Banci. Lit empat pedah Pustaka si banci nampati kita:

1.   Tetapkenlah pengeluarenndu. “Rencana kalak rajin pasti berhasil, tapi ise pe si merudu-rudu, mesera pagi dungna.” (Kuan-kuanen 21:5) Ula metersa nukur barang perban lit diskon. Tetapkenlah pengeluarenndu janah usahakenlah gelah ula lebih pengeluarenndu asa si enggo tetapkenndu e.

2.   Ula kam rutang adi la perlu. “Kalak si minjam jadi budak kalak si mere pinjamen.” (Kuan-kuanen 22:7) Adi enggo sempat kam rutang janah la tergalarindu, arih-arihlah kam ras kalak si mereken pinjamen man bandu gelah ubahna carandu nggalarisa. Ula kam mis nyerah. Bagi kalak si ikataken bas Kuan-kuanen 6:1-5 min kam, nina, “Peteruk bandu, ras pindolah gelah mekuah atena kam. Ula pediat matandu tertunduh, ula pediat matandu terpedem.” Teruslah pindo amin gia tangtangna la ia nggit megiken pemindonndu.

3.   Ula merangap. “Kalak si rangap, pala-palaina ndatken kebayaken, tapi la tehna mesera pagi geluhna.” (Kuan-kuanen 28:22) Kalak si percian ras merangap banci mesera pagi geluhna janah la banci ia ndeher ras Dibata.

4.   Puaslah kapndu. “Puas min siakap adi lit panganta ras pakenta.” (1 Timotius 6:8) Sen la banci erban kita tuhu-tuhu ermeriah ukur ntah pe puas. Piga-piga kalak si tuhu-tuhu ermeriah ukur labo perban melala senna. Tapi banci meriah ukur kalak e perban lit kekelengen bas keluargana bage pe arah temanna janah perban ndeher ia ras Dibata.​—Kuan-kuanen 15:17; 1 Petrus 5:6, 7.