadi man Jop perban salahna. Dungna bagenda nina Jop, “Ciga ateku geluhku. Lanai ateku nggeluh.”—Jop 7:16.

•  ● Kai si nampati ia? Ertoto Jop man Dibata janah nggit ia cerita man kalak si deban. (Jop 10:1-3) Ia pe isampati Elihu, temanna si nggit ngangkai perasanna. Perban isampati Elihu, dungna banci positip perukuren Jop. Janah si pentingna, nggit Jop ngaloken nasehat ras penampat Dibata.

•  ▸ Bacalah pengalamen Jop bas: Jop 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Musa

•  ● Ise kin ia? Musa eme peminpin bangsa Israel bas jaman si mbarenda janah ia pe sekalak nabi si setia.

•  ● Engkai maka mate atena? Melala kel tanggung jawap Musa, janah rusur ka ia ipandangi. Emaka dungna putus asa ia janah katakenna man Dibata, “Bunuh saja aku gundari.”—Bilangen 11:11, 15.

•  ● Kai si nampati ia? Ituriken Musa isi pusuhna man Dibata. Isampati Dibata ia ndalanken tanggung jawapna gelah ula nai ia stres.

•  ▸ Bacalah pengalamen Musa bas: Bilangen 11:4-6, 10-17.